މެދުއިރުމަތީގައި މިހާރު ކުރިއަށްދާ ހަނގުރާމައާ ގުޅިގެން ރާއްޖެއިން އަސާސީ ކާބޯތަކެއްޗާއި ތެލާއި ގޭހަށް ނުޖެހޭނެ ކަމުގެ ޔަގީންކަން އިގްތިސާދީ މިނިސްޓަރު މުހައްމަދު ސައީދު ދެއްވައިފި އެވެ.
މިހާރު ކުރިއަށްދާ ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ސައީދު ވިދާޅުވީ، ރާއްޖެއަށް ބޭނުންވާ އަސާސީ މުދާ، އެއްވެސް މެދުކެނޑުމެއް ނެތި ލިބޭނެ އިންތިޒާމް ސަރުކާރުން ހަމަޖައްސާނެ ކަމަށެވެ.
"ފުރަތަމަ ކަމަކަށް ހަނޑޫ، ހަކުރު، ފުށް އަގުބޮޑެއް ނުވާނެ. އެއީ ކަށަވަރު ކަމެއް. މެދުކެނޑުމެއް ނެތި ކާޑު ލިބޭނެކަމަށް އަޅުގަނޑު ޔަގީންކަން ދެން،" ސައީދު ވިދާޅުވި އެވެ. "ފުޑް، ފިއުލް އަދި އެއްވެސް ކޮމޯޑިޓީއެއްގެ ޗެލެންޖެއް އިރާދަކުރެއްވިއްޔާ ކުރިމަތިވިޔަ ނުދޭނެ ވާހަކަ."
މިއަދު ނޫސްވެރިންގެ ބައްދަލުވުމުގައި ރާއްޖޭގެ އިގްތިސާދުގެ މައި އިންޑަސްޓްރީ ކަމަށްވާ ޓުއަރިޒަމާ ގުޅޭ ގޮތުން ވެސް ސައީދު ވާހަކަ ދެއްކެވި އެވެ. އޭނާ ވިދާޅުވީ ހަނގުރާމައިގެ ސަބަބުން ފަތުރުވެރިކަމަށް އަސަރު ކުރި ނަމަވެސް ގެއްލުންތައް ކުޑަކުރަން މަސައްކަތް ކުރަމުންދާ ކަމަށެވެ.
"ޓުއަރިޒަމަށް ރާއްޖެ ޑިޕެންޑު މި ވަނީ. އިގްތިސާދުގެ އެންމެ ބޮޑު ތަނބަކީ ޓުއަރިޒަމް. ހަމައެކަނި މިހާރެއް ނޫން. ރާއްޖޭގެ މޮޑަން އިކޮނޮމީ ފެށުނީއްސުރެ ޓުއަރިޒަމަށް ޑިޕެންޑު ވަނީ. އޭގެ ވަށައިގެން އެހެން ސިނާއަތްތައް މި ހުންނަނީ،" ސައީދު ވިދާޅުވި އެވެ. "އެހެންވިޔަސް ދުނިޔެ ގަބޫލު ކުރާ ގޮތުގައި ޓުއަރިޒަމަކީ އެންމެ ޕޮޕިއުލާ ސިނާއަތް ކަމުގައި ވިޔަސް އެންމެ އަވަހަށް ހީނަރުކަން ވެސް އަންނަ ސިނާއަތް."
މިނިސްޓަރު ވިދާޅުވީ، މީގެ ކުރިން ދިމާވި ސުނާމީ ފަދަ ކާރިސާތަކުގައި ވެސް ވެސް ފަތުރުވެރިކަން އިންތިހާއަށް އަޑިއަޅައިލި ނަމަވެސް ކޮންމެ ފަހަރަކު ވެސް އިންޑަސްޓްރީ ވަރަށް އަވަހަށް އަލުން ދިރޭ ކަމަށެވެ.
"އެގޮތުން ބަލާއިރު ރާއްޖެއަކީ ވަރަށް ރެޒީލިއެންޓް ގައުމެއް. އެ ދެން އޭގެ އެންމެ ހެޔޮ ފާލަކީ އެނގޭތޯ؟،" ސައީދު ވިދާޅުވި އެވެ.
މެދުއިރުމަތީގައި ހަނގުރާމަ ފެށުނީ އެމެރިކާ އާއި އިޒްރޭލުން ގުޅިގެން އިރާނަށް ހަމަލާ ދޭން ފެށުމުންނެވެ. އޭގެ ބަދަލުގައި އިރާނުން ހަމަލާ ދޭން ފެށީ އަވައްޓެރި އަރަބި ގައުމުތަކުގައި އެމެރިކާއިން ގާއިމްކޮށްފައިވާ ބޭސްތަކަށެވެ. އެގޮތުން ސައުދީ އަރަބިއްޔާ، އޮމާން، ކުވެއިތު، އުރުދުން އަދި ޔޫއޭއީއަށް އިރާނުން ވަނީ ވަރުގަދަ ހަމަލާތަކެއް ދީފަ އެވެ.
