ރަސްމީ ދަތުރެއްގައި ފޮރިން މިނިސްޓަރު ޒަމީރު ޔުނައިޓެޑް އަރަބް އެމިރޭޓްސް (ޔޫއޭއީ) އަށް ފުރާވަޑައިގެންފި އެވެ.

ހާރިޖީ ވުޒާރާއިން މިރޭ ނެރުނު ބަޔާނެއްގައި ބުނީ ޒަމީރު މިރޭ ފެށްޓެވި ރަސްމީ ދަތުރު ނިންމަވާލައްވާނީ އަންނަ ބުދަ ދުވަހު ކަމަށެވެ.

ޒަމީރު އަރިހުގައި ވަޑައިގަންނަވާ ވަފުދުގައި އެމްބެސެޑާ އެޓް ލާޖު އަހުމަދު ނަސީރު، ބައިލެޓްރަލް ސެކްރެޓަރީ ޑރ. ހާލާ ހަމީދު އަދި ޖޮއިންޓް ސެކްރެޓަރީ މަރްޔަމް ރީޝާ ބައިވެރިވެވަޑައިގެންނެވި ކަމަށްވެސް ފޮރިން މިނިސްޓްރީން ބުންޏެވެ.

އެ ދަތުރުގައި ޒަމީރު، ޔޫއޭއީގެ ބޮޑުވަޒީރުގެ ނައިބު އަދި ހާރިޖީ ވަޒީރު، ޝެއިހު އަބްދުالله ބިން ޒައިދު އަލް ނަޙްޔާން އަދި އެ ގައުމުގެ ސަރުކާރުގެ އެހެނިހެން އިސްވެރިންނާ ބައްދަލުކުރެއްވާނެ ކަމަށްވެ އެވެ.

ހާރިޖިއްޔާއިން މި ދަތުރު ސިފަކުރީ، ރާއްޖެއާއި ޔޫއޭއީއާއި ދެމެދު އޮންނަ ގާތް، ރަހުމަތްތެރިކަމުގެ ގުޅުން އިތުރަށް ހަރުދަނާކޮށް، ބަދަހިކުރުމަށް އެޅޭ މުހިންމު ފިޔަވަޅެއްގެ ގޮތުގަ އެވެ.

މިއީ ޒަމީރު މި ފަހުން މެދުއިރުމަތީގެ ގައުމަކަށް ކުރައްވާ ތިންވަނަ ދަތުރެވެ. އެގޮތުން އޮގަސްޓު 12، ގައި ބަހްރެއިން އަށް އަދި އޮގަސްޓު 18، ގައި ސައުދީ އަރަބިއާއަށް ވެސް އޭނާ ވަޑައިގެންނެވި އެވެ. މި ދެ ގައުމުގެ ވެރިންނަށްވެސް ޒަމީރު ވަނީ ރައީސް ޑރ. މުހައްމަދު މުއިއްޒުގެ ހާއްސަ ސިޓީތަކެއް އަރުއްވާފަ އެވެ.

ރާއްޖޭގެ މާލީ ހާލަތު ގޯސްވެފައިވާ މި ދަނޑިވަޅުގައި މެދުއިރުމަތީގެ ގައުމުތަކަށް ކުރައްވަމުން ގެންދަވާ ދަތުރުތަކުގައި އެކި ގޮތްގޮތުން އެހީ ހޯދުމަށް އެ ގައުމުތަކާއެކު މަޝްވަރާކުރައްވަމުންދާ ކަމަށް ޒަމީރު ވަނީ މީގެ ކުރިން ވިދާޅުވެފަ އެވެ. ނަމަވެސް އެ ދަތުރުތަކުން މިހާތަނަށް އެއްވެސް މިންވަރެއްގެ އެހީއެއް ކަށަވަރެއް ނުވެ އެވެ.