ދުބާއީގެ ވެރިޔާގެ އާއިލީ ބޭފުޅެއް ކަމަށްވާ ޝައިޚް ސައީދު ބިން މަޚްތޫމް ބިން ރާޝިދު އަލް މަޚްތޫމްގެ ކުރީގެ އަނބިކަނބަލުން ޒައިނަބް ޖަވާދްލީ ފުލުހުންގެ ބެލުމުގެ ދަށަށް ގެންގޮސްފި އެވެ.
ދުބާއީ ޕަބްލިކް ޕްރޮސެކިއުޝަނުން ބީބީސީއަށް މައުލޫމާތު ދީފައިވާ ގޮތުގައި ޒައިނަބް ހައްޔަރުކުރީ އޭނާގެ ކުރީގެ ފިރިކަލުން އަދި ތިން ދަރިންގެ ބައްޕަ ހުށަހެޅި ޝަކުވާއަކާ ގުޅިގެންނެވެ.
ޝައިޚް ސައީދު ތުހުމަތު ކުރައްވާ ގޮތުގައި ޒައިނަބް ވަނީ ކޯޓުން ހުއްދަ ދީފައިވާ ބައްދަލުވުމެއްގެ ތެރެއިން އެ ދެމަފިރިންގެ ތިން ދަރިން ވަގަށް ނަގާފައެވެ.
އަޒަރުބައިޖާނަށް ނިސްބަތްވާ ކުރީގެ މަޝްހޫރު ޖިމްނާސްޓް ޒައިނަބް، ފާއިތުވި މަސްތަކުގައި ދިރިއުޅެމުން ދިޔައީ ގޭބަންދެއް ފަދަ ހާލަތެއްގައެވެ. ސަލާމަތީ ބާރުތަކުން އޭނާގެ ދަރިން އަތުލައިގަނެ، އޭނާ ހައްޔަރުކޮށްފާނެ ކަމުގެ ބިރަށްޓަކައި އޭނާ ގެއިން ބޭރަށް ނުކުމެ އުޅުން އޮތީ މަދުކޮށްފައެވެ.
މި މައްސަލަ ހޫނުވެފައިވަނީ ދަރިންގެ ބެލެނިވެރިކަމާ ގުޅޭގޮތުން އުފެދިފައިވާ ދަބަސްވުމުގެ ތެރެއިންނެވެ. މީގެ ކުރިންވެސް ދަރިން އެކަކު އަނެކަކު އަތުން ބަދަލުވަމުން ދިޔައިރު، ދެ ފަރާތުންވެސް ވަނީ ދަރިން ވަގަށް ނެގި ކަމުގެ ތުހުމަތު އެކަކު އަނެކަކަށް ކޮށްފައެވެ.
މީގެ އިތުރުން، ޔޫއޭއީގެ ސައިބަރ ކްރައިމް ގާނޫނާ ހިލާފުވި ކަމުގެ ތުހުމަތުވެސް ޒައިނަބްގެ މައްޗަށް ވަނީ ކުރެވިފައެވެ. އެއީ މިދިޔަ އަހަރު ދަރިން އަތުލަން އުޅުނު ވަގުތެއްގައި އޭނާ ސޯޝަލް މީޑިއާ މެދުވެރިކޮށް ލައިވްސްޓްރީމް ކުރި މައްސަލައެއްގައެވެ. އެ ވަގުތު އޭނާ ބުނެފައިވަނީ އެއީ ދަރިންނާއެކު ހުރެވޭނެ އެންމެ ފަހު ފުރުސަތު ކަމަށް ގަބޫލުކުރެވޭތީ، އެހީއަށް އެދި ގޮވާލުމުގެ ގޮތުން ކުރި ކަމެއް ކަމަށެވެ.
ޝައިޚް ސައީދުގެ ވަކީލުން ކޯޓުގައި ވިދާޅުވަމުން ގެންދަވަނީ ޒައިނަބަކީ ދަރިން ބެލުމަށް އެކަށީގެންވާ މީހެއް ނޫން ކަމަށެވެ. އޭނާ ދަރިން ސްކޫލަށް ނުފޮނުވާ ކަމަށާއި، ހޮޓަލެއްގައި ދިރިއުޅުނު އިރު އެތަނަކީ ކުދިންނަށް ރައްކާތެރި ތަނެއް ނޫން ކަމަށްވެސް ވަކީލުން ބުނެފައިވެއެވެ. އަދި އެންމެ ހަގު ދަރިފުޅުގެ ސިއްހަތަށް ނުރައްކާވާ ފަދަ ކަންކަން ޒައިނަބްގެ ފަރާތުން ފެނިފައިވާ ކަމަށްވެސް ތުހުމަތުކޮށްފައިވެއެވެ.
ދުބާއީ ޕަބްލިކް ޕްރޮސެކިއުޝަނުން ބުރާސްފަތި ދުވަހުގެ ރޭ ނެރުނު ބަޔާނެއްގައި ބުނެފައިވަނީ، މި މައްސަލަ މިހާރު ތަހުގީގު ކުރަމުންދާ ކަމަށާއި، ގާނޫނީ ހަމަތަކުގެ މަތިން އަޅަންޖެހޭ ފިޔަވަޅުތައް އަޅަމުންދާނެ ކަމަށެވެ. އަދި މިކަމުގައި އެންމެ ބޮޑު އިސްކަމެއް ދެނީ ކުދިންގެ މަސްލަހަތާއި ރައްކާތެރިކަމަށް ކަމަށްވެސް އެ އިދާރާއިން ބުނެފައިވެއެވެ.
މިކަމާ ގުޅިގެން ޒައިނަބްގެ ދިފާއުގައި މަސައްކަތްކުރާ އިންސާނީ ހައްގުތަކަށް ވަކާލާތުކުރާ ވަކީލު ޑޭވިޑް ހޭގް ވަނީ ޒައިނަބަށް އޭނާގެ ވަކީލުންނާއި، ކޮންސިއުލޭޓާއި އަދި އާއިލާއާ ބައްދަލުކުރުމުގެ ފުރުސަތު ވަގުތުން ދިނުމަށް ގޮވާލާފައެވެ. އަދި އޭނާ މިހާރުން މިހާރަށް މިނިވަންކޮށް ދުބާއީގައި ހުންނަ އޭނާގެ ގެއަށް ފޮނުވާލުމަށްވެސް ހޭގް ވަނީ ޔޫއޭއީގެ ސަރުކާރަށް ގޮވާލާފައެވެ.
