ފޮރިން މިނިސްޓަރު މޫސާ ޒަމީރު ރަސްމީ ދަތުރެއްގައި ސައުދީ އަރަބިއްޔާއަށް ވަޑައިގަންނަވަން ހަމަޖެހިއްޖެ އެވެ.

ޒަމީރު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، އޭނާ މިއަދު ސައުދީއަށް ފުރާވަޑައިގަންނަވަނީ އެ ގައުމުގެ ސަރުކާރުގެ ދައުވަތަކަށް ކަމަށެވެ. ދަތުރުގެ ދިގުމިނެއް ވިދާޅެއް ނުވެ އެވެ.

މި ދަތުރުގައި ސައުދީގެ ފޮރިން މިނިސްޓަރު ފައިސަލް ބިން ފަރްހާން އަލްސައުދު އާ ބައްދަލުކުރައްވާނެ ކަމަށާއި ފައިސަލްގެ އިތުރުންވެސް ސައުދީގެ އިސް އޮފިޝަލުންނާއެކު މަޝްވަރާތަކެއް ކުރިއަށް ގެންދަވާނެ ކަމަށްވެސް ޒަމީރުގެ ޕޯސްޓުގައި ވިދާޅުވި އެވެ.

ދެ ގައުމުގެ މަޝްވަރާތައް ބިނާވާނީ ގުޅުން ބަދަހިކުރުމުގެ މައްޗަށް ކަމަށްވެ އެވެ. ރާއްޖޭގެ އިގުތިސޯދީ ހާލަތު ގޯސްވެފައިވާ މި ދަނޑިވަޅުގައި ކުރެވޭ މި މަޝްވަރާތަކުގައި ހިލޭ އެހީއާ ގުޅޭގޮތުން ވާހަކަދެކެވޭނެ ކަމަށްވެސް ބެލެވެ އެވެ.

މިއީ މި މަހު ޒަމީރު ސައުދީއަށް ވަޑައިގަންނަވާ ދެވަނަ ފަހަރެވެ. އޮގަސްޓު 6، ގައި އޭނާ ޖިއްދާ އަށް ވަޑައިގެންނެވީ މެދުއިރުމަތީގެ މަސްރަހު ގޯސްވެ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އިން ބޭއްވި ކުއްލި ބައްދަލުވުމަކަށެވެ.

އޭގެފަހުންވެސް ޒަމީރު ވަނީ މެދުއިރުމައްޗަށް ވަޑައިގެންފަ އެވެ. ހާރިޖީ ވަޒީރުގެ އެންމެ ފަހުން ރަސްމީ ދަތުރުގައި ވަޑައިގެންނެވީ ބަހްރެއިނަށެވެ. ބަހްރެއިންގެ ފޮރިން މިނިސްޓަރު އަބްދުއްލަތީފް ބިން ރާޝިދު ޒަޔާނީގެ ދައުވަތަކަށް ކުރެއްވި އެ ދަތުރުގައި ދެ ގައުމުގެ މެދުގައި މަޝްވަރާތަކެއް ކުރެވުނެވެ. ނަތީޖާއެއް މިނިސްޓްރީން ހާމައެއް ނުކުރެ އެވެ.