ޕަބްލިކް ސާވިސް މީޑިއާ (ޕީއެސްއެމް) ގެ މެނޭޖިން ޑިރެކްޓަރުގެ މަގަމުގައި ހުންނެވި ޒީނާ ޒާހިރު އެ މަގާމުން އިސްތިއުފާ ދެއްވައިފި އެވެ.
ޕީއެސްއެމްގެ މެނޭޖިން ޑިރެކްޓަރުކަމުން އިސްތިއުފާ ދެއްވިކަން، ޒީނާ ވަނީ "އަދަދު" އަށް ކަށަވަރު ކޮށްދެއްވައިފަ އެވެ.
"އަޅުގަނޑު މިއަދު ހަވީރު 4:30 ގައި އިސްތިއުފާގެ ސިޓީ ހަވާލު ކޮށްފިން، އެއީ މިވަގުތަށް ދަންނަވަން އޮތް އެއްޗަކީ،" ޒީނާ ވިދާޅުވި އެވެ.
އޭނާ އެ މަގާމުން އިސްތިއުފާ ދެއްވި ސަބަބެއް ހާމަ ނުކުރެއްވި ނަމަވެސް ޕީއެސްއެމްގެ ބައެއް މުވައްޒަފުން "އަދަދު" އަށް ބުނީ ޒީނާ އިސްތިއުފާ ދެއްވީ ސަރުކާރުން ބޭނުންވާ ގޮތަށް ޕީއެސްއެމް ހިންގުމަށް އިރުޝާދުތައް ދީ ކުރިމަތި ކުރާ ޕްރެޝަރުގެ ސަބަބުން ކަމަށެވެ.
"ޒީނާ އިސްތިއުފާ ދިނީ އެތަނުގެ ހިންގުމަށް ސަރުކާރުން ގެންނަން ބޭނުންވާ ބަދަލުތަކުގެ އިރުޝާދު ދީފައި ވަނިކޮށް މަގާމުގައި ހުންނަން ޕްރެޝަރު ކުރިމަތިވެފައި ވުމުން،" ނަން ހާމަ ނުކުރުމަށް އެދި ވާހަކަ ދެއްކި އޮފިޝަލް ބުންޏެވެ.
