ހަނިމާދޫ އިންޓަނޭޝަނަލް އެއާޕޯޓްގެ ފަޔާ ޓްރަކަށް ދިމާވި މައްސަލައަކާ ގުޅިގެން، އެއާޕޯޓް ބަންދުކޮށްފި އެވެ.
ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް) ގެ އެމްޑީ އަހުމަދު މުބީން "އަދަދު" އަށް ވިދާޅުވީ އެއާޕޯޓްގެ އޮޕަރޭޝަންތައް ހުއްޓާލީ މިއަދު ފަޔާ ޓްރަކަށް ދިމާވި މައްސަލައަކާ ގުޅިގެން ކަމަށާއި އެކަން ހައްލު ކުރަން ފަޔާ ޓްރަކަށް ބޭނުންވާ ސްޕެއާ ގެނައުމުގެ މަސައްކަތް ކުރަމުންދާ ކަމަށެވެ.
"ފަޔާ ޓްރަކަށް މިއަދު މައްސަލައެއް ދިމާވީ. މިހާރު ހަނިމާދޫއަށް އަންނަ ފްލައިޓެއް އިންނާނެ ކުޅުދުއްފުއްޓަށް ޑައިވާޓްކޮށްފައި. އޭގެއިން ހަލާކުވެފައި ހުރި ބައި އެބަ ގެންނަން،" މުބީން ވިދާޅުވި އެވެ.
އޭނާ ވިދާޅުވީ ފަޔާ ޓްރަކަށް ދިމާވި މައްސަލަ ހައްލުކޮށް މާދަމާ ހެނދުނު 06:00 ޖަހާއިރު އޮޕަަރޭޝަން އަލުން ފެށުމަށް މަސައްކަތް ކުރަމުންްދާ ކަމަށެވެ.
އެއާޕޯޓުގެ ރެގިއުލޭޝަންތައް ބުނާގޮތުން ފަޔާ ޓްރަކެއްގައި މައްސަލައެއް ދިމާވެފައިވާނަމަ، އެ އެއާޕޯޓަކަށް ފްލައިޓް ޖެއްސުން މަނާވާނެ އެވެ.
މުބީން ވިދާޅުވީ އެ އެއާޕޯޓުގައި ބޭނުންކުރާ ހަމައެކަނި ފަޔާ ޓްރަކް ކޮންމެ ދުވަހަކު ވެސް ރަނގަޅުތޯ ޓެސްޓުކޮށް، ބޭނުންކުރާ ކަމަށެވެ. އަދި އެއާޕޯޓުގައި ހުރި ފަޔާ ޓްރަކްތައް ބާވެ، އާ ޓްރަކްތައް ގެނައުމަށް މަސައްކަތް ކުރަމުންދާކަމަށް އޭނާ ވިދާޅުވި އެވެ.
އާރުއޭސީއެލް އިން އަމާޒު ހިފާފައި ވަނީ ހަނިމާދޫ އެއާޕޯޓުގައި ދެ ފަޔާ ޓްރަކް ބަހައްޓާށެވެ. މި އެއާޕޯޓަށް ދުވާލަކު ދެތިން ފްލައިޓު ޖައްސަ އެވެ.
ހަނިމާދޫ އެއާޕޯޓު ތަރައްގީކުރުމުގެ ބިޔަ ޕްރޮޖެކްޓެއް މިހާރު ވެސް އެތަނުގައި އެބަ ހިންގަ އެވެ.
