އިޒްރޭލު ޕާސްޕޯޓުގައި ރާއްޖެ އެތެރެ ނުވެވޭ ގޮތް ހެދުމަށް އިމިގްރޭޝަން ގާނޫނު އިސްލާހު ކުރުމަށް ހުށަހެޅި ބިލުގެ މަސައްކަތް ސަލާމަތީ ހިދުމަތްތަކާ ބެހޭ ކޮމިޓީ އިން ނުކުރާ ސަބަބު ހޯދަން އެ ބިލު ހުށަހެއްޅުވި ގަލޮޅު ދެކުނު ދާއިރާގެ މެންބަރު މީކާއިލް ނަސީމް މިއަދު އެދިވަޑައިގެންފި އެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް އިދިކޮޅު އެމްޑީޕީގެ މެންބަރު މީކާއިލް ފޮނުއްވި ސިޓީގައި ވިދާޅުވީ މެއި 29، ގައި މަޖިލީހަށް ހުށަހެޅި އެ ބިލު ޖޫން 10، ގައި ބަލައިގަތުމަށް ފާސްކޮށް ކޮމިޓީއަށް ފޮނުވާފައިވީ ނަމަވެސް ބިލުގެ އެއްވެސް މަސައްކަތެއް ކޮމިޓީގައި ކުރިއަށް ނުދާ ކަމަށެވެ.
"މި ބިލު ކޮމިޓީގައި އޮންނަތާ 59 ދުވަސް ވެގެންދިޔައިރު ވެސް، މި ބިލުގެ އެއްވެސް މަސައްކަތެއް ކުރިއަށް ނުގޮސް، އެންމެ ކުޑަމިނުން މި ބިލުގެ މަސައްކަތް ކޮމިޓީގައި އެޖެންޑާ ވެސް ނުކޮށް ސަބަބު ސާފުކޮށްދިނުން އެދެން،" މީކާއިލްގެ ސިޓީގައި ވިދާޅުވި އެވެ.
އެ ބިލު ހުށަހަޅުއްވަމުން މީކާއިލް ވިދާޅުވީ ބިލުގެ މަގުސަދަކީ ދިވެހިރާއްޖޭން ވެސް އިޒްރޭލާ ދެކޮޅަށް ފެންހިފޭ ފިޔަވަޅުތަކެއް އެޅުން ކަމަށެވެ. އެއީ އޭނާ ވިދާޅުވި ގޮތުގައި އިޒްރޭލުގެ އަނިޔާވެރިކަން ދެނެގަނެ، ބައިނަލް އަގުވާމީ މުޖުތަމައުން ވެސް އެކަން ފާހަގަކުރަމުން ގެންދާތީ އެވެ.
އެ ބިލު މަޖިލީހަށް ބަލައިގަތީ އެކަމާ މެދު ގޮތެއް ނިންމަން އެ ދުވަހު ނެގި ވޯޓުގައި ބައިވެރިވެވަޑައިގެންނެވި 88 މެންބަރުންގެ އިއްތިފާގުންނެވެ. އެ ބިލު 241 ކޮމިޓީއަށް ދިރާސާކުރަން ހުށަހެޅުމަށް ހުށަހެޅުއްވީ ޕީއެންސީގެ ޕީޖީ ލީޑަރު މެންބަރު އިބްރާހިމް ފަލާހެވެ. އެ ހުށަހެޅުއްވުމަށް ތާއީދު ކުރެއްވީ މަޖިލީހުގެ ނައިބު ރައީސް އަހްމަދު ނާޒިމް އެވެ.
އޭގެ ފަހުން ސަރުކާރުން ވެސް ވަނީ އިޒްރޭލުގެ ޕާސްޕޯޓު މަނާ ކުރާނެ ކަމަށް ބުނެފަ އެވެ. ނަމަވެސް އޭގެ އެއްވެސް މަސައްކަތެއް މިހާތަނަށް ނުކުރެ އެވެ.
އިޒްރޭލު ޕާސްޕޯޓު މަނާކުރަން ރާއްޖެއިން ނިންމުމުން ދުނިޔޭގެ އެކި ކަންކޮޅުގައި ދިރިއުޅޭ އެކި ގައުމުތަކުގެ އާންމުން ވަނީ ރާއްޖެއަށް ތައުރީފުކޮށްފަ އެވެ. ނަމަވެސް އެކަން ރަސްމީކޮށް ކުރުމަށް އެއްވެސް ކަމެއް ކުރަމުން ނުދާތީ ގިނަ ބައެއްގެ ފާޑުކިޔުން ސަރުކާރަށް ވަނީ އަމާޒުވެފަ އެވެ.
