ޓެކްސީ ޑުރައިވަރުންގެ ޑިމާންޑުތަކަށް އެއްބަސްވެ ސަރުކާރުގެ ޓެކްސީ ލައިނެއް ތައާރަފު ކުރުމަށް ނިންމި ނިންމުން ބަދަލު ކޮށްފި އެވެ.
މާލެ ސަރަހައްދުގައި ސަރުކާރުގެ ޓެކްސީ ލައިނެއް ތައާރަފު ކުރަން ނިންމާފައިވާކަން ސަރުކާރުން އިއުލާނު ކުރީ މާލެފަހި ޕްރޮގުރާމު އިފުތިތާހު ކުރުމަށް ޖުލައި 25، ގައި ބޭއްވި ޖަލްސާގަ އެވެ.
އެ ނިންމުމާ ދެކޮޅު ހަދައި މާލޭގައި ޓެކްސީ ދުއްވާ ޑުރައިވަރުން މިއަދު ހުޅުމާލޭގައި މުޒާހަރާ ވެސް ކުރި އެވެ. އިރު ވެސް އޮއްސުނު ފަހުން އެ މުޒަހަރާ ނިންމައިލީ އެމީހުންގެ ޑިމާންޑުތަކަށް ސަރުކާރުން އެއްބަސްވުމުން ކަމަށް ޓެކްސީ ޑުރައިވަރުން ބުންޏެވެ.
"މުޒާހަރާ ނިންމާލީ މިހާރު ޓެކްސީ ލައިން ތައާރަފު ނުކުރަން ނިންމީމަ، އޭގެ ސްޓަޑީއެއް ހަދަން ފަށާ ގޮތަށް ނިންމީ،" މާލޭގައި ޓްކްސީއެއް ދުއްވާ މިސްބާހު ޝަރީފް ބުންޏެވެ.
ޓްރާންސޮޕޯޓު މިނިސްޓަރީއާ އެކު ކުރިއަށް ގެންދިޔަ ބައްދަލުވުމުގައި މިނިސްޓަރީން އެއްބަސްވީ ޓެކްސީ ހިދުމަތް ދޭ ގޮތާ ގުޅޭ ދިރާސާއެއް ކުރަން ކަމަށް މިސްބާހު ބުންޏެވެ. އެ ދިރާސާއަށް ފަހު ބާ ކާރުތަކުގައި ޓެކްސީ ހިދުމަތް ދޭ މީހުންނަށް ވަކި އުސޫލެއްގެ ދަށުން ސަރުކާރުން ކާރު ފޯރުކޮށްދޭން ވެސް އެއްބަސްވި ކަމަށް މިސްބާހު ބުންޏެވެ.
"[ސަރުކާރުގެ ޓެކްސީ ލައިން ފަށަން ބޭނުން ކުރަން އުޅުނު] އެ ކާރުތަކަކީ ހިލޭ ލިބިފައި ހުރި ކާރުތަކެކޯ ސަރުކާރަށް، ދެން ބާ ކާރު ގެންގުޅޭ މީހުންނަށް އެ ކާރުތައް ދޭން ނިންމާފައި ހުރީ، މިނިސްޓަރީން ބުނީ ދިރާސާ ފަށާނަމޯ ސެޕްޓެމްބަރު އެކެއްގައި،" މިސްބާހު ބުންޏެވެ.
އޭގެ އިތުރުން ދުއްވައި ނިމުމަށްފަހު ރޭގަނޑު މާލޭގައި ޕާކު ކޮށްފައި ހުންނަ ޓެކްސީތައް ޓޯ ނުކުރާނެ ކަމުގެ ޔަގީންކަން ވެސް މިނިސްޓަރީން ދިން ކަމަށް މިސްބާހު ބުންޏެވެ.
ސަރުކާރުން ޓެކްސީ ލައިނެއް ތައާރަފު ކުރުމަށް ނިންމުމުން އެކަމަށް އާންމުން ވަރަށް ތާއީދުކޮށް ޝުއޫރު ފާޅުކުރި އެވެ. ޓެކްސީގެ ހިދުމަތް މާލޭގައި ދޭ ގޮތާ މެދު އާންމުންގެ ހިތްހަމަ ނުޖެހުން އަބަދުވެސް އޮވެ އެވެ.
އެ މައްސަލަތަކަށް ހައްލެއް ހޯދައިދިނުމަށް ކޮންމެ ސަރުކާރަކުން ވެސް މަސައްކަތް ކުރެ އެވެ.
