ޓްރާންސްޕޯޓް މިނިސްޓްރީން ހުއްދަ ނަގައިގެން ހިންގާ ޓެކްސީ ސެންޓަރުތަކުގައި 50 ކާރާއި ޑްރައިވަރުން ހަމަނުވާނަމަ އެ ޓެކްސީ ސެންޓަރެއްގެ ހުއްދަ ބާތިލުކުރެވޭ ގޮތަށް ޓެކްސީ ގަވާއިދު ބަދަލުކޮށް ގެޒެޓުކޮށްފި އެވެ.
ޓެކްސީ ސެންޓަރު ހިންގުމަށް ހުންނަން ޖެހޭ ޝަރުތުތައް ހިމަނައި އިއްޔެ ގަވާއިދަށް ބައެއް ބަދަލުތައް ވަނީ ގެނެސްފަ އެވެ. އެ ޝަރުތުތަކަކީ؛
- މީހުން ދިރިއުޅޭ ތަންތަނާ ވަކިން ވަދެނުކުމެވޭ ގޮތަށް ގާއިމުކޮށްފައިވާ ތަނަކަށް ވުން
- ޓެކްސީ ސެންޓަރު ހިންގުމަށް ބޭނުންވާ ލެޕްޓޮޕް/ކޮމްޕިއުޓަރު، ޕްރިންޓަރު ފަދަ ވަސީލަތްތައް ގާއިމުކޮށްފައިވުން
- ޓެކްސީ ސެންޓަރުގެ ލައިސަންސް ކޮޕީއާއި ވިޔަފާރި ރަޖިސްޓަރީގެ ކޮޕީ ފެންނަ ގޮތަށް ބަހައްޓާފައިވުން
- ޓެކްސީ ސެންޓަރަށް ޒިޔާރަތްކުރާ ޓެކްސީ ޑްރައިވަރުންނާއި އާންމު ފަރާތްތަކަށް އިށީނދެ ތިބެވޭނެ ގޮތަށް އިންތިޒާމުކޮށްފައިވާ، އިށީނދެ އުޅެވޭ ސަރަހައްދެއް ހުރުން
- ޓެކްސީ ސެންޓަރުގެ ފޯނު އޮޕަރޭޓަރަށް ފަސޭހަކަމާއެކު މަސައްކަތްކުރެވޭނެ ގޮތަށް ޑިޒައިންކޮށްފައިވާ ވޯކް ސްޓޭށަނެއް ގާއިމުކޮށްފައިވުން
- ޓެކްސީ ސެންޓަރާއި ޓެކްސީ ޑްރައިވަރުންނާ ދެމެދު މުވާސަލާތުކުރުމަށް ބޭނުންކުރާ މުވާސަލާތީ ނިޒާމު ގާއިމުކޮށްފައި އޮތުން
- ޓެކްސީ ސެންޓަރަކީ 24 (ސައުވީސް) ގަޑިއިރު ހިދުމަތްދޭ ތަނަކަށްވާތީ، އޮފީހުގައި މަސައްކަތްކުރާ ފޯނު އޮޕަރޭޓަރުންގެ ޑިއުޓީ ރޯސްޓަރ ފަސޭހައިން ފެންނާނޭހެން ބަހައްޓައިފައި ހުރުން
- ގްރޭޓަރ މާލެ ސަރަހައްދުގައި އޮޕަރޭޓްކުރަން ރަޖިސްޓަރީކުރާ ޓެކްސީ ސެންޓަރެއް ނަމަ، އެ ސެންޓަރުގައި ރަޖިސްޓަރީކުރުމަށް ލިސްޓުކޮށްފައިވާ ޓެކްސީކުރުމަށް ބޭނުންކުރެވޭނެ 50 (ފަންސާސް) އުޅަނދު އޮތުން
- ޓެކްސީ ސެންޓަރުގައި ރަޖިސްޓަރީކުރުމަށް ލިސްޓުކޮށްފައިވާ ޓެކްސީކުރުމަށް ބޭނުންކުރެވޭ އުޅަނދު ދުއްވުމުގެ ލައިސަންސް ލިބިފައިވާ، މަދުވެގެން 50 (ފަންސާސް) ޑްރައިވަރުން ތިބުން
އެ ޝަރުތުތައް ހަމަނުވާ ސެންޓަރުތައް ނުވަތަ ސެންޓަރެއްގެ ޝަރުތު އުނިވެއްޖެ ނަމަ އެ ޝަރުތެއް ފުރިހަމަ ކުރަން 60 ދުވަސް ދޭންވާނެ ކަމަށް ވަނީ ގަވާއިދުގައި ހިމަނާފަ އެވެ.
ގަވާއިދަށް އިތުރު ކުރި މާއްދާގައި ވާގޮތުން އެ މުއްދަތުގައި ޝަރުތުތައް ފުރިހަމަނުކުރެވޭނަމަ ލައިސެންސް ބާތިލުކުރެވޭނެ އެވެ. އަދި ހަމަ އެ ސެންޓަރެއްގައި ރަޖިސްޓަރީކޮށްފައިވާ ނުވަތަ ލިސްޓުކޮށްފައިވާ ޓެކްސީތަކަށް ދޫކޮށްފައިވާ ކާރު ޓެކްސީ ލައިސަންސް ބާތިލުވާނެ ކަމަށް ވެސް ގަވާއިދުގައި ވަނީ ހިމަނާފަ އެވެ.
ޓެކްސީ ސެންޓަރު ހިންގުމުގެ ގަވާއިދު ހަރުކަށިކޮށްފައި މިވަނީ ސަރުކާރުން ޓެކްސީ ވިޔަފާރީގެ ތެރެއަށް ވަނުމުގެ އެންމެ ފަހުގެ މަރުހަލާގައި އޮއްވަ އެވެ.
