ޓެކުހުގައި ގޮތުގަޔާއި އެހެނިހެން ގޮތް ގޮތުން އެކި ފަރާތްތަކުން ދައުލަތަށް ދައްކަން ޖެހި ނުދައްކައި އޮތް 15.4 ބިލިޔަން ރުފިޔާ ހޯދުން ނޫން އެހެން ގޮތެއް ނެތް ކަމަށް ރައްޔިތުންގެ މަޖިލީހުގެ ދިއްގަރު ދާއިރާ މެންބަރު އަދި މަޖިލީހުގެ ނައިބުރައީސް އަހުމަދު ނާޒިމް މިއަދު ވިދާޅުވެއްޖެ އެވެ.
ނާޒިމު މިއަދު އާއްމުކުރެއްވި ތަފާސް ހިސާބުތައް ދައްކާގޮތުން ޓެކުހުގެ ގޮތުގައި ވިޔަފާރިވެރިންނާއި ފަރުދުން ދައުލަތަށް ދައްކަން ޖެހޭ 7.76 ބިލިއަން ރުފިޔާ ނުދައްކައި އެބަ އޮތެވެ. އަދި އެހެނިހެން ގޮތް ގޮތުން ދައްކަން ޖެހި ނުދައްކައި އޮތް 7.68 ބިލިއަން ރުފިޔާ އާ އެކު ވިޔަފާރިތަކާއި ފަރުދުން ދައުލަތަށް ދައްކަން ޖެހޭ ޖުމްލަ 15.4 ބިލިޔަން ރުފިޔާ އޮތީ ނުލިބި އެވެ.
އެ ހިސާބުތަކަކީ ނާޒިމް ވިދާޅުވި ގޮތުގައި މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން މަޖިލީހުގެ މާލިއްޔަތު ކޮމިޓީއާ ހިއްސާކޮށްފައިވާ ހިސާބުތަކެކެވެ.
"މިކަމުގައި ދެވަނަ ގޮތެއް ނެތް، މި ފައިސާ އަޅުގަނޑުމެން ޖެހޭނީ ހޯދަން،" އެ ތަފާސް ހިސާބުތައް ސޯޝަލް މީޑިއާ އެކްސްގައި ހިއްސާކުރައްވަމުން ނާޒިމު ވިދާޅުވި އެވެ.
އެ ފައިސާއަކީ ޖޫރިމަނާ އާއި އިންޓްރެސްޓާ އެކު ދައުލަތަށް އެކި ތަންތަނުން ދައްކަން ޖެހޭ ފައިސާ އެވެ. އޭގެ ތެރެއިން ބިލިއަނުން ފައިސާ ދައްކަން ޖެހެނީ ލޭންޑް ރެންޓް އަދި ސީއެސްއާރް، ޖީއެސްޓީ، ޓީޖީއެސްޓީ އަދި ކޯޕަރޭޓް އިންކަމް ޓެކްސް ގޮތުގަ އެވެ.
ޓެކުހުގެ އާމްދަނީ ގޮތުގައި ދައުލަތަށް ލިބެން ޖެހޭ ފައިސާގެ ތަފުސީލް:
- އެއާޕޯޓް ޓެކްސް އަދި ފީ - 414،215،088.35ރ.
- ބޭންކް އިންކަމް ޓެކްސް - 15،900.97ރ.
- ބިޒްނަސް ޕްރޮފިޓް ޓެކްސް - 416،945،529.37ރ.
- ކޯޕަރޭޓް އިންކަމް ޓެކްސް - 1،120،058،469.24ރ.
- އެމްޕްލޯޔީ ވިތުހޯލްޑިން ޓެކްސް - 13،393،625.68ރ.
- ގްރީން ޓެކްސް - 289،400،238.71ރ.
- ޖީއެސްޓީ - 3،334،841،606.56ރ.
- ނޮން ރެސިޑެންޓް ވިތުހޯލްޑިން ޓެކްސް - 118،327،426.49ރ.
- ޕްލާސްޓިކް ބޭގް ފީ - 110،396،320ރ.
- ޕާސަނަލް އިންކަމް ޓެކްސް - 53،046،665.11ރ.
- ޓީޖީއެސްޓީ - 1،675،009،896.03ރ.
- ވިތުހޯލްޑިން ޓެކްސް - 218،204،349.60ރ.
ނޮން ޓެކުހުގެ ގޮތުގައި ދައުލަތަށް ލިބެން ޖެހޭ ފައިސާގެ ތަފުސީލް:
- ލޭންޑް ރެންޓް އެންޑް ސީއެސްއާރް - 6،930،422،451.78ރ.
- ލޯންގް ޓާމް އެގްރިކަލްޗާ ލީޒް - 80،542،558.69ރ.
- ނޮން ޓެކްސް ރެވެނިއު - އެހެނިހެން - 670،706،457.72ރ.
ޓެކުހުގެ ގޮތުގައި ޖުމްލަ ދައުލަތަށް ލިބެން ޖެހޭ ފައިސާ:
- ޓެކުހުގެ ގޮތުގައި ލިބެން ޖެހޭ ފައިސާ - 7،765،932،393.43ރ.
- ނޮން ޓެކުހުގެ ގޮތުގައި ލިބެން ޖެހޭ ފައިސާ - 7،679،594،190.86
- ޖުމްލަ - 15،445،526،584.29ރ.
ރިސޯޓުތަކާއި ވިޔަފާރިތަކުން ބިމު ކުއްޔާއި ޓެކްސްގެ ގޮތުގައި ދައްކަން ޖެހި ނުދައްކާ ހުރި ފައިސާގެ އަދަދު 13 ބިލިއަން ރުފިޔާ އަށް އަރާ ކަމަށާއި ކޯޓަށް ގޮސްގެން ވިޔަސް އެ ފައިސާ ހޯދާނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެފައިވެ އެވެ.
"މި ފައިސާ އެކަނި ހޯދިޔަސް އަޅުގަނޑުމެންގެ ދަރަނީގެ މައްސަލަ ހައްލުވީ،" ސަރުކާރުގެ މާލީ ހާލަތު ގޯހުން ގޯހަށް ދާ ދަނޑިވަޅުގައި އެކަން ފޫބެއްދުމުގެ ގޮތުން ފައިސާ ހޯދަން ފަށާފައިވާ މަސައްކަތާ ގުޅޭ ގޮތުން ރައީސް ވިދާޅުވި އެވެ.
އެ ފައިސާ ހޯދަން ސިޓީ ފޮނުވަން ފަށާފައިވާ ކަމަށާއި މިދިޔަ ހަފުތާގައި ވެސް ބައެއް ފަރާތްތަކުން ފައިސާ ދެއްކި ކަމަށް ރައީސް ވިދާޅުވި އެވެ. ލިބެން ހުރި އެ ފައިސާގެ ދެ ބައިކުޅަ އެއްބައި ކޯޓަށް ނުގޮސް ލިބޭނެ ކަމަށް ގަބޫލު ކުރެއްވޭ ކަމަށް އެ މަނިކުފާނު ރޭ ވިދާޅުވި އެވެ.
އޭގެއިތުރުން ދެފުށް ފެންނަ ޓްރާންސްޕޭރަންޓު ސަރުކާރެއް ގާއިމު ކުރާނެ ކަމަށާއި އެކަމަށްޓަކައި ފިނޭންސް މިނިސްޓްރީން އާންމު ފަރާތްތަކާއި ވިޔަފާރިތަކަށް ދައްކަންޖެހޭ ބިލުތަކުގެ ތަފްސީލްތައް އެންމެންނަށް ފެންނާނެ ގޮތް ވެސް ހައްދަވާނެ ކަމަށް ރައީސް މުއިއްޒު ވިދާޅުވި އެވެ.
