ޕެރިސް (ޖޫން 4) - މިހާރު ކުރިއަށްދާ ފްރެންޗް އޯޕަން ގްރޭންޑް ސްލޭމް ޓެނިސް މުބާރާތުގެ ކުއާޓާ ފައިނަލުން ފުރުސަތު ލިބިފައިވީ ނަމަވެސް، އަނިޔާއާ ހެދި އިތުރަށް ކުރިއަށް ދެވެން ނެތުމުން، ދުނިޔޭގެ އެއް ވަނަ ނޮވަކް ޖޮކޮވިޗް މުބާރާތުން ވަކިވެއްޖެ އެވެ.
ކަނާތު ކަކުލަށް ލިބިފައިވާ އަނިޔާއާ އެކު ވެސް ޖޮކޮވިޗް، 37، ވަނީ، ފްރެންޗް އޯޕަންގެ ހަތަރު ވަނަ ބުރުގައި، ފަހަތުން އަރައި، ހިތްވަރުގަދަ ކުޅުމެއް ދައްކައި، އާޖެންޓީނާގެ ފްރަންސިސްކޯ ސެރުންޑޯލޯ އަތުން މޮޅުވެފަ އެވެ. އެ މެޗުގައި ޖޮކޮވިޗް ކުޅުނީ ކަކުލުގައި ޓޭޕްކޮށްގެންނެވެ.
މެޗަށް ފަހު، ޖޮކޮވިޗް ވަނީ، މުބާރާތުގައި އިތުރަށް ކުރިއަށް ނުދެވިދާނެ ކަމުގެ އިޝާރާތެއް ދީފަ އެވެ. މިއަދު، ހެދި ސްކޭންތަކަށް ފަހު އެނގުނީ، ޖޮކޮވިޗްގެ ކަނާތު ކަކުލުގެ މެނިސްކަސް އިރައިގެން ގޮސްފައިވާ ކަމެވެ. އެހެންވެ، އޭނާ މެޑިކަލް ޓީމާ މަޝްވަރާ ކުރުމަށް ފަހު ނިންމާފައިވަނީ އިތުރަށް ކުރިއަށްނުދިއުމަށެވެ. އަދި ބުދަ ދުވަހު، ނޯވޭގެ ކެސްޕާ ރޫޑާ ދެކޮޮޅަށް ކުޅެން އޮތް ކުއާޓާ ފައިނަލް މެޗު، ޖޮކޮވިޗް ވަނީ ދޫކޮށްލައިފަ އެވެ.
ފްރެންޗް އޯޕަންގެ މި ހިސާބުން ވަކިވުމުން، ޖޮކޮވިޗަށް ދުނިޔޭގެ ރޭންކިންގެ އެއް ވަނަ ގެއްލޭނެ އެވެ. އެއް ވަނަ އަށް ދެން އަރާނީ އިޓަލީގެ އެއް ވަނަ ތަރި، ޖަނިކް ސިނާ އެވެ.
ޖޮކޮވިޗަށް ލިބިފައިވާ މި އަނިޔާއިން ރަނގަޅުވެ، އަންނަ މަހުގެ އެއް ވަނަ ދުވަހު ފަށާ ވިމްބަލްޑަން ޓެނިސް މުބާރާތަށް އޭނާ އެކަށީގެންވާ މިންވަރަށް ފިޓްވެދާނެތޯ ސުވާލު އުފެދެ އެވެ. ޖޮކޮވިޗް ވަނީ އެ މުބާރާތް ހަތް ފަހަރު ކާމިޔާބުކޮށްފަ އެވެ.
އެކަަމަކު، ރިޕޯޓްތައް ބުނާގޮތުން، ޖޮކޮވިޗްގެ ވިސްނުމަކަށްވާނީ، ވިމްބަލްޑަން އަށް އެއްކޮށް ފިޓްނުވާނަމަ އެ މުބާރާތް ދޫކޮށްލުމަށް ފަހު، އަންނަ މަހު 26 ގައި ފްރާންސްގެ ޕެރިހުގައި ފަށާ އޮލިމްޕިކްސް އަށް ފިޓްވުމެވެ. ގްރޭންޑް ސްލޭމް ޓެނިސްގެ 24 ތަށި ހޯދައިގެން ރެކޯޑެއް ގާއިމްކޮށްފައި އޮތް ޖޮކޮވިޗްގެ ކާމިޔާބު ކެރިއަރުގައި މަދުވަނީ، އޮލިމްޕިކްގެ ޓެނިސް އިވެންޓުން ރަން މެޑަލެކެވެ.
