2 ފެބުރުވަރީ 2024 - 16:45 0
ނިމާ ހަސަން
ފިޝަރީޒް މިނިސްޓަރު އަހުމަދު ޝިޔާމް; މިވަގުތަށް ނުދެވި ހުރީ 190 މިލިއަން ރުފިޔާ ކަމަށް ވިދާޅުވި -- ފޮޓޯ: އިޔާން/ އަދަދު
2 ފެބުރުވަރީ 2024 - 16:45 0
މަސްވެރިންނަށް ނުދެވި ހުރި ފައިދާގެ އަދަދު 190 މިލިއަން ރުފިޔާއަށް އަރާ ކަމަށާއި އެ ފައިސާ ދިނުމަށް ސަވަރިން ގެރެންޓީ ދީގެން ވެސް ފެސިލިޓީއެއް ހޯދުމުގެ މަސައްކަތް ކުރަމުންދާ ކަމަށް މަސްވެރިކަމާ ބެހޭ ވަޒީރު އަހުމަދު ޝިޔާމް ވިދާޅުވެއްޖެ އެވެ.
ޝިޔަމް ވިދާޅުވީ, ނިމިދިޔަ ސަރުކާރުން ފައިސާ ޗާޕުކުރުމާއި މާލީ ޑިސިޕްލިން ގެންގުޅުނު ގޮތުން އެތެރެއިން އަދި ބޭރުން ވެސް ފެސިލިޓީއެއް ހޯދުމުގައި ގޮންޖެހުން ހުރި ކަމަށެވެ. ނަމަވެސް ސަރުކާރާއި މިފްކޯއިން އެ މަސައްކަތް ކުރަމުންދާ ކަމަށް ވިދާޅުވި އެވެ.
"މަސްވެރިންނަށް ނުދެވި މިވަގުތަށް 190 މިލިއަނެއްހާ ރުފިޔާ ހުރިކަން ހިސާބުތައް އެބަބުނޭ. ސަރުކާރު އަދި މިފްކޯއިން ދަނީ ރައީސުލްޖުމްހޫރިއްޔާގެ އެދިވަޑައިގަތުމަށް ސަވަރިން ގެރެންޓީދީގެން ވެސް ފެސިލިޓީއެއް ހޯދުމުގެ މަސައްކަތް ބާރަށް ކުރަމުން،" ޝިޔާމް ވިދާޅުވި އެވެ.
އޭނާ ވިދާޅުވީ މި ދުވަސްވަރު މަސްވެރިކަން ރަނގަޅުވުމުން, ކޮންމެ ދުވަހަކުވެސް މަސްވެރިންނަށް ދޭން ޖެހޭ ފައިސާގެ އަދަދު އިތުރުވަމުންދާ ކަމަށެވެ. އެހެންކަމުން 190 މިލިއަނަކީ އެގޮތަށް އިތުރުވާ އަދަދުތައް ޖުމްލަ ކުރުމަށްފަހު ނުދެވި ހުރި ފައިސާ ކަމަށެވެ.
"ޔަގީން ކުރަނީ ލަސްތަކެއްނުވެ މިހާރު ހުރި ބެކްލޮގް އެއްކޮށްފިލުވާލެވި ބަރާބަރަށް މަސްވެރިންނަށް ފައިސާ ދެވިގެން ދިއުން،" އޭނާ ވިދާޅުވި އެވެ.
ޝިޔާމް ވިދާޅުވީ, މަސްވެރިންނަށް ދޭންޖެހޭ ފައިސާ ނުދެވި ލަސްވެ, އާއިލާތަކުގެ ޒަރޫރީ ބޭނުންތައް ނުފުއްދި ދުވަސްތައް ގުނަންޖެހުމަކީ ލިބޭ ވަރަށް ބޮޑު ހިތްދަތިކަމެއް ކަމަށެވެ.
ޝިޔާމް ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމާ ހަވާލުވެ ވަޑައިގެންނެވިއިރު މަސްވެރިންނަށް ދޭންޖެހޭ 250 މިލިޔަނެއްހާ ރުފިޔާ އޮތް ކަމަށެވެ. އެހެންކަމުން ވަރަށްބޮޑު އިސްކަމެއް ދެއްވައިގެން މިހާތަނަށް މިފްކޯއިން ސަރުކާރުގެ އެހީތެރިކަމާއެކު 276 މިލިއަނަށްވުރެ ބޮޑުއަދަދެއް މަސްވެރިންނަށް ހަލާސް ކުރެވިފައިވާކަން އޭނާ ފާހަގަކުރެއްވި އެވެ.
Comment