ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް އަރާފައިވާ "ވިގަނީގެ ކަންކަން ނުނިމެނީސް" މި ފަހަރު ކުރަމުން އަންނަ މަސައްކަތް ހުއްޓާލުމެެއް ނެތް ކަމަށް އެފްއޭއެމް އިންތިހާބުގައި ވާދަކުރަން ނިންމާފައިވާ، އެ އެސޯސިއޭޝަންގެ ކުރީގެ ރައީސް ތޯރިގު (ޓޮމް) ވިދާޅުވެއްޖެ އެވެ.
އެފްއޭއެމް އިން ގަވާއިދާ ހިލާފަށް ކަންކަން ކުރަމުން އަންނާތީ، ކޮމިޝަނާ އޮފް ސްޕޯޓްސް، މުހައްމަދު ތޮލާލް، ވަނީ އަންނަ މަހުގެ 31 ވަނަ ދުވަހު ބާއްވަން ތާވަލުކޮށްފައިވާ އެފްއޭއެމްގެ އިންތިހާބުގެ ކަންކަން މަޑުޖައްސާލަން އަންގައިފަ އެވެ.
އެ އިންތިހާބުގައި ވާދަކުރަން ހުޅުވާލި ފުރުސަތުގައި، މުއްދަތު ހަމަވުމުގެ ކުރިން، ކެންޑިޑެސީ ފޯމު ހުށަހެޅީ، އެފްއޭއެމްގެ ކުރީގެ ރައީސް، ރައްޔިތުންގެ މަޖިލީހުގެ އދ. މަހިބަދޫ ދާއިރާގެ މެމްބަރު ތޯރިގުގެ އިތުރުން، އެފްއޭއެމްގެ އެންމެ ފަހުން ދެ ދައުރުގެ ރައީސް، ބައްސާމް އަދީލް ޖަލީލްގެ އެކްސްކޯ މެމްބަރު، ކްލަބް އީގަލްސްގެ ވައިސް ޗެއާމަން، މުފާވިޒް ހާޝިމް (މުފާ) އެވެ.
އެފްއޭއެމް ރައީސް ކަމަށް ކުރިމަތިލާން ކެންޑިޑެސީ ހުށަހަޅާއިރު، ފުރަތަމަ ޑިވިޝަނުގެ ތިން ޓީމެއްގެ ތާއީދު އޮތްކަން ކަށަވަރުކުރަން ޖެހެ އެވެ. ވެެލެންސިއާގެ ބޯޑް މެމްބަރުންގެ ރިޒޮލިއުޝަނަކުން (މެޖޯރިޓީ މެމްބަރުންގެ ތާއީދާ އެކު) ފާސްކޮށްފައިވާ ނިންމުމަކީ، ތޯރިގު އަށް ތާއީދު ކުރުމަށެވެ.
އެހެންވެ، ތޯރިގުގެ ފޯމު ހުށަހަޅަން އޭނާއާ އެކު، ވެލެންސިއާގެ ޗެއާމަން، ކުރީގެ ނޫސްވެރިޔާ، އަބްދުﷲ އަޒްމީން ވެސް ވަޑައިގެންނެވި އެވެ.
ތޯރިގުގެ ފަހުން، ކެންޑިޑެސީ ހުށަހެޅި މުފާ އަތުގައި ވެސް ވެލެންސިއާގެ ތާއީދު ސިޓީއެއް އޮތެވެ.
އެފްއޭއެމްގެ އިލެކްޓޯރިއަލް ކޮމިޓީ އަށް އެކަން ސާފުކޮށްދޭން، ވެލެންސިއާ އިން ވަނީ މިއަދު ސިޓީއެއް ފޮނުވައިފަ އެެވެ. އެ ސިޓީގައި ވަނީ، ތޯރިގު އަށް ތާއީދުކުރަން ދީފައިވާ ސިޓީގެ އިތުރުން، ދެން އޮތް ސިޓީގެ މައްސަލަ ކޮމިޝަނާ އޮފް ސްޕޯޓްސް އާއި ޕޮލިހަށް ހުށަހަޅާފައިވާ ކަމަށް ބުނެފަ އެވެ.
ތޯރިގު، ތުހުމަތު ކުރެއްވި ގޮތުގައި، މުފާ އަށް ތާއީދުކޮށް، ވެލެންސިއާ އިން ސިޓީ ހޯދީ "ބިރުދައްކައިގެން" ކަމަށެވެ.
"ކުލަބު ވެލެންސިޔާގެ ލިޔުމެއްކަމަށް ދެއްކުމަށް ސޮއިކުރުމުގައި އެކުލަބެ ބައެއް ބޯޑު މެންބަރުން އަށް ބިރުދައްކައިގެ ފަތިސްގަޑީގައި ސޮއި ހޯދިކަމުގެ މައުލޫމާތު ލިބިފައިވާތީ އެ މައްސަލަޔާއި ވެލެންސިޔާގެ ލިޔުމެއް ފޯޖްކުރި މައްސަލަ ތަޙްޤީޤްކޮށް ދިނުމަށް ފުލުހަށް ހުށަހަޅާނަން.،" ތޯރިގު، އޭނާގެ ރަސްމީ ފޭސްބުކްގައި ލިޔުއްވި އެވެ.
"ފުޓްބޯޅަ އެސޯސިއޭޝަނަށް އަރާފައިވާ ވިގަނީގެ ކަންކަން ނުނިމެނީސް މިފަހަރު ހުއްޓާލުމެެއްނެތް،"
ތޯރިގު، މި ގޮތަށް ވާހަކަ ދެއްކެވީ، އެފްއޭއެމްގެ ރައީސްގެ މަގާމުގައި ހުންނަވައިގެން، ބައްސާމް އަމިއްލަ އަށް ނުފޫޒުގެ ބޭނުންކޮށްގެން ކަންކަންކުރާތީ، އެ އަށް އިޝާރާތްކޮށް ކަމަށް ބެލެވެ އެވެ. އެފްއޭއެމްގެ އިންތިހާބުގައި މި ފަހަރު، ތޯރިގުއާ ވާދަކުރައްވާ މުފާގެ ޓީމުގައި ބައްސާމާ އެކު މަސައްކަތްކުރި ގިނަ ފަރާތްތަކެއް ހިމެނޭއިރު، ބައްސާމްގެ ތާއީދު ވެސް އޮތީ އެ ޓީމަށެވެ. ވެލެންސިއާ އަކީ ބައްސާމްގެ ކޮންޓްރޯލްގައި މިދިޔަ އަހަރުތަކުގައި އޮތް ޓީމެކެވެ. އެފްއޭއެމްގެ ރައީސް ކަމަށް ބައްސާމް ގެންނަން މަގުކޮށަައިދިނީ ވެލެންސިއާ އިންނެވެ.
އެފްއޭއެމްގެ ރައީސްގެ މަގާމުގައި ތޯރިގު ހުންނެވިއިރު، އޭނާ އަށް އެ މަގާމު ގެއްލުނީ އޭރު ޖެނެރަލް ސެކްރެޓަރީ އަކަށް ހުރި ބައްސާމާ އުފެދުނު ހިޔާލު ތަފާތުވުމެއްގެ ތެރޭގަ އެެވެ.
އެފްއޭއެމްގެ ރައީސްގެ މަގާމުގައި، ތޯރިގު މަސައްކަތް ކުރެއްވީ 2016 ވަނަ އަހަރުގެ މެއި މަހު 30 ވަނަ ދުވަހު ބޭއްވި އިންތިހާބު ކާމިޔާބު ކުރައްވައިގެންނެވެ. އެއީ، ތިން މަހާ ކުޑަ ދުވަސްކޮޅެއް ވަންދެނެވެ.
އެ ގޮތުން، 2016 ވަނަ އަހަރުގެ ސެޕްޓެމްބަރު މަހު ތެރޭގައި ޓޮމްއާ އެކު، އިންތިހާބުވި އެގްޒެކްޓިވް ކޮމިޓީ (އެކްސްކޯ)ގެ ފަސް މެމްބަރުން އިސްތިއުފާ ދިނުމާ އެކު، އެ އެސޯސިއޭޝަންގެ އަސާސީ ގަވާއިދު ބުނާގޮތަށް އިންތިހާބެއް ބާއްވަން ޖެހުނެވެ. އެ އިންތިހާބުގައި ޓޮމްއާ ވާދަކުރައްވައި، ކާމިޔާބު ހޯދީ މިހާރު އެ އެސޯސިއޭޝަންގެ ރައީސް ބައްސާމް އަދީލް ޖަލީލް އެވެ. ބައްސާމް ދެ ވަނަ ދައުރު ފުރިހަމަ ކުރަމުން ދަނިކޮށް، ހިންގާ ކޮމިޓީގެ މެޖޯރިޓީ މެމްބަރުން ވަނީ އިސްތިއުފާ ދީފަ އެވެ.
ބައްސާމްގެ ދެ ވަނަ ދައުރު މިހާރު ހިނގަމުން އަންނައިރު، ހިންގާ ކޮމިޓީގެ ފަސް މެމްބަރުން ވަނީ އިސްތިއުފާ ދީފަ އެވެ. އެއާ އެކު، ނުވަ މެމްބަރުންގެ މައްޗަށް އެކުލެވޭ އެކްސްކޯގެ މެޖޯރިޓީ ގެއްލި، ބައްސާމްގެ ހިންގާާ ކޮމިޓީ އުވުނީ އެވެ.
އެކަމަކު، މަގާމުގައި ދެމިހުންނަން ބައްސާމްގެ ފަރާތުން ދިފާއުގައި ދައްކާ ވާހަކަ އަކީ، އަދިވެސް ހިންގާ ކޮމިޓީގައި ފަސް މެމްބަރުން ތިބި ކަމަށް ބުނެ އެވެ. އެކަމަކު، އެންމެ ފަހުން ހިންގާ ކޮމިޓީ އަށް އައްޔަންކުރި، އަބްދުﷲ ޝިބާއު (ޝިބާ) އެ މަގާމަށް ގެންނަން އަސާސީ ގަވާއިދު ބުނާ ކަންކަން ފުރިހަމަ އަށް ކޮށްފައިނުވެ އެެވެ. މި މައްސަލަ ކޮމިޝަނާ އޮފް ސްޕޯޓްސް އިން އަންނަނީ ބަލަމުންނެވެ.
