ސްރީ ލަންކާގެ ނެޝަނަލް/ނެޝަނަލް ޖޫނިއާ ޝޯޓްކޯސް ފެތުމުގެ މުބާރާތުން ރާއްޖޭގެ ރިހާން ޝިޔާމް އާއި ލޫތު މުހައްމަދު ހުސެއިން ލޯ މެޑަލް ހޯދައިފި އެވެ.

ލަންކާގެ ކެންޑީ ހިލްވުޑް ކޮލެޖް ސްވިމިން ޕޫލުގައި ކުރިއަށްދާ މި މުބާރާތުން ރިހާން މެޑަލް ހޯދީ 400 މީޓަރު މެޑްލީ ރޭހުންނެވެ. އަށް ފެތުންތެރިންނާ ވާދަކޮށް ރިހާން ތިން ވަނަ ހޯދީ ފަސް މިނިޓް، 03.53 ސިކުންތުން ރޭސް ނިންމައިގެންނެެވެ.

މިއީ، ބައިނަލްއަގުވާމީ ލެވަލްގައި ރިހާން ހޯދި ފުރަތަމަ މެޑަލެވެ.

ލޫތު، މެޑަލް ހޯދާފައިވަނީ 200 މީޓަރު ބްރެސްޓް ސްޓްރޯކް ރޭހުންނެވެ. ޖުމްލަ އެކު، ނުވަ ފެތުންތެރިން ވާދަކުރި މި ރޭހުން ލޫތު ތިން ވަނަ ހޯދާފައިވަނީ، ދެ މިނިޓް، 50.43 ސިކުންތުން ރޭސް ނިންމައިގެންނެވެ. މިއީ، ލޫތަށް ބައިނަލްއަގުވާމީ ލެވަލްގައި ލިބުނު ފުރަތަމަ މެޑަލް އެވެ.

އިއްޔެ، ގައުމީ ޖޫނިއާ ފިރިހެން ރިލޭ ޓީމުން ވަނީ 100 މީޓަރު ފްރީސްޓައިލް ރިލޭ އިން ރިހި މެޑަލް ހޯދައިފަ އެވެ. އަދި ފިރިހެން ސީނިއާ ޓީމުން ވަނީ 50 މީޓަރު ފްރީސްޓައިލް ރިލޭ ރޭހުން ލޯ މެޑަލް ހޯދައިފަ އެވެ.

އިއްޔެގެ ތިން މެޑަލާ އެކު، ލަންކާ މުބާރާތުގައި ރާއްޖޭން ހޯދި މެޑަލްގެ އަދަދު ހަޔަކަށް އެރީ އެވެ.

މީގެ ކުރިން، ރާއްޖޭގެ މެރާލް އައިން ލަޠީފު، 100 މީޓަރު ބަޓަފްލައި އިވެންޓުން ރަން މެޑަލް ހޯދިއިރު، ޖޫނިއާ ފިރިހެން ރިލޭ ޓީމުން 4 ގުނަ 100 މީޓަރު މެޑްލީ ރިލޭއިން ރިހި މެޑަލް އަދި ސީނިއާ ފިރިހެން ރިލޭ ޓީމުން 4 ގުނަ 100 މީޓަރު މެޑްލީ ރިލޭއިން ލޯ މެޑަލް ހޯދައިފަ އެވެ.

މި މަހު 26 އިން ފެށިގެން 30 އާ ހަމައަށް ކުރިޔަށްދާ މި މުބާރާތުގައި ރާއްޖޭގެ ފެތުންތެރިން ދެން ވާދަކުރަނީ ޖޫނިއާ ނެޝަނަލް ފިރިހެން އަދި ނެޝަނަލް އަންހެން ފިރިހެން ބައިގަ އެވެ. މި ހަތަރު ބައިގައި އެކު ޖުމުލަ ދިވެހި 25 ފެތުންތެރިން މިމުބާރާތުގައި ވާދަކުރެ އެވެ.