ފުރަތަމަ ޑިވިޝަނުގައި ހޭދަކުރި 19 އަހަރު ތެރޭ، ރާއްޖޭގެ ނަން މަޝްހޫރު ގިނަ ކްލަބްތަކެއްގެ ކެޕްޓަން ބޭންޑް އަޅައިގެން، ލީޑަރެއްގެ ރޯލުގައި، ޑިފެންޑަރެއްގެ ގޮތުގައި ކުޅެވޭނީ ޔަގީނުން ވެސް ބުރަ މަސައްކަތުންނެވެ. ހުނަރު ހުރެގެންނެވެ. ގިނަ ބަޔެއްގެ އިތުބާރު ހޯދައިގެންނެވެ. ފެންވަރު ސާބިތުކޮށްދޭން ކެރިގެން ކަންކަމާ ކުރިމަތިލައިގެންނެވެ. އެ ފަދަ، ލެވަލެއްގައި ގިނަ އަހަރުތަކެއްގައި ހުރީ، ސ. ފޭދޫ އަށް ނިސްބަތްވާ އަބްދުﷲ ހަނީފް (ބެންޖޯ) އެވެ.

އެކާވީސް ވަނަ ގަރުނުގައި ރާއްޖޭގެ މަތީ ފަންތީގެ ފުޓްބޯޅައިގައި ކުޅުނު އިތުބާރު އެއް ޑިފެންޑަރު، ބެންޖޯ، ފުރަތަމަ ޑިވިޝަނުގެ ފުޓްބޯޅަ ކެރިއަރަށް، އަލްވަދާއު ކިޔާނެ މެޗަކީ، މާދަމާ ހަވީރު، އެމްޑަބްލިއުއެސްސީ ދިވެހި ޕްރިމިއާ ލީގުގައި ކްލަބް އީގަލްސް އާއި މާޒިިޔާ ސްޕޯޓްސް އެންޑް ރެކްރިއޭޝަން ވާދަކުރާ މެޗުންނެވެ.

ބެންޖޯ، 39, ފުޓްބޯޅަ ކެރިއަރަށް ނިމުން ގެންނަން ކަނޑައެޅިއިރު، ދެން ދާނެ މިސްރާބެއް ވެސް އޮތީ ކަނޑައަޅައިފަ އެވެ. އެ ގޮތުން، ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި، މޯލްޑިވްސް ޑިމޮކްރަޓިކް ޕާޓީ (އެމްޑީޕީ) އިން ފޭދޫ ދެކުނު ދާއިރާ އަށް ކުރިމަތިލާނެކަން ބެންޖޯ ވަނީ އިއުލާނުކޮށްފަ އެވެ.

އީގަލްސްގެ ޕްރެކްޓިހެއްގެ ތެރެއިން ބެންޖޯ: އޭނާ ވަނީ ކެރިއަރުގައި ތިން ފަހަރެއްގެ މަތިން އީގަލްސް އަށް ކުޅެފައި.--- ފޮޓޯ: މުހައްމަދު ޝާބިން/ އަދަދު

"އަސްލު ފުޓްބޯޅައިގައި ވަރަށް ގިނަ ކަންކަން ކުރެވިއްޖެ، މަޝްހޫރު ގިނަ ކްލަބްތަކެއްގެ ކެޕްޓަނެއްގެ ގޮތުގައި ވަރަށް ރަނގަޅު ކާމިޔާބީތަކެއް ހޯދިއްޖެ، ދެން ފުޓްބޯޅަ ހަޔާތް ނިމުމަކަށް ގެންނަން ބޭނުންވީ. ދެން، މި ނިންމީ ސިޔާސީ ދާއިރާގައި ވެސް ގައުމީ ހިދުމަތެއް ކުރަން،" ރާއްޖޭގެ ފުރަތަމަ ޑިވިޝަނުގައި ނުވަ ކްލަބަކަށް ކުޅެފައިވާ، ބެންޖޯ، "އަދަދު" އަށް ބުންޏެވެ.

ތޭވީސް އަހަރުން ދަށުގެ ގައުމީ ފުޓްބޯޅަ ޓީމާއި ސީނިއާ ގައުމީ ފުޓްބޯޅަ ޓީމަށް ވެސް ކުޅެފައިވާ ބެންޖޯ، އަކީ އެކާވީސް ވަނަ ގަރުނަށް ބަލާއިރު، ރާއްޖޭގެ ފުރަތަމަ ޑިވިޝަނުގައި މެދުކެނޑުމެއްނެތި އެންމެ ގިނަ އަހަރު ކުޅުނު އެއް ކުޅުންތެރިޔާ އެވެ.

ބެންޖޯގެ ފުޓްބޯޅަ ކެރިއަރުގެ އުސްއަލިތައް

ޒުވާން އުމުރުގައި ފުޓްބޯޅަ އަށް ހިތްޖެހި، ކޮންމެ ދުވަަހަކު ހެން ކުޅެން ދިޔައިރު ވެސް ބެންޖޯގެ ވިސްނުމަކީ ރާއްޖޭގެ އެންމެ މަތީ ފަންތީގައި އޭނާގެ ފުޓްބޯޅަ ހުނަރު ސާބިތުކޮށްދިނުމެވެ.

އެ ގޮތުން، 2004 ވަނަ އަަހަރު، ބެންޖޯގެ ފުޓްބޯޅަ ކެރިއަރު ފެށީ، ފުރަތަމަ ޑިވިޝަނުގައި ވަރުގަދަ ބާރެއްގެ ގޮތުގައި ފެނިގެންދިޔަ، ހުއްރިއްޔާ ސްޕޯޓްސް ކްލަބް (ހުރާ) އިންނެވެ.

ޖެހިގެން، އައި އަހަރު އޭނާ ފެނުނީ، އައިލެންޑް ފުޓްބޯލް ކްލަބް (އައިއެފްސީ) އިންނެވެ. އަނެއްކާ ވެސް ހުރާ އަށް ބަދަލުވެ، 2005 ވަނަ އަހަރު އެ ޓީމަށް ކުޅުނު ބެންޖޯ، ދެން ބަދަލުވީ ވެސް އައިއެފްސީ އަށެވެ.

ބެންޖޯ (ކ) ހުރާ އަށް ކުޅުނު މެޗެއްގެ ތެރެއިން.--- ފޮޓޯ: ހަވީރު

އައިއެފްސީ ރީބްރޭންޑް ކުރުމަށް ފަހު، ވީބީ ސްޕޯޓްސް ކްލަބަށް ބަދަލުވުމަށް ފަހު، އެ ޓީމަށް ކުޅުނުއިރު، ބެންޖޯ ވަނީ އެ ޓީމުގެ ކެޕްޓަނެއްގެ ގޮތުގައި ފާހަގަވެފަ އެވެ. ރާއްޖޭގެ ނަން މަޝްހޫރު ގިނަ ކުޅުންތެރިންތަކެއް ވީބީ ޖޯޒީގައި ކުޅުނުއިރު ވެސް ޓީމުގެ ކެޕްޓަނަކަށް ހުރީ ބެންޖޯ އެވެ. ބެންޖޯ ވަނީ، 2007-2011 އަށް ވީބީ ސްޕޯޓްސް ކްލަބަށް ކުޅެ، ގިނަ ކާމިޔާބީތަކެއް ހޯދައިފަ އެވެ.

ކެރިއަރުގައި ތިން ފަހަރެއްގެ މަތިން އީގަލްސްއާ ގުޅުނު ބެންޖޯ އެންމެ ފުރަތަމަ ފަހަރަށް އީގަލްސް ޖޯޒީގައި ކުޅުނީ 2012 ވަނަ އަހަރު އެވެ. އެ އަހަރު، އީގަލްސް އަށް ކުޅުމަށް ފަހު، ޖެހިގެން އައި ސީޒަނުގައި، (2013 ވަނަ އަހަރު)، ބެންޖޯ ފެނުނީ ކުރިން ވެސް ކުޅުނު ވީބީންނެވެ.

ވީބީ އަށް އެ ސީޒަނުގައި ކުޅުމަށް ފަހު، 2014 އިން 2015 ގެ މެދަކާ ހަމަށް ބެންޖޯ ވަނީ ކްލަބް ވެލެންސިއާ އަށް ކުޅެފަ އެވެ. އެއީ، ކެރިއަރުގައި ވެލެންސިއާ ޖޯޒީގައި ބެންޖޯ ފެނުނު ފުރަަތަމަ ފަހަރެވެ. އެ އަހަރުގެ ބާކީ ބައި ބެންޖޯ ހޭދަކުރީ އީގަލްސްގަ އެވެ. އެއީ، ކެރިއަރުގައި އީގަލްސް އަށް ކުޅުނު ދެ ވަނަ ފަހަރެވެ.

ޖެހިގެން އައި ސީޒަނުގައި، 2016 ވަނަ އަހަރު ބެންޖޯ ކުޅުނީ ނިއު ރޭޑިއަންޓް ސްޕޯޓްސް ކްލަބް އަށެވެ. މާލީ ގޮތުން، ރާއްޖޭގެ އެންމެ ބޮޑު ކްލަބް، ނިއު، އުނދަގޫ ދަނޑިވަޅެއްގައި އޮތުމުން ޓީމުގެ ހާލަތު ދަށްވެފައި އޮތް އެ ސީޒަނުގައި، ނިއުގައި ބެންޖޯ ވަނީ ރަނގަޅު ކުޅުމެއް ދައްކައިފަ އެވެ. ނިސްބަތުން ޒުވާން ކުޅުންތެރިންނާއި ފުރަތަމަ ޑިވިޝަނުގެ ތަޖުރިބާ މަދު ކުޅުންތެރިން ހިމެނޭ ސްކޮޑަކާ އެކު، މަސައްކަތް ކުރަން ޖެހުނުއިރު، ލީޑަރެއްގެ ޒިންމާ ނަގަން ޖެހުނު އެއް ކުުޅުންތެރިއަކީ ބެންޖޯ އެވެ. އެކަން އޭރު އެ ޓީމުގެ އޮފިޝަލުންގެ ގޮތުގައި ތިބި ފަރާތްތަކުން ފާހަގަކުރި އެވެ.

ބެންޖޯ (ކ)، ވީބީ ސްޕޯޓްސް ކްލަބްގެ ކެޕްޓަން ބޭންޑް އަޅައިގެން އޭއެފްސީ ކަޕްގެ މެޗަކަށް ނުކުންނަނީ.--- ފޮޓޯ: ވީބީ ސްޕޯޓްސް ކްލަބް

ޓީސީ ސްޕޯޓްސް ކްލަބަށް ދެ ފަހަރެއްގެ މަތިން، ބެންޖޯ ކުޅުނެވެ. އެ ގޮތުން، އެ ޓީމަށް ފުރަތަމަ، 2017 ވަނަ އަހަރު ކުޅުނުއިރު، އެ ޓީމު ދޫކޮށްލީ 2018 ވަނަ އަހަރަށް ފަހު އެވެ. އޭގެ ފަހުން، 2019 ވަނަ އަހަރު މާޒިޔާ އަށް ބަދަލުވި އެވެ. މާޒިޔާގައި އޮތް ވަރުގަދަ ސްކޮޑަށް ބެންޖޯ އިތުރު ކުރަން ނިންމީ ތަޖުރިބާ އާއި ހުރި ލެވަލަށް ބަލާއިރު، އޭރު އެ ޓީމަށް މުހިންމުވުމުންނެވެ.

އެ ފަހަރު، މާޒިޔާ އަށް ކުޅުމަށް ފަހު، ވަކި ހިސާބަކުން އަލުން ޓީސީ އަށް ބަދަލުވި އެވެ.

ސުޕަ ޔުނައިޓެޑް ސްޕޯޓްްސް (ސަސް) ފުރަތަމަ ޑިވިޝަނަށް ޕްރޮމޯޓްވެ، 2020 ވަނަ އަހަރު، އެ ޓީމުން ޓީމު އެކުލަވާލިއިރު، ބެންޖޯ ވަނީ ކްލަބްގެ ކެޕްޓަނަކަށް ހަމަޖައްސައިފަ އެވެ. ދެ އަހަރު، އެ ޓީމަށް ކުޅުމަށް ފަހު، ބެންޖޯ ވަނީ 2022 ވަނަ އަހަރުގެ ފަހު ކޮޅު، ވެލެންސިއާ އަށް ބަދަލުވެފަ އެވެ. އޭނާ އަލުން، އީގަލްސް އަށް ބަދަލުވީ މި ސީޒަނަށެވެ.

ބެންޖޯގެ ކެރިއަރުގައި ހޯދާފައިވާ ކާމިޔާބީތަކަށް ބަލާއިރު، ހުރާއާ އެކު ދިވެހި ލީގު ކާމިޔާބު ކުރުމާއި ވީބީއާ އެކު ދިވެހި ލީގު ތިން ފަހަރާއި އެފްއޭ ކަޕް ދެ ފަހަރު އަދި ޕްރެޒިޑެންޓްސް ކަޕް އެއް ފަހަރު ހިމެނެ އެވެ. ޓީސީއާ އެކު، ދިވެހި ޕްރިމިއާ ލީގުގެ ޗެމްޕިއަންކަމުގެ އިތުރުން، 2017 ވަނަ އަހަރު ބަންގްލަދޭޝްގައި ބޭއްވި ޝެއިހް ކަމާލް ކަޕް ހިމެނެ އެވެ.

ބެންޖޯ: ޝެއިހް ކަމާލް ކަޕްގެ ޗެމްޕިއަންކަން ޓީސީން ހޯދިއިރު، ޓީމަށް މޮޅު ކުޅުމެއް ދައްކައިދީފައިވޭ.

ޝެއިހް ކަމާލް ކަޕްގައި ޓީސީން ހޯދި ކާމިޔާބީގެ ކްރެޑިޓް އެ ޓީމުގެ އޭރުގެ ކޯޗު މުހައްމަދު ނިޒާމް (ނިޒާމްބެ) ދިނީ މުޅި ޓީމަށެވެ. އެކަމަކު، ވަކި ވަކި ކުޅުންތެރިން ކުރި ހިތްވަރާއި ދެއްކި ނަމޫނާ ފާހަގަކުރިއިރު، ނިޒާމްބެ ވަނީ ބެންޖޯގެ ނަން ފާހަގަކޮށްފަ އެވެ.

ސިޔާސީ ދާއިރާގެ މިސްރާބާއި ފުޓްސަލް ކޯޗިން އިން ވެސް ކުރިއަށްދިއުމުގެ ވިސްނުން

ރަސްމީކޮށް ފުޓްބޯޅަ ކެރިއަރުގައި ފުލްސްޓޮޕް ޖަހައި، ބެންޖޯ މައިގަނޑު ގޮތެއްގައި ދާން ބޭނުންވާ ދާއިރާއެއްގެ ގޮތުގައި އިއުލާނުކޮށްފައި އެ ވަނީ ސިޔާސީ ދާއިރާ އެވެ.

އެކަމަކު، މި ވަގުތު ބެންޖޯ، ހަރަކާތްތެރިކޮށް ފެންނަ އެހެން ރޯލެއް/ދާއިރާއެއް ވެސް އެބައޮތެވެ. އެ ގޮތުން، ބެންޖޯ އަކީ މި ވަގުތު ރާއްޖޭގައި އަރަމުން އަންނަ މޮޅު ފުޓްސަލް ކޯޗުންގެ ތެރެއިން އެކަކެވެ.

ރިސޯޓް ލީގާއި ރިސޯޓް ޗެމްޕިއަންސް ލީގު ޖޯލި ރިސޯޓް އަށް ކާމިޔާބުކޮށްދިން ބެންޖޯ ވަނީ މިދިޔަ ދެ އަހަރު، ރާއްޖޭގެ އެންމެ ގިނަ ދުވަސްވީ ބޮޑު ފުޓްސަލް މުބާރާތް، ކްލަބް މޯލްޑިވްސް ކަޕްގައި، ކްލަބް އިމިގްރޭޝަން އާއި ޔުނައިޓެޑް ބީއެމްއެލްގައި ރަނގަޅު މަސައްކަތެއް ކޮށްފަ އެވެ.

ހާއްސަ ގޮތެއްގައި މި އަހަރު، ކްލަބް މޯލްޑިވްސް ކަޕްގައި ބީއެމްއެލް ގޮވައިގެން، ބެންޖޯ ކުރި މަސައްކަތަށް ގިނަ ބަޔަކު ވަނީ ތައުރީފުކޮށްފަ އެވެ. ބީއެމްއެލްގެ ސްކޮޑުގައި ތިބި ކުޅުންތެރިން ލައިގެން، ބެންޖޯގެ ރޭވުންތެރިކަމާ އެކު، އެ ޓީމު ވަނީ ތަފާތު ނަތީޖާތަކެއް ނެރެފަ އެވެ.

ބެންޖޯ މިހާރު ތައްޔާރުވަމުން އަންނަނީ ރާއްޖޭގައި އެންމެ ބޮޑުކޮށް ބޭއްވޭ ފުޓްސަލް މުބާރާތް، ގޯލްޑަން ފުޓްސަލް ޗެލެންޖްގައި ރ. ދުވާފަރު ޓީމު ގޮވައިގެން ވާދަކުރުމަށެވެ.

"ރަނގަޅު މަސައްކަތެއް ކުރެވޭނެ ޓީމެއް (ދުވާފަރު) އެއީ ވެސް،" ބެންޖޯ ބުންޏެވެ.

ދިވެހި ޕްރިމިއާ ލީގުގެ މެޗެއްގެ ތެރެއިން ބެންޖޯ، ސުޕަ ޔުނައިޓެޑް ސްޕޯޓްސް (ސަސް)ގެ ގޯލަށް އައި ބޯޅައެއް ސަލާމަތްކުރަނީ.--- ފޮޓޯ: އެފްއޭއެމް

"ފުޓްސަލް ކޯޗިން އަކީ ވަރަށް ކުރާ ހިތުން ކުރާ ކަމެއް، އަދި ވަރަށް ރަނގަޅަށް މި ދަނީ، އުންމީދަކީ މިކަމުގެ ތަޖުރިބާވެސް ލިބެމުންދާ ވަރަކަށް ކުރިއަށް ދިއުން،" ބެންޖޯ ބުންޏެވެ.

ސިޔާސީ ދާއިރާ އަށް ދާން ނިންމި މައިގަނޑު ކަމެއްގެ ގޮތުގައި ގައުމަށް އެކި ގޮތްގޮތުން ހިދުމަތް ކުރުމުގައި ދެމިހުރުން ކަމުގައި ބެންޖޯ ވަނީ ފާހަގަކޮށްފަ އެވެ.

ރައްޔިތުންގެ ހީވާގި މަންދޫބެއްގެ ގޮތުގައި، ފޭދޫ ދެކުނު ދާއިރާގެ ގޮނޑިއަށް ވާދަކުރަން ނިންމިއިރު، ބެންޖޯ އަންނަނީ ޒަމާނުއްސުރެ، ޒުވާނުން ބިނާކުރުމާއި ކުޅިވަރުން ފުރުސަތު އިތުރު ތަނަކަށް ފޭދޫ ހެދުމުގެ ގޮތުން މަސައްކަތްތަކެއް ކުރަމުންނެވެ.

ފޭދޫ ސްޕޯޓްސްގެ ރައީސްގެ މަގާމު ވެސް ފުރަމުން އަންނަ ބެންޖޯ އަކީ އެންމެ ފަހުން، އައްޑޫ ސިޓީން ބޭއްވި އައްޑޫ ފުޓްބޯލް ޗެމްޕިއަންޝިޕްގެ ޗެމްޕިއަންކަން ފޭދޫ ސްޕޯޓްސް އިން ހޯދިއިރު، ޓީމުގެ ކެޕްޓަން އެވެ.

އައްޑޫ ފުޓްބޯލް ޗެމްޕިއަންޝިޕްގެ ޗެމްޕިއަންކަން ފޭދޫން ހޯދުމުން ބޭއްވި އުފާފާޅުކުރުމުގެ ތެރެއިން: ބެންޖޯ މުބާރާތުގެ ތަށި އުފުލާލަނީ.

ބެންޖޯގެ އިސްނެގުމާ އެކު، ފޭދޫގައި ކޮންމެ އަހަރަކު އަންނަނީ ރާއްޖޭގައި ބޭއްވޭ އެންމެ ބޮޑު ސްޓްރީޓް މުބާރާތް ކުރިއަށްގެންދަމުންނެވެ. ތަރުހީބު ބޮޑުކޮށް ފެންނަ، އެ މުބާރާތް ބާއްވަމުން އަންނަތާ 10 އަކަށް ވުރެ ގިނަ އަހަރުވެއްޖެ އެވެ.

މީގެ އިތުރުން، ފޭދޫ ސްޕޯޓްސް އިން ހާއްސަ އަހައްމިއްޔަތުކަމެެއް ދީގެން، ރާއްޖޭގެ އެކި އޮފީސްތަކަށް ހުޅުވާލައިގެން މިދިޔަ، އަހަރު ވަނީ ފުޓްސަލް މުބާރާތެއް ފަށައިފަ އެވެ.

"މި ބަލަނީ ހަމައެކަނި ކުޅިވަރުންނެއް ނޫން، މި ފަދަ ކަންކަން، މުޖުތަމައު އަށް ފައިދާ ހުރި އެކި ކަންތައްތައް ކުރެވޭތޯ. އެހެންވެ، ސިޔާސީ ދާއިރާއިން ދާން ނިންމީ،" ބެންޖޯ ބުންޏެވެ.

އީގަލްސް އާއި މާޒިޔާ، މާދަމާ ބައްދަލުކުރާ މެޗަކީ މި ފަަހަރުގެ ލީގު ޗެމްޕިއަން ކަނޑައެޅިގެންދާނެ މެޗެވެ. ލީގު ތާވަލުގެ އެއް ވަނައިގައި މާޒިޔާ އޮތީ 37 ޕޮއިންޓް ހޯދައިގެންނެވެ. ދެ ވަނައިގައި އޮތް އީގަލްސް އަށް ވަނީ 35 ޕޮއިންޓެވެ. މި މެޗު މި ދެޓީމަށް ވަރަށް މުހިންމުވާއިރު، ބެންޖޯ އަށް މި މެޗު ހާއްސަވަނީ މެޗުގެ މުހިންމު ކަމުގެ އިތުރުން، 19 އަހަރުގެ ދިގު ފުޓްބޯޅަ ހަޔާތް ނިމުން ގެނުވާ މެޗަށްވާތީ އެވެ.

އީގަލްސް އިން އެންމެ ފަހުން ކުޅުނު މެޗުތަކުގައި ބެންޖޯ ފެނިފައިނުވެ އެވެ. އޭނާ ބުނީ މި ވަގުތަށް ބަލާއިރު، އެންމެ "ފިޓް" ނޫން ކަމަށެވެ.

އެހެންކަމުން، މާޒިޔާ އާއި އީގަލްސް މާދަމާ ކުޅޭ މެޗުގައި ވެސް މާ ގިނަ މިނިޓެއް ލިބުމުގެ ފުރުސަތެއް ބެންޖޯ އަށް ނެތް ކަމަށް ބެލުމުގެ ހުރިހާ ޖާގައެއް އެބައޮތެވެ. އެކަމަކު، ބެންޖޯ ހުރީ އެ މެޗުގައި ކިތަންމެ ކުޑަ ވަގުތުކޮޅެއް ކުޅެލަން ލިބުނު ކަމުގައި ވިޔަސް އެ ފުރުސަތުގެ ބޭނުން އެންމެ ރަނގަޅު ގޮތުގައި ހިފަން ތައްޔާރަށެވެ. އަބަދުވެސް ކުޅޭ ޓީމެއް މޮޅުވާން ބޭނުންވާތީ އެވެ. ކުރެވުނު ހުރިހާ ކަމެއް ކުރަން ފަސް ޖެހުމެއް ނެތި އެއް އަޒުމެއްގައި ހުންނަން ދަސްވެފައިވެސް އޮތުމުންނެވެ.

"ފާޑުކިޔުން ބަލައިގަންނަން، އަބަދުވެސް މަސައްކަތް މި ކުރަނީ، ވީ އެންމެ ރަނގަޅަށް ކޮންމެ ކަމެއް ކުރަން،" ބެންޖޯ ބުންޏެވެ.