މާލޭގައި މަރުވާ މީހުންގެ ކަށުކަމާކެމީގެ ކަންކަން ކުރަމުން އަންނަ އާސަހަރާގެ މިސްކިތާއި ހިނަވާގެ މަރާމާތު ކުރަން ހަވާލުކުރި ކޮންޓްރެކްޓަރަށް އެ މަސައްކަތުގެ އަގުގެ ތެރެއިން 3.9 މިލިއަން ރުފިޔާ ވެސް ދީފައި ވަނިކޮށް، މަސައްކަތުގެ މެދު ތެރެއިން ކޮންޓްރެކްޓް ބާތިލުކޮށްފި އެވެ.

އާސަހަރާ މިސްކިތުގެ މަރާމާތަށް އެ ސަރަހައްދު ބަންދުކޮށް މަސައްކަތް ފެށީ މިދިޔަ މެއި މަހު އެވެ. އެއިރު ސިޓީ ކައުންސިލުން ބުނި ގޮތުގައި ދެ މަސް ފަހުން މަރާމާތުގެ މަސައްކަތް ނިމިގެން ހިދުމަތް ދެވެން ފެށޭނެ އެވެ.

އެކަމަކު މިއަދާ ހަމައަށް އެ ސަހަރައްދު ރޫޅާލުމުގެ މަސައްކަތާއި ކޮންކްރީޓު ތަނބުތަކެއް ޖެހުމުގެ އިތުރަށް އެއްވެސް މަސައްކަތެއް ކުރެވިފައެއް ނެތެވެ. އަދި ކޮންޓްރެކްޓަރާ އެކު ހަދާފައިވާ އެއްބަސްވުން ބާތިލް ކުރުމަށް ނިންމާފައިވާތީވެ، ތިން ކައުންސިލަރަކު ވަނީ މައުލޫމާތު ސާފުކުރުމަށް އެދި ހުށަހަޅައިފަ އެވެ.

މަޝްރޫއު ކުރިއަށް ދިޔަ ގޮތުގެ ތަފްސީލް ދިނުމަށް އެންމެ ފަހުން ބޭއްވި ސިޓީ ކައުންސިލްގެ ބައްދަލުވުމަށް، އެ މަޝްރޫއުގެ އިދާރީ އަދި ފަންނީ މަސައްކަތްތަކުގައި އުޅޭ މުވައްޒަފުން ވަނީ ކައުންސިލަރުންގެ ޖަލްސާއަށް ހާޒިރުކޮށްފަ އެވެ.

އެ މުވައްޒަފުން، ޖަލްސާގައި މައުލޫމާތު ދިން ގޮތުގައި، ކޮންޓްރެކްޓަރަށް މަސައްކަތް ހަވާލުކުރި ފަހުން މިސްކިތުގެ ޑިޒައިނާއި އާސަހަރާގެ ކުރެހުމަށް ވެސް ބަދަލުތަކެއް ގެންނަން ބޭނުންވެގެން އެ ކަން ކުރިއަށް ގެންދިޔަ ކަމަށެވެ.

މަސައްކަތް މަޑުޖެހިގެން ދިޔުމަށް ދިމާވި އެންމެ ބޮޑު ސަބަބަކީ އެއީ އޭނާ ބުންޏެވެ.

އާސަހަރާ މަރާމާތު ކުރުމުގެ މަސައްކަތުގެ ތެރޭގައި ތަނބުތައް ޖަހާފައި - ފޮޓޯ: އަބްދުﷲ އިޔާން / އަދަދު

އޭނާ ގަބޫލު ކުރާ ގޮތުގައި ފަހުން ގެނައި ބަދަލުތަކާއެކު އޮތް ކުރެހުންތަކަށް ބެލުމުން، ނިމިފައި ވަނީ 45 ޕަސެންޓެވެ. ނަމަވެސް ކޮންޓްރެކްޓަރާ ހަވާލުކުރި އެއްބަސްވުމުގައިވާ މަސައްކަތުގެ 75 ޕަސެންޓް ނިމިފައިވާ ކަމަށް އޭނާ ބުންޏެވެ.

"[ޑިޒައިނަށް ގެނައި ބަދަލުތަކުގެ ސަބަބުން ވެސް] އިތުރު ހަރަދުތަކެއް މީގެ ތެރެއިން ދިޔަ. ވަކި ޝެޑިއުލްއެއް ރެޑީކޮށް ގެނައި ބަދަލުތަކާއެކު ގެންދަން ދެން މަސައްކަތް ކުރަން ޕޭމަންޓްތައް ރިލީޒު ކުރީ،" އިދާރީ މުވައްޒަފުންގެ މޭޒުން ކިޔައިދެމުން ދިޔަ އެވެ.

މި މަސައްކަތަކީ ސިޓީ ކައުންސިލްގެ ޖަލްސާއަކުން ފާސްކޮށްގެން، ކުރިއަށް ގެންދިޔަ މަޝްރޫއެކެވެ. މަޝްރޫއަށް ކައުންސިލުން ފާސްކުރި ބަޖެޓަކީ 4.9 މިލިއަން ރުފިޔާ އެވެ. މިހާރު ކުރެވިފައިވާ މަސައްކަތްތަކަށް، ކޮންޓްރެކްޓަރަށް 3.9 މިލިއަން ރުފިޔާ ވަނީ ކޮންޓްރެކްޓަރަށް ދީފަ އެވެ.

އާސަހަރާއި މިސްކިތުގެ މަރާމާތުގެ މަސައްކަތް މަޑުޖެހިފައި - ފޮޓޯ: އަބްދުﷲ އިޔާން / އަދަދު

މަޝްރޫއު ގެންދިޔަ ކައުންސިލްގެ ބިއުރޯ މުވައްޒަފުން ބުނި ގޮތުގައި ކުރިން އަންދާޒާ ނުކުރެވޭ ބައެއް ހަރަދުތައް ވެސް ހިނގާފައިވެ އެވެ. އަދި އޭގެ ސަބަބުން ވެސް މަޝްރޫއަށް އިތުރު ލަސްތަކެއް އައި ކަމަށް ބުންޏެވެ.

"ކުރެހުމަށް ގެނައި ބަދަލުތަކާއި ކަންމަތި ތަޅާލިއިރު އެމްޑަބްލިއުއެސްސީގެ ޕަމްޕު ސްޓޭޝަނެއް ހުރުމުން އެ ކަން ހައްލުވީ 20 ދުވަސް، ސްޓެލްކޯގެ ކަރަންޓު ބޯޑެއް ވެސް ހުރޭ، ފާރުގެ އެ ބައި ތަޅައިނުލެވި އޮތީ." ބިއުރޯގެ މުވައްޒަފު ބުންޏެވެ.

އާސަހަރާގެ މަރާމާތަށް ކައުންސިލުން ފާސްކުރި ބަޖެޓުން އެއް މިލިއަން ރުފިޔާ ފިޔަވައި ދެން ހުރި ފައިސާ ހަރަދުކޮށްގެން ހަމައެކަނި ކޮންކްރީޓު ތަނބުތަކެއް ޖެހިފައިވާތީ، ބައެއް ކައުންސިލަރުން ޖަލްސާގައި ކަންބޮޑުވުން ފާޅުކޮށްފައި ވެ އެވެ.

މަސައްކަތް ހަވާލުކުރި ކޮންޓްރެކްޓަރަކީ ކޮބައިކަން، ޖަލްސާއިން ސާފެއް ނުވެ އެވެ. މި ކަމުގައި ސިޓީ ކައުންސިލްގެ ރަސްމީ ބަހެއް އަދި ނުލިބެ އެވެ.