ގައުމީ އަންހެން ފުޓްބޯޅަ ޓީމުގެ ކޯޗަކަށް ކުރިން ހުރި ސާބިއާގެ ޑޭވޯ ބާބާ އަށް ދޭން ފީފާ އިން އެފްއޭއެމަށް އެންގި ފައިސާ ދައްކައިފި އެވެ.
ޑޭވޯ، ރާއްޖޭގެ އަންހެން ޓީމާ ހަވާލުވީ މި އަހަރު ޖެނުއަރީ މަހުގަ އެވެ. އެއް އަހަރުގެ ކޮންޓްރެކްޓެއްގައި އޭރު ސޮއިކުރި ނަމަވެސް ހަތަރު މަސް ތެރޭ ބާބާ ގައުމީ ޓީމާ ވަކިވި އެވެ. އެހެންވެ، އޭނާ ނިންމީ ފީފާ އަށް މައްސަލަ ހުށަހަޅައިގެން ކުރިއަށްދާށެވެ.
ބާބާ ފީފާ އަށް މައްސަލަ ހުށަހެޅިއިރު، އެދިފައިވަނީ ލިބުނު ގެއްލުމުގެ ބަދަލާ އެއްކޮށް، އެފްއޭއެމް އަތުން 75،300 ޑޮލަރު (1.16 މިިލިއަން ރުފިޔާ) ހޯދުމަށެވެ.
އެކަމަކު، އެ މައްސަލައިގައި ފިފާގެ ޗެމްބަރުން މިދިޔަ އޮގަސްޓް މަހު މައްސަލަ ނިންމުމަށް ފަހު އެފްއޭއެމަށް އެންގީ 45 ދުވަހުގެ ތެރޭގައި 39،919.34 ޑޮލަރު (615،556 ރުފިޔާ) ދެއްކުމަށެވެ. އެއީ ހުރިހާ ފަރާތަކެއްގެ ވެސް ވާހަކަތައް އަޑު އެހުމަށް ފަހު ފީފާ ޗެމްބަރުން ނިންމި ނިންމުމެކެވެ.
މި ކަމުގެ މައުލޫމާތު ހުރި އޮފިޝަލަކު "އަދަދު" އަށް ބުނީ ފީފާ ޗެމްބަރުގެ އެ އެންގުމާ އެއްގޮތަށް، އެފްއޭއެމުން މިހާރު ވަނީ ބާބާ އަށް ދޭން ޖެހޭ ފައިސާ ފޮނުވައިފައި ކަމަށެވެ.
ގައުމީ އަންހެން ޓީމުގެ ކޯޗަކަށް ބާބާ ހަމަޖެއްސިއިރު، އޭނާއާ އެފްއޭއެމްގެ ރައީސް ބައްސާމް (ކ) ސަލާމްކުރަނީ.
ގައުމީ އަންހެން ފުޓްބޯޅަ ޓީމުގެ ކޯޗަކަށް ބާބާ ހުރިއިރު ވަނީ ތިން މެޗެއްގައި ޓީމަށް އިރުޝާދުދީފަ އެވެ. އެއީ މި އަހަރު ކުރީކޮޅުގައި މާލޭގައި ސީޝެލްސްއާ ދެކޮޅަށް ކުޅުނު ދެ މެޗާއި ސައުދީ އަރަބިއްޔާއާ ބައްދަލުކުރި މެޗެވެ. ސީޝެލްސް އަތުން ފުރަތަމަ މެޗުގައި 1-0 އިން މޮޅުވިއިރު، ދެ ވަނަ މެޗުން ސީޝެލްސް ވަނީ 4-0 އިން ރާއްޖެ ބަލިކޮށްފަ އެވެ. ސައުދީ އަތުން ރާއްޖެ ބަލިވީ 2-0 އިންނެވެ.
ކޯޗު ބާބާ އަށް އެފްއޭއެމުން ފައިސާ ދައްކާފައިވާއިރު، ކުރިން ގައުމީ ޓީމުގެ ކޯޗަަކަށް ހުރި ނެދަލެންޑްސްގެ މާޓިން ކޫޕްމަން އާއި 23 އަހަރުން ދަށުގެ ކޯޗަކަށް ހުރި ރެނޭ ހިޑިންކް އަދި ސީނިއާ ޓީމުގެ އެސިސްޓަންޓް ކޯޗަކަށް ހުރި ޕޯޗުގަލްގެ ސިމާއޯ ކޮސްޓާ ވަނީ އެފްއޭއެމާ ދެކޮޅަށް ފައިސާ ހޯދަން ފީފާ އަށް މައްސަަލަ ހުށަހަަޅައިފަ އެވެ.
ކޫޕްމަން އާއި ރެނޭ އަށް ދޭން ޖެހޭ ފައިސާ ދައްކަން ވެސް ފީފާ އިން ވަނީ އެފްއޭއެމަށް އަންގައިފަ އެވެ. ރެނޭ އަށް ދޭން ޖެހޭ ފައިސާގެ ޖުމްލަ އަދަދު 2.9 މިލިއަން ރުފިޔާ (187,375 ޑޮލަރު) އަށް އަރަ އެވެ. ކޫޕްމަން އަށް ދޭން ޖެހޭ ފައިސާގެ އަދަދުތަކެއް މީޑިއާގައި ހާމަކޮށްފައެއް ނުވެ އެވެ.
ކުރެއްދޫ ރިސޯޓްގައި މިދިޔަ އަހަރު ކުޅުނު 1.2 މިލިއަން ރުފިޔާގެ އަގުބޮޑު ފުޓްބޯޅަ މެޗުން މޮޅުވުމުން ރާއްޖޭގެ ގައުމީ ފުޓްބޯޅަ ޓީމަށް ލިބުނު ފައިސާ، އެފްއޭއެމުން ކުޅުންތެރިންނާ ހަވާލުނުކުރާތީ ކުޅުންތެރިން އަންނަނީ ކަންބޮޑުވުން ފާޅުކުރަމުންނެވެ. އެ ފައިސާ ދޭން އެފްއޭއެމް އިން އެންމެ ފަހުން ބުނި މުއްދަތު ތެރޭގައި ވެސް އެކަން އެ ގޮތަށް ކުރެވިފައިނުވެ އެވެ.
މީގެ އިތުރުން އެފްއޭއެމުން ކަރަންޓް ބިލަށް ފައިސާ ނުދައްކާތީ، ދާދި ފަހުން ސްޓެލްކޯ އިން ވަނީ އެފްއޭއެމް ބިލްޑިން އިން ކަރަންޓް ކަނޑާލައިފަ އެވެ. ކަރަންޓް ބިލްތަކަށް ޖުމްލަ، 6.5 މިިލިއަން ރުފިޔާ އަރަ އެވެ.
އެފްއޭއެމްގެ މާލީ މުއާމަލާތްތަކެއްގެ މައްސަލަތަކެއް ކޯޓުގައި ވެސް ކުރިއަށްދަމުން އަންނައިރު، ކޯޓުން ވަނީ ހުކުމް ވެސް ކޮށްފަ އެވެ. އެ ގޮތުން ދާދި ފަހުން ސިވިލް ކޯޓުން ވަނީ އޭޑީކޭ ހޮސްޕިޓަލަށް 1.7 މިލިއަން ރުފިޔާ ދައްކަން އެފްއޭއެމަށް އަންގައިފަ އެވެ.
އޭގެ އިތުރުން ވެސް އެފްއޭއެމާއި އެކިއެކި ފަރާތްތަކާ ދެމެދު ހިނގާފައިވާ މާލީ މުއާމަލާތްތަކުގެ މައްސަލަތަކެއްގައި އެ ފަރާތްތަކުން އަންނަނީ އެފްއޭއެމާ މަޝްވަރާ ކުރަމުންނެވެ. އެ ގޮތުން އެޕޯލޯ ހޯލްޑިންގްސް އަށް އެފްއޭއެމުން ދައްކަން ޖެހޭ 40 ވަރަކަށް މިލިއަން ރުފިޔާގެ ބޮޑު ދަރަންޏެއް އަދާނުކުރެވިގެން އޭގެ ބަދަލުގައި، ހުޅުމާލޭގައި ގާއިމްކޮށްފައިވާ ފުޓްބޯޯލް ސްކޫލްގެ ބިމެއް ވަނީ 25 އަހަރަށް އެޕޯލޯ ހޯލްޑިންސް އަށް ކުއްޔަށް ދީފަ އެވެ.
