ބަންގްލަދޭޝްގެ ވެރި ރަށް ޑާކާގައި މާދަމާ ފަށާ "ޓެކްނޯ ސާފް ޗެމްޕިިއަންޝިޕް 2026" އަށް ރާއްޖޭގެ ގައުމީ ފުޓްބޯޅަ ޓީމުގެ ސްކޮޑު ފައިނަލްކޮށް، މުބާރާތަށް ފުރައިފި އެވެ.
އިންޑޮނޭޝިއާ ކޭމްޕް ނިންމާލުމަށް ފަހު، ރާއްޖެ އެނބުރި އައިސް ގައުމީ ޓީމު މިއަދު 23 ކުޅުންތެރިންގެ ފައިނަލް ސްކޮޑާ އެކު ވަނީ ޑާކާ އަށް ދާން ފުރައިފަ އެވެ. މި ފަހަރު ރާއްޖޭގެ ސްކޮޑުގައި މުޅިން އަލަށް މި މުބާރާތުގައި ކުޅޭ 11 ކުޅުންތެރިން ހިމެނެ އެވެ.
އެ ގޮތުން، ސްކޮޑުގައި ހިމެނޭ މުޅިން އަލަށް ސާފް ޗެމްޕިއަންޝިޕްގައި ކުޅޭނެ ކުޅުންތެރިންނަކީ، އޮޑި ސްޕޯޓްސް ކްލަބްގެ އަހުމަދު އައިހަމް (އައިހު)، މުޒްދާން ހަސަން، މުހައްމަދު އަޝްވާން އަދި އަހުޒަމް ރަޝީދު (އަހު)، މާޒިޔާ ސްޕޯޓްސް އެންޑް ރެކްރިއޭޝަންގެ އަބްދުﷲ ލޫތު އިބްރާހިމް (ސާނޭ) އާއި ނައްސާހު އިބްރާހިމް ނާސިރު، ވިކްޓަރީ ސްޕޯޓްސް ކްލަބްގެ އަހުމަދު މާއިޝް ރަޝީދު (މާއި)، ނިއު ރޭޑިއަންޓް ސްޕޯޓްސް ކްލަބްގެ އީތަން އިބްރާހިމް ޒަކީ، މުހައްމަދު ނާއިމް، ޓީސީ ސްޕޯޓްސް ކްލަބްގެ ހަސަން އީނާޒް އަދި ބުރު ސްޕޯޓްސް ކްލަބްގެ އަލީ ހަމްދާން (އައްޔަ) އެވެ.
މީގެ ތެރެއިން ގިނަ ކުޅުންތެރިންނަށް ވަނީ ގައުމީ ޓީމުގެ ޕްރިލިމިނަރީ ސްކޮޑުން ފުރުސަތު ލިބި ފައިނަލް ސްކޮޑުން ޖާގަ ގެއްލިފަ އެވެ. އެ ގޮތުން، 2021 ވަނަ އަހަރުގެ ސާފް ޗެމްޕިއަންޝިޕްގައި ވާދަކުރުމުގެ ކުރިން، ގަތަރުގައި ކުރިއަށްެގެންދިޔަ ޓްރެއިިނިން ކޭމްޕެއްގައި ނާއިމް އަށް އަނިޔާވެ، އެ ފަހަރުގެ މުބާރާތުން ފުރުސަތު ގެއްލުނެވެ. އަހު އާއި ނައްސާހު އަދި އީތަން ވަނީ މި އަހަރު ރާއްޖޭގައި ބޭއްވި 20 އަހަރުން ދަށުގެ ސާފް ޗެމްޕިއަންޝިޕްގައި ކުޅެފަ އެވެ.
ސަމޫހު އަލީ (ސަމުއްޓެ)ގެ ކެޕްޓަންކަމުގައި ކުޅޭ ރާއްޖޭގެ ޓީމުގައި މި ފަހަރު ހިމެނޭ އެންމެ ތަޖުރިބާކާރު ކުޅުންތެރިއަކީ އަލީ ފާސިރު (ސެންޓޭ) އެވެ. މިއީ، ސެންޓޭގެ ހަތް ވަނަ ސާފް ޗެމްޕިއަންޝިޕް އެވެ. އޭނާ އަންނަނީ، 2011 ވަނަ އަހަރުން ފެށިގެން ސާފް ޗެމްޕިއަންޝިޕްގެ މުބާރާތްތަކުގައި ގަވާއިދުން ކުޅެމުންނެވެ.
ޓްރެއިނިން ކޭމްޕްގައި ބައިވެރިވި ކުޅުންތެރިންގެ ތެރެއިން ފައިނަލް ސްކޮުޑުން ޖާގަ ގެއްލުނީ ތޯއިފް ގާސިމް (ތޯއްޕެ) އަށެވެ. އަނެއްކޮޅުން، ތަޖުރިބާކާރު ޑިފެންޑަރު، އަމްދާން އަލީ (އެންޑީ)، ސާފް ޗެމްޕިއަންޝިޕްގައި މި ކުޅެނީ 2015 ވަަނަަ އަހަރުގެ ފަހުން ފުރަތަމަ ފަހަރު އެވެ. އެ އަހަރުގެ ސާފް ޗެމްޕިއަންޝިޕްގެ ގްރޫޕް ސްޓޭޖުގައި އިންޑިއާ އަތުން 3-2 އިން ރާއްޖެ ބަލިވިއިރު، އިންޑިއާ ކޮޅަށް ރާއްޖޭގެ ދެ ވަނަ ލަނޑު ޖެހީ އެންޑީ އެވެ.
ސާފް ޗެމްޕިއަންޝިޕްގެ ތަށި ދެ ފަހަރު ހޯދި ރާއްޖޭން. މި ފަހަރުގެ މުބާރާތުގައި ކުޅެން ޖެހެނީ ޕާކިސްތާނާއި އިންޑިއާއާ އެއް ގްރޫޕެއްގަ އެެވެ. ރާއްޖޭގެ ފުރަތަމަ މެޗު އާދިއްތަ ދުވަހު އޮތީ ޕާކިސްތާނާ ދެކޮޅަށެވެ. އަދި، ދެ ވަނަ މެޗު، އަންނަ ހަފްތާގެ ބުދަ ދުވަހު އޮތީ އިންޑިއާއާ ދެކޮޅަށެވެ.
ސާފް ޗެމްޕިއަންޝިޕަށް ރާއްޖޭގެ ފައިނަލް ސްކޮޑު
ސަމޫހު އަލީ - ސަމުއްޓު (މާޒިޔާ)، ހުސެއިން ޝަރީފް - ހުސެން (މާޒިޔާ)، އިބްރާހިމް އައިސަމް (މާޒިޔާ)، އަހުމަދު މާއިޝް ރަޝީދު - މާއި (ވިކްޓަރީ)، އަބްދުﷲ ލޫތު އިބްރާހިމް - ސާނޭ (މާޒިޔާ)، އިބްރާހިމް ވަހީދު ހަސަން - އިއްބެ (އޮޑި)، އަލީ ހަމްދާން - އައްޔަ (ބުރު)، އަލީ ފާސިރު - ސެންޓޭ (ނިއު)، އަހުމަދު އައިހަމް - ފަތޯ (މާޒިޔާ)، ހުސެއިން ސިފާއު ޔޫސުފް - ކުރޯ (ވިކްޓަރީ)، ހަސަން އީނާޒް - ބަކާ (ޓީސީ)، ނިޝާމް މުހައްމަދު ރަޝީދު - ޕޮގްބާ (މާޒިޔާ)، މުހައްމަދު އަޝްވާން (އޮޑި)، އަމްދާން އަލީ - އެންޑީ (ނިއު)، އިބްރާހިމް މަހުދީ ހުސެއިން - ފޭދޫ އިއްބެ (މާޒިޔާ)، އަހުމަދު އައިހަމް - އައިހު (އޮޑި)، މުޒްދާން ހަސަން (އޮޑި)، ނައްސާހު އިބްރާހިމް ނާސިރު (މާޒިޔާ)، އަހުޒަމް ރަޝީދު - އަހު (އޮޑި)، މުހައްމަދު ނާއިމް (ނިއު)، އީތަން އިބްރާހިމް ޒަކީ (ނިއު)، މުހައްމަދު ޝަފީއު - ޗެކް (ވިކްޓަރީ)، ނާއިޒު ހަސަން - ދާދު (ވިކްޓަރީ)
ރާއްޖޭގެ ކޯޗަކީ ހަންގޭރީގެ އިސްޓަވާން އުރްބާނީ އެވެ. އޭނާ ވަނީ މީގެ ކުރިން ރާއްޖެ އަށް ދެ ފަހަރެއްގެ މަތިން ކޯޗުކޮށްދީފަ އެވެ. އެ ފަހަރުތަކުގައި ވެސް ސާފް ޗެމްޕިއަންޝިޕްގެ އެކި މުބާރާތްތަކުގައި މަސައްކަތްކުރި އެވެ. އެ ގޮތުން، 2009 ވަނަ އަހަރު ބަންގްލަދޭޝްގައި ބޭއްވި ސާފް ޗެމްޕިއަންޝިޕްގެ ފައިނަލަށް ރާއްޖޭން ދަތުރުކުރީ އުރްބާނީގެ ކޯޗުކަމުގަ އެވެ. އަދި، 2011 އާއި 2013 ވަނަ އަހަރުގެ ސާފް ޗެމްޕިއަންޝިޕްގެ ސެމީ ފައިނަލުގައި އިންޑިއާ އަތުން ރާއްޖެ ކެޓިއިރު ވެސް ކޯޗަކީ އުރްބާނީ އެވެ.
ތިން ވަނަ ފަހަރަށް ރާއްޖޭގެ ގައުމީ ޓީމުގެ ކޯޗުކަމާ މި އަހަރުގެ ކުރީކޮޅު ހަވާލުވި އުރްބާނީގެ ކޯޗުކަމުގައި ސީނިއާ ގައުމީ ޓީމާއި 20 އަހަރުން ދަށުގެ ގައުމީ ޓީމުން ކުޅުނު 10 މެޗުގެ ތެރެއިން މޮޅުވީ އެންމެ މެޗަކުންނެވެ. ހަ މެޗުން ބަލިވިއިރު، ތިން މެޗުން ވަނީ އެއްވަރުވެފަ އެވެ.
