އިދިކޮޅު ޕާޓީ، ޕީޕީއެމްއިން އިއްޔެ 10،000 މެމްބަރުންގެ ފޯމު ހުށަހެޅި ކަމަށް ބުނާ ވާހަކަ އިލެކްޝަން ކޮމިޝަން (އީސީ) އިން ދޮގުކޮށްފި އެވެ.
ޕީޕީއެމުން ފޯމުތައް ހަވާލުކޮށްފައި ވަނީ އެޕާޓީގެ ކޯލިޝަންގައި ހިމެނޭ ޕީއެންސީގެ އިސް ބޭފުޅުންނެވެ. މި ފޯމުތަކާ އީސީން ހަވާލުވެފައި ވަނީ އެ ކޮމިޝަނުގެ ރައީސް ފުއާދު ތައުފީގެވެ.
އެ ޕާޓީން ބުނެފައިވަނީ 10،000 ފޯމު އިއްޔެ އީސީއާ ހަވާލުކޮށްފައިވާ ކަމަށެވެ. އެއީ މީގެ މަހެއްހާ ދުވަސް ކުރިން އެ ޕާޓީން ފެށި މަސައްކަތެއް ކަމަށް ވެސް އެ ޕާޓީން ބުންޏެވެ.
ނަމަވެސް އެކަން ދޮގުކޮށް އީސީގެ އޮފިޝަލަކު "އަދަދު" އަށް ވިދާޅުވީ ޕީޕީއެމުން ހުށަހަޅާފައި ވަނީ 4400 ފޯމު ކަމަށެވެ. އަދި އެކަން ޔަގީން ކުރުމުގެ މަސައްކަތް ކުރުމަށް ފޯމުތައް އަލުން ގުނަމުންދާ ކަމަށްވެސް އޭނާ ވިދާޅުވި އެވެ.
"ޕީޕީއެމްއިން 10،000 ފޯމު ކަމަށް ބުންޏަސް އަޅުގަނޑުމެން އެ ޔަގީން ކުރާނެ. ގުނާފަ ބަލާނެ އޭގަ 10،000 އިންތޯ. އަޅުގަނޑުމެން ގުނިއިރު އިނީ 4400 ފޯމު،" އޮފިޝަލް ވިދާޅުވި އެވެ.
މިކަމާ ގުޅިގެން ޕީޕީއެމްގެ ސެކެޓްރީ ޖެނެރަލް (އެސްޖީ) އަހުމަދު ތޮލާލް ވިދާޅުވީ އިއްޔެ ހުށަހެޅި ފޯމުތަކުގެ އަދަދުގައި މައްސަލައެއް އުޅޭ ކަމަށް ބުނެ އިލެކްޝަނުން ހެނދުނު ގުޅި ކަމަށެވެ. އަދި އެކަން ބެލުމަށް އެ ޕާޓީގެ ޓީމެއް މިއަދު އިލެކްޝަނަށްދާ ގޮތަށް ނިންމާފައިވާ ކަމަށްވެސް އޭނާ ވިދާޅުވި އެވެ.
ނަމަވެސް އިއްޔެ 10،000 ފޯމު ހުށަހެޅި ކަމަށް އެ ޕާޓީން ޔަގީންކުރެ އެވެ.
ޕީޕީއެމްގެ އެތެރޭގެ އިންތިހާބު އޮތީ މި ސެޕްޓެމްބަރު 15، ގަ އެވެ. އެ ޕާޓީން ކުރީން ބުނީ އެތެރޭގެ އިންތިހާބާ ދިމާކޮށް 11،987 މީހަކު އެ ޕާޓީއާ ގުޅެން ހުށައަޅާފައިވާ ކަމަށެވެ.
އޮގަސްޓް 17، 2011 ގައި އުފެއްދި ޕީޕީއެމްގައި މިވަގުތު 38،020 މެމްބަރުން ރަޖިސްޓްރީ ވެފައި އެބަ ތިއްބެވެ. އެ ކޯލިޝަންގެ ޕީއެންސީ ޕާޓީގެ އަދަަދަކީ 3084 މެމްބަރުންނެވެ.
