ސިޔާސީ ހަރަކާތްތައް ހިންގުމުގައި ކްރިމިނަލް ކޯޓުން ނެރެފައިވާ އަމުރެއްގެ ހުދޫދުގެ ތެރެއިން އަމަލުކުރުމަށް އިލެކްޝަންސް ކޮމިޝަނުން ހުރިހާ ސިޔާސީ ޕާޓީތަކަށް އަންގައިފި އެވެ. ކޮމިޝަނުން މިގޮތަށް އެންގީ ކްރިމިނަލް ކޯޓުގެ ގާޒީ މުޒައްމިލު ނާސިރު ނެރުއްވާފައިވާ އަމުރަކާ ގުޅިގެން، ސިޔާސީ ޕާޓީތަކަށް ފޮނުވި އީމެއިލެއްގަ އެވެ.
އިލެކްޝަންސް ކޮމިޝަނުން މިއަދު ސިޔާސީ ޕާޓީތަކަށް ފޮނުވި އީމެއިލްގައި ބުނެފައިވަނީ ކްރިމިނަލް ކޯޓުން ނެރެފައިވާ އަމުރާ ހިލާފުވުމަކީ ކޯޓުގެ ހުރުމަތް ކެނޑުމުގެ އަމަލެއް ކަމަށް ބެލޭނޭކަމަށް ކޯޓު އަމުރުގައި ބަޔާންކޮށްފައިވާކަމަށާއި، އެކަމަށް ހުރިހައި ސިޔާސީ ޕާޓީތަކުން ސަމާލުވުމަށް އެދިފަ އެވެ.
މިކަމާ ގުޅިގެން 'އަދަދު' ނޫހުގެ ފަރާތުން އިލެކްޝަންސް ކޮމިޝަނަށް ގުޅުމުން އެ ކޮމިޝަނުގެ އޮފިޝަލަކު ވިދާޅުވީ އެ ކޮމިޝަނަށް އަމުރު ފޮނުއްވީ ޕީޖީ އޮފީހުން ކަމަށެވެ. އަދި އެ އަމުރު ސިޔާސީ ޕާޓީތަކާ ހިއްސާކުރުމަށާއި އެ އަމުރާ އެއްގޮތަށް އަމަލުކުރަމުން ގެންދޭތޯ ބެލުމަށް ވެސް އަންގާފައިވާކަމަށް އެ އޮފިޝަލު މައުލޫމާތު ދެއްވި އެވެ.
ކްރިމިނަލް ކޯޓުން މި އަމުރު ނެރެފައިވަނީ އަދަދު ނޫހުގެ ސީއީއޯ ސައިން ފިޔާޒު މޫސާ އާއި އެޑިޓަރު ހަސަން މުހައްމަދުގެ މައްޗަށް ގާނޫނުލްއުގޫބާތުގެ 612 ވަނަ މާއްދާގެ ތަށުން ގަޒުފުކުރުމުގެ ދައުވާ އުފުލައި، އެ މައްސަލަ ކޯޓުން ބަލަމުންދާތީ އެވެ. މި އަމުރު ކޯޓުން މިހާތަނަށް އާންމުކޮށްފައި ނުވި ނަމަވެސް، އަމުރުގެ ތަފްސީލު ހާމަވެފައިވަނީ އިލެކްޝަންސް ކޮމިޝަނުން އެ އަމުރަށް ރިއާޔަތްކޮށް ސިޔާސީ ޕާޓީތަކަށް މައުލޫމާތު ހިއްސާކުރުމާ ގުޅިގެންނެވެ.
ކޯޓު އަމުރުގައިވާ ގޮތުން، އަދަދު ނޫހުން އާންމުކުރި އައިޝާ ޑޮކިއުމެންޓަރީ މުޖުތަމައުގެ ތެރޭގައި ދައުރުކުރުން ވަނީ މުޅިން މަނާކޮށްފައެވެ. މީގެ އިތުރުން އެ ވީޑިއޯގައި ހިމެނޭ ވާހަކަތައް އެއްވެސް ފަރާތަކުން ސީދާގޮތުންނާއި ނުސީދާގޮތުން ދެއްކުމަކީ ވެސް މަނާކަމެއްގެ ގޮތުގައި ވަނީ ކަނޑައަޅާފައެވެ. އަދި މި މައްސަލައިގެ ހަސްމުންނާއި ކުށުގެ ޝިކާރައަށްވީ ފަރާތާ ގުޅުވައިގެން އެއްވެސް ވާހަކައެއް ދެއްކުމާއި، މައްސަލައާ ގުޅޭ އެއްވެސް ލިޔެކިޔުމެއް ނުވަތަ މައުލޫމާތެއް އެއްވެސް ސިފައެއްގައި ފެތުރުމަކީ ކޯޓު އަމުރާ ހިލާފުވުން ކަމަށް ވެސް ބަޔާންކޮށްފައި ވެ އެވެ.
މި މައްސަލަ އުފެދުނު އައިޝާ ޑޮކިއުމެންޓަރީ އަދަދު ނޫހުން އާންމުކުރީ މިއަހަރުގެ މާޗު މަހުގެ 28 ވަނަ ދުވަހުއެވެ. އެ ޑޮކިއުމެންޓަރީގައި އިންޓަވިއުދިން އަންހެން މީހާ ވަނީ ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒުގެ މައްޗަށް ސީރިއަސް ތުހުމަތުތަކެއް ކޮށްފައެވެ. އޭގެ ތެރޭގައި ކައިވެނިން ބޭރުން ގުޅުމެއް ބޭއްވި ކަމަށާއި، ޖިންސީ ފުރައްސާރަ ކުރި ކަމަށް ކުރި ތުހުމަތުތައް ހިމެނެއެވެ. ނަމަވެސް، އެ ވީޑިއޯ އާންމުކުރުމުގެ ކުރިން ސަރުކާރުގެ ތަރުޖަމާނާ ސުވާލުކުރުމުން އެ ހުރިހާ ތުހުމަތުތަކެއް ވަނީ ދޮގުކުރައްވާފަ އެވެ.
