ކުރީގެ ރައީސް އަބްދުالله ޔާމީންގެ ޕީޕަލްސް ނެޝަނަލް ފްރަންޓް (ޕީއެންއެފް) އިން ކުރަމުންދާ ސިލްސިލާ މުޒާހަރާތަކާ ގުޅިގެން އިލެކްޝަންސް ކޮމިޝަނުން އެ ޕާޓީ އެއް ލައްކަ ރުފިޔާއިން ޖޫރިމަނާކޮށްފި އެވެ.
އިލެކްޝަންސް ކޮމިޝަނުން ޕީއެންއެފްގެ ރައީސް، ޔާމީނަށް އެޑްރެސްކޮށް ފޮނުވި ސިޓީއެއްގައި ބުނީ ޕީއެންއެފް އިން ސިޔާސީ ޕާޓީގެ ގާނޫނާ ތަކުރާރުކޮށް ހިލާފުވެފައިވާތީ، އެ ގާނޫނުގެ ދަށުން އެ ޕާޓީ އެއް ލައްކަ ރުފިޔާއިން ޖޫރިމަނާކޮށްފައިވާ ކަމަށެވެ.
"ތިޔަ ޕާޓީ އިން ގާނޫނު ނަންބަރު 4/2013 (ސިޔާސީ ޕާޓީގެ ގާނޫނު) ގެ 45 ވަނަ މާއްދާއާ ތަކުރާރުކޮށް ހިލާފުވެފައިވާތީ، އެ ގާނޫނުގެ 49 ވަނަ މާއްދާގެ ދަށުން 100،000 (އެއްލަކަ) ރުފިޔާއިން ޖޫރިމަނާކޮށްފިން،" އިލެކްޝަންސް އިން ބުންޏެވެ.
ޕީއެންއެފް އާއި އެ ޕާޓީއަށް ނިސްބަތްވާ މީހުން ހިންގާ ސިޔާސީ ހަރަކާާތްތަކުގައި ގާނޫނާ ހިލާފު އަމަލުތައް ނުހިންގުމަށާއި ތަކުރާރުކޮށް ސިޔާސީ ޕާޓީން ގާނޫނާ ހިލާފަށް އަމަލުކުރާނަމަ، އެ އަމަލެއް ހިންގާ މީހަކަށްވެސް ގާނޫނީ ފިޔަވަޅު އަޅާނެ ކަމުގެ އިންޒާރު އިލެކްޝަނުން ވަނީ ދީފަ އެވެ.
އިލެކްޝަނުން ބުނީ ޕީއެންއެފް އާއި އެ ޕާޓީއަށް ތާއީދުކުރާ މީހުން މިދުވަސްވަރުގައި ސިލްސިލާކޮށް ކުރިއަށް ގެންދާ ސިޔާސީ ހަރަކާތްތަކުގައި ގާނޫނާއި ގަވާއިދާ ތަކުރާރުކޮށް ހިލާފުވުމުން އެކަމަށް ނަސޭހަތްތެރިވެ، ކޮމިޝަނާ ބައްދަލުކުރަން ދައުވަތު ދިނުމުންވެސް އެކަމަށްވެސް އިންކާރުކުރި ކަމަށެވެ.
ސިޔާސީ ޕާޓީތަކަށް ސިޔާސީ ހަރަކާތްތައް ހިންގުމަށް މަގުފަހިކޮށްދީފައިވަނީ ގާނޫނުއަސާސީ އާއި ސިޔާސީ ޕާޓީގެ ގާނޫނާއި، ސިޔާސީ ޕާޓީތަކުގެ ގަވާއިދާއި ސުލްހަވެރިކަމާއެކު އެއްވެ އުޅުމުގެ ގާނޫނު އަދި ރާއްޖޭގައި އަމަލުކުރަމުންދާ އެހެނިހެން ގަވާއިދުތަކުގެ ހުދޫދުގެ ތެރެއިންކަން އިލެކްޝަނުން ފާހަގަކުރި އެވެ.
ސިޔާސީ ޕާޓީތަކަށް އިލެކްޝަނުން ފިޔަވަޅު އަޅަން ފަށާފައި މިވަނީ މެއި 1، ގައި އެ ކޮމިޝަނުގެ ރައީސް މުހައްމަދު ޒާހިދު މަގާމުން އިސްތިއުފާ ދެއްވި ފަހުންނެވެ. އަދަދު އަށް އެނގިފައިވާ ގޮތުގައި ޒާހިދު މަގާމުން އިސްތިއުފާ ދެއްވީ ސަރުކާރުގެ ފަރާތުން ފޯރުވާ ނުފޫޒު ބޮޑުވެގެންނެވެ.
ޕީއެންއެފް އިން ކުރަމުންދާ މުޒާހަރާތައް ލައިވްކޮށް ގެނެސްދޭތީ ޗެނަލް 13 އިން އެ މުޒާހަރާތައް ގެނެސްދިނުން ހުއްޓާލަން މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (ކޮންޓްރޯލް ކޮމިޝަން) އިން މިދިޔަ އެޕްރީލް 27، ގައި އެންގި އެވެ.
އިލެކްޝަނުން ޕީއެންއެފް ޖޫރިމަނާ މިކުރީ އެ ޕާޓީން ސޯފާއަކާއެކު މާލޭގެ އެކި މަގުތަކުގައި ކުރަމުންދާ މުޒާހަރާތަކާ ގުޅިގެންނެވެ. އެ މުޒާހަރާތައް ޕީއެންއެފް އިން ސޯފާއަކާއެކު ފެށީ އަދަދު ނޫހުން ގެނެސްދިން "އައިޝާ ޑޮކިއުމަންޓްރީ" އަށް ފަހު އެވެ.
