21 ސެޕްޓެންބަރު 2022 - 12:06 0
މުހައްމަދު ވިޝާމް
ހައުސިން މިނިސްޓަރު މުހައްމަދު އަސްލަމް މަޖިލީހުގެ މިއަދުގެ ޖަލްސާގައި މައުލޫމާތު ދެއްވަނީ. -ފޮޓޯ: މަޖިލިސް
21 ސެޕްޓެންބަރު 2022 - 12:06 0
ސަރުކާރުން ހިންގާ އެކިއެކި ބޯހިޔާވަހިކަމުގެ މަޝްރޫއުތަކުގެ ދަށުން ދޫކުރާ ފްލެޓާއި ގޯއްޗަށް ގަވައިދުން ފައިސާ ނުދައްކައިގެން ޑިފޯލްޓުވާ ރޭޓު އުޅޭނީ 40 ވަރަކަށް ޕަސަންޓުގައި ކަމަށް ހައުސިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
އދ. މަހިބަދޫގެ ބިން ހިއްކުމާ ގުޅޭގޮތުން ކުރި ސުވާލަކަށް ޖަވާބު ދެއްވަން އަސްލަމް މިއަދު މަޖިލީހަށް ހާޒިރުވެވަޑައިގެންފައިވާއިރު، އިތުރު ސުވާލުކުރަން ލިބުނު ފުރުސަތުގައި ބޯހިޔާވަހިކަމުގެ ގައުމީ ސިޔާސަތެއް އޮތްތޯ ހުޅުމާލެ ދާއިރާގެ މެމްބަރު އަލީ ނިޔާޒް ވަނީ ސުވާލު ކުރައްވައިފަ އެވެ.
އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ ބޯދާ ޒަމާނުގައި، ބޯހިޔާކަމުގެ ސިޔާސަތަކީ ރާއްޖޭގެ ހުރިހާ ރަށްތަކަކުން ބަންޑާރަ އުސޫލުން ގޯތި ދޫކުރުން ކަމަށެވެ.
ނަމަވެސް، ހާއްސަކޮށް މާލޭގައި ގޯތި ދޫކުރާނެ ބިންތައް ހުސްވެ، އެ ސިޔާސަތު ބަދަލުވެ، އިމާރާތް ބިނާކޮށްގެން ރައްޔިތުންނަށް ފްލެޓު ދޫކުރުމުގެ ސިޔާސަތު ފެށުނުކަން އަސްލަމް ފާހަގަކުރެއްވި އެވެ.
"ސަރުކާރަކީ އެންމެ ބޮޑު ރިއަލް އެސްޓޭޓް ޑިވަލޮޕަރު. ސަރުކާރުން ލެންޑު މި ކުރަނީ [ފްލެޓު] ދެން ރައްޔިތުން ރީޕޭ މި ކުރަނީ ސަރުކާރަށް،" އެހެން ކަންތައްވާތީ ދިމާވާ މައްސަލަ ވިދާޅުވުމުގެ ކުރިން އަސްލަމް ފާހަގަކުރެއްވި އެވެ.
"30 ޕަސަންޓާއި 40 ޕަސަންޓުގެ މީހުން ޑިފޯލްޓްވޭ އެބަ. ދައްކަންވާ ލާރި ނުދައްކާ."
އަސްލަމް ވިދާޅުވި ގޮތުގައި ސަރުކާރުން ދޫކުރާ ފްލެޓާއި ގޯތީގެ އަދަދު ދުވަހެއް ދުވަހަކުން އިތުރުވަމުންދާއިރު، ޑިފޯލްޓްވާ ރޭޓު މިހާ މަތީގައި ހުރެގެން، ދެމެހެއްޓެނެވި ގޮތެއްގައި މިކަން ކުރަން ދަތިވާނެ އެވެ.
އެހެންކަމުން، ދެމެހެއްޓެނެވި ގޮތެއްގައި ބޯހިޔާވަހިކަމުގެ މަޝްރޫއުތައް ކުރިއަށް ގެންދެވޭނެ ގޮތެއް ހޯދުމުގެ މަސައްކަތް ވާލްޑް ބޭންކާ ގުޅިގެން ކުރެވެމުންދާކަން މިނިސްޓަރު މިއަދު ހާމަކުރެއްވި އެވެ.
"ބިނާކުރުމެއް ނޫން. ކަލެކްޝަން، ޓައިޓަލް އޯނާޝިޕް، ފޯކްލޯޝާ. މި ކަންކަމާ ގުޅޭގޮތުން، ސަސްޓެއިންޑް ގޮތަކަށް ވިސްނާ ރާވަން އަޅުގަނޑުމެން މަސައްކަތް ކުރަމުން އެބަގެންދަން،" އަސްލަމް ވިދާޅުވި އެވެ.
އޭނާ ވިދާޅުވި ގޮތުގައި މިހާރު ގެންގުޅޭ ބޯހިޔާވަހިކަމުގެ ސިޔާސަތަށް ބޮޑެތި ބަދަލުތަކެއް ގެނެސް އިތުރު ވިސްނުންތަކެއް ނެރެންޖެހޭ ކަމަށާއި، އެކަން މަޖިލީހުގެ އިތުރުން ރައްޔިތުންނަށް ހުށަހަޅާނެ އެވެ.
Comment