ދިރިއުޅޭ މީހުންނާއި ވެހިކަލުން ތޮއްޖެހިފައި އޮތް ވެރިކަން ހިންގާ މާލެއިން އަމިއްލަ މީހުންގެ ވެހިކަލް ޕާކު ކުރުމަށް 1770 އަށް ވުރެ ގިނަ ޖާގަ ކުއްޔަށް ދީފައިވާ ކަމަށް މާލެ ސިޓީ ކައުންސިލުން ބުނެފި އެވެ.

މައުލޫމާތު ހޯދުމާއި ލިބިގަތުމުގެ ހައްގުގެ ގާނޫނުގެ ދަށުން އަމިއްލަ ފަރާތަކަށް ސިޓީ ކައުންސިލުން މިދިޔަ ބުރާސްފަތި ދުވަހު ފޮނުވި ސިޓީއެއްގައި ބުނެފައި އޮތީ، ކާރާއި ޕިކަޕާއި ލޮރީ ޕާކު ކުރުމަށް ޖުމްލަ 1778 ޖާގަ ކުއްޔަށް ދީފައިވާ ކަމަށެވެ.

ޕްރައިވެޓް ޕާކު ކުރުމަށް މާލެއިން ބައެއް ތަންތަން ކުއްޔަށް ދޫކުރުމަށް ސިޓީ ކައުންސިލުން ނިންމީ މިއަހަރުގެ އޭޕްރީލް މަހުގެ ތެރޭގަ އެވެ. އެގޮތަށް ޖާގަ ދެނީ ޓެކްސީއެއް ނަމަ މަހަކު 750ރ. އަށް އަދި ޕްރައިވެޓް ވެހިކަލެއް ނަމަ މަހަކު 1500ރ. އަށެވެ.

ޕްރައިވެޓް ކާރުތަކަށް މަގުމަތިން ޕާކު ކުރާނެ ޖާގަ ކުއްޔަށް ދިން އިރު އެ ޕްރައިވެޓް ކާރު ދުއްވެނީ ޕާކު ކުރާނެ ގަރާޖެއް ދެއްކުމަށްފަހެވެ. އަދި ވެހިކަލް ދުއްވުމުގެ ހުއްދަ ލިބެނީ ހަގީގަތުގައި ވެސް ކާރު ޕާކު ކުރާނެ ޖާގަ އޮތްތޯ ސަރުކާރުން ޔަގީން ކުރުމަށްފަހު އެވެ.

އެކަމަކު، ޕާކު ކުރާނެ ގަރާޖެއް ނެތި "ގަރާޖު ސިޓީ" ވިއްކުމަކީ މާލޭގައި އެންމެ ބޮޑަށް ހިންގާ ވަގު ވިޔަފާރި އެވެ. އެގޮތަށް ކޮރަޕްޝަނުން އެއް ގަރާޖުގައި 100 އަށް ވުރެ ގިނަ ވެހިކަލް ވެސް ޖައްސާފައި އެބަހުއްޓެވެ. ނަމަވެސް މިއަދާ ހަމައަށް ވެސް އެ ކޮރަޕްޝަން އެގޮތަށް ދަނީ ހިންގަމުންނެވެ.

ސިޓީ ކައުންސިލުން ކުއްޔަށް ދިން 1778 ޕާކިން ޖާގައަކީ އާންމު ޕާކިން ޒޯންތަކުން ނަގާފައި ދިން ޖާގަ އެވެ. ކުރިން އެ ޕާކިން ޒޯންތަކުގައި މުޅިން ވެސް ޕާކު ކުރީ ސައިކަލެވެ. ސައިކަލު ޕާކު ކުރަމުންދިޔަ ޒޯނުތައް ޕްރައިވެޓް ޕާކިންއަށް ނެގުމަށްފަހު، އެ ސަރަހައްދުތަކުގައި އޭގެ ބަދަލުގައި ސައިކަލު ޕާކިންއަށް ޖާގައެއް ނުދެ އެވެ.

ނަމަވެސް މިނީ ބަހުގެ ހިދުމަތް މާލޭގައި ފެށުމަށް މަޖީދީ މަގުގައި ޕާކު ނުކުރެވޭ ގޮތް ހެދުމުން ސައިކަލު ޕާކިން ޒޯންތަކެއް މާލޭގައި ހެދި އެވެ.