މިދިޔަ ހުކުރު ދުވަހުގެ ރޭ އެމްޑީޕީން ކޮންގްރެސް ފެށިއިރު, އެތަނުގައި އޮތީ ނުތަނަވަސްކަމާއި ހޫނު ކަމެވެ; ބަހުސް ކުރަން ކުރިމަތީ އޮތް ބޮޑު ގަރާރާއެކު, އެއް ބަޔަކު އަނެއް ބަޔަކާ ދެމެދު މައްސަލަތައް އޮތީ ފުނި ޖެހިފަ އެވެ.

އެ މަންޒަރު, ޕާޓީގެ ރައީސް މުހައްމަދު ނަޝީދާއި ޕާޓީގެ އިސް ލީޑަރު, ރައީސް އިބްރާހިމް މުހައްމަދު ސޯލިހުގެ މޫނުމަތިން ވެސް ފެންނަމުން ދިޔަ އެވެ. ވަރަށް އެކުވެރި އެ ދެ ބޭފުޅުން ވާހަކަ ދައްކައި, ސަމާސާކޮށް ވެސް ނުހައްދަވަ އެވެ.

އޭގެ ބަދަލުގައި, އެއް ބޭފުޅަކު އަނެއް ބޭފުޅަކަށް ބަހުގެ ހަމަލާތައް ދެއްވައި، ރައްދުދީ ހެއްދެވި އެވެ.

ނަމަވެސް, މިއަދު ކޮންގްރެސްގެ މެދު ތެރޭން ދެ ރައީސުން އިސް ނެންގެވީ ވާހަކަ ދައްކަވައިގެން ހައްލެއް ހޯދުމަށެވެ. ކޮންގްރެސްގައި ވޯޓެއް ނަގަމުން ދިޔަ ވަގުތު, ތަނަށް އައި ހުސްކަމުގައި ލިބުނު ވަގުތުގެ ބޭނުން އެ ދެ ބޭފުޅުން ހިއްޕެވި އެވެ.

ފުރަތަމަ އެކަނި މަޝްވަރާތަކެއް ކުރެއްވުމަށްފަހު, ގާތް ބޭފުޅުންނާއެކު ވެސް ވަކިވަކިން މަޝްވަރާތައް ކުރެއްވި އެވެ. ކުރިން ހީކުރެވިފައި އޮތް ގޮތާ ހިލާފަށް ނަޝީދު ނިންމެވީ ބަރުލަމާނީ ގަރާރާމެދު ބަހުސް, ކޮންގްރެސްގައި ނުކުރުމަށެވެ. ރައީސް އެއްބަސްވެވަޑައިގެންނެވީ, ބަރުލަމާނީއާމެދު އިތުރަށް މަޝްވަރާ ކުރައްވާނެ ކަމެވެ.

"ވަރަށް ރަނގަޅު ނިންމުމެއް."

ގަރާރު އަނބުރާ ނަގަން ނިންމެވިކަން ކޮންގްރެސްއަށް ނަޝީދު އިއުލާން ކުރެއްވުމާއެކު, ރައީސް ސޯލިހު ވިދާޅުވި އެވެ. ނަޝީދު ވިދާޅުވި ގޮތުގައި މި ވަގުތަށް ގަރާރު ބޭއްވީ ރައީސް އާއި ޕާޓީގެ އެހެން ގުނަންތަކާއެކު އިތުރަށް މަޝްވަރާކުރުމަށެވެ.

"ރައިސުލްޖުމްހޫރިއްޔާއާއެކު މަޝްވަރާކޮށްގެން އަދި ޕާޓީގެ އެހެން ވެސް ގުނަންތަކާ މަޝްވަރާކޮށްގެން އަޅުގަނޑުމެންނަށް ހިމުން އެއްގޮތް އުސޫލުތަކާއި ހަމަތަކެއް ހޯދޭނެ, އެއީ އަޅުގަނޑުގެ ހިތުގަ ޝައްކު ހިނގާނެ ކަމެއް ނޫން," ނަޝީދު ވިދާޅުވި އެވެ.

ރައީސް ވިދާޅުވީ އެ ގަރާރުގެ ސަބަބުން ކޮންގްރެސް ތެރޭ އޮތީ ނުތަނަވަސް މާހައުލެއް ކަމަށެވެ. އެހެންނަމަވެސް, މިއަދު ނިމިގެން މި ދަނީ ފުރިހަމަ، މެޗުއާ ޕާޓީއެއްގެ ގޮތުގައި އެމްޑީޕީ އޮވެގެން ކަމަށް އެމަނިކުފާނު ވިދާޅުވި އެވެ.

"...އަޅުގަނޑުމެން ކޮންމެ މީހަކީ ވެސް ތަފާތު ވިސްނުންތަކާއި ފިކުރުތައް ހުންނާނެ ބައެއް, ސިޔާސީ ލީޑަރުންގެ ގޮތުގައި ތިބޭއިރު އަމިއްލައަށް ބޭނުންވާ ކަންތައްތަކެއް ހުރޭ. މި ހުރިހާ ކަމެއް އެއްކިބާކޮށް އަޅުގަނޑުމެން ޕާޓީއާއެކުގަ މި ގައުމާއެކު ކުރިއަށް ދާން ތިބިކަން މިއަދު ވެސް ހާމަވެގެން މި ދިޔައީ," ރައީސް ވިދާޅުވި އެވެ.

"ވަރަށް އުފަލުން މިތަނުން ނުކުމެގެން ދާނީ, މެންދުރު ވެސް ހުރި ހޫނުކަން ހަވީރު މިއޮތީ ފިނިކަމަކަށް ބަދަލުވެފައި,"

ރައީސް ސޯލިހު ވިދާޅުވި ގޮތުގައި އެމްޑީޕީގެ ވިސްނުން ދެން ބަހައްޓަންވީ ކުރިއަށް އޮތް ރިޔާސީ އިންތިހާބަށެވެ. ޕާޓީ އެކަތިގަނޑެއްގެ ގޮތުގައި ތިބެ އެމްޑީޕީގެ ވާދަވެރިން އިންތިހާބުން ބަލި ކުރުމަށް އެއް އަޒުމެއްގައި ނުކުންނަން ޖެހޭ ކަމަށް އެމަނިކުފާނު ވިދާޅުވި އެވެ.

"...ޕާޓީން ކެންޑިޑޭޓެއް ކަނޑައަޅާނެ, އެކަމަށް ޕާޓީގެ ގަވައިދުގައި އުސޫލުތައް އެބަ އޮތް, އެ އުސޫލުގެ ތެރޭން ޕާޓީން އިންތިހާބު ކުރާ ކެންޑިޑޭޓެއް ހޮވައި އަޅުގަނޑުމެން އެކުގައި ނުކުންނަންވާނީ،" ރައީސް ވިދާޅުވި އެވެ.

"މިއީ ބޮޑު ޕާޓީއެއް, މިއީ ފުރިހަމަ ޕާޓީއެއް, 2023 ވަނަ އަހަރުގެ ރިޔާސީ އިންތިހާބު ވެސް އެމްޑީޕީ ނޫން ބަޔަކަށް ކާމިޔާބުވާ ތަނެއް ނުފެނޭ, ...މާދަމާ މިކަމައިގެން އަވަސްވެ ގަންނަންވީ,"

ރައީސްގެ ވާހަކައަށްފަހު, ނަޝީދު ވިދާޅުވީ ރައިސުލްޖުމްހޫރިއްޔާ ވިދާޅުވި ގޮތަށް ކުރިއަށް އޮތް އިންތިހާބު ކާމިޔާބު ކުރުމާއި ހިޔާލުތައް އެއްގޮތް ކުރުމަށް އަވަސްވެ ގަންނަން ޖެހޭ ކަމަށެވެ. އެކަން ކުރިއަށް ދާނީ ދެފުށް ފެންނަ މާ ސާފު ގޮތަކަށް އެމަނިކުފާނު ވިދާޅުވި އެވެ.

"...ޔަގީންކަން އަރުވަން ބޭނުން އެކުގައި ތިބެ އެއް ހިޔާލެއްގަ ތިބެ މި ކުރިއަށް އޮތް އިންތިހާބުގައި ކާމިޔާބު ކުރެވޭނެ," ނަޝީދު ވިދާޅުވި އެވެ. "އެތައް ޒަމާނެއްވަންދެން ރާއްޖޭގެ ރައްޔިތުންނަށް ހިދުމަތްކޮށް ދިނުމުގައި އަޅުގަނޑުމެންނަށް ތިބެވޭނެ,"

ދެ ރައީސުންގެ އެ ވާހަކައަށްފަހު ކޮންގްރެސްމަނުން ވަނީ ވަރަށް ބޮޑަށް އުފާކޮށްފަ އެވެ. އެ ދެ ބޭފުޅުން ސްޓޭޖް މަތީ ބައްދާލިއިރު ތަން އޮތީ އަތްތިލަބަޑިން ގުގުމާލާފަ އެވެ. މި ކޮންގްރެސްގެ ތެރޭން އެމްޑީޕީ ދެބައިވެގެން ގޮސްދާނެ ކަމަށް ބެލެވިފައި އޮތަސް, އެ މާލަމުން އެންމެން ނުކުމެގެން ދިޔައީ އުފަލާއެކު އެވެ.

"މިތަނަށް ވަތްއިރު ވަރަށް ނުތަނަވަސްވި, ވާން މިއުޅޭ ގޮތަކާމެދު, އެކަމަކު މިހާރު ނުކުމެގެން މި ދަނީ ދެ ރައީސުންނާއެކު ވަރަށް އުފަލުން," ކޮންގްރެސްމަނަކު ބުންޏެވެ.

އެކަމަކު, އިންތިހާބު ކާމިޔާބު ނުވާނެ ކަމުގެ ހިސާބު

އެއް ގަލަކަށް އަރައިވަޑައިގެން ނަޝީދާއި ރައީސް ކޮންގްރެސް ނިންމާލި ކަމުގައިވީ ނަމަވެސް, އަންނަ ރިޔާސީ އިންތިހާބު ކާމިޔާބު ނުކުރެވޭނެ ކަމުގެ ހިސާބު, ކޮންގްރެސްގެ ތެރެއަށް ނަޝީދު ވަނީ ދޫކުރައްވާފަ އެވެ.

ނަޝީދު, ދެއްކެވީ އެންމެ ފަހުން 2018 ވަނަ ބޭއްވި ރިޔާސީ އިންތިހާބުގެ ނަތީޖާއިން ފެންނަ މަންޒަރުގެ ހިސާބެވެ;

އެ އިންތިހާބުގައި 233,000 މީހުން ވޯޓު ދިނެވެ. އޭގެ ތެރޭން 42 ޕަސެންޓް މީހުން ވޯޓުލީ, ޕީޕީއެމްގެ ކެންޑިޑޭޓް, ރައީސް އަބްދުالله ޔާމީނަށެވެ. އެމްޑީޕީގެ ކެންޑިޑޭޓް, ރައީސް ސޯލިހަށް ލިބުނީ 135,000 ވޯޓެވެ. އޭގައި ޖުމްހޫރީ ޕާޓީ އާއި އެމްއާރްއެމް އަދި އަދާލަތުގެ ބައިވެރިވުން އޮތެވެ.

ނަޝީދު ޖެއްސެވި ހިސާބުން ރައީސް ސޯލިހަށް ލިބުނު ވޯޓުގެ 12 ޕަސެންޓަކީ, ޖުމްހޫރީ ޕާޓީން ހޯދި ވޯޓެވެ. އެމްއާރްއެމް އަދި އަދާލަތު ޕާޓީ އެކުވެ ނަގާފައިވަނީ ހަ ޕަސެންޓް ވޯޓެވެ. އެހެންވެ, މި ދެ ބައި އުނިކުރުމުން, އެމްޑީޕީއަށް ލިބުނު ކަމަށް ނަޝީދު ދެކެނީ 112,000 ވޯޓެވެ.

ރައްޔިތުންގެ މަޖިލީހުގެ ރައީސް ވިދާޅުވި ގޮތުގައި, އެމްޑީޕީ ބައިވެއްޖެނަމަ, އެ ވޯޓެއް ރައީސް ސޯލިހަކަށް ނުހޯދޭނެ އެވެ. މިއަދު މިއޮތް ގޮތަށް ކަންކަން އޮވެއްޖެނަމަ 112,000 ވޯޓުން 40 ޕަސެންޓް ވޯޓު އެމްޑީޕީއަށް ގެއްލި, 2023 އުނދަގޫވާނެ އެވެ.

"...އަޅުގަނޑުމެން ގޮތެއް ހޯދަން އެބަ ޖެހޭ މި ހާލަތުން މި ޕާޓީ އަރައިގަތުމަށް, މި ޕާޓީއަކަށް އަޅުގަނޑު މުހިންމެއް ނޫން އަދި ރައިސުލްޖުމްހޫރިއްޔާ ވެސް މުހިންމެއް ނޫން, އަޅުގަނޑުމެންނަށް މުހިންމީ ރާއްޖޭގެ ރައްޔިތުންނަށް ހެޔޮ ގޮތުގައި ޑިމޮކްރަޓިކް ނިޒާމެއްގައި ވެރިކަން ކޮށްދެވި ރަނގަޅު ގޮތްތައް ހޯދުން," ނަޝީދު ވިދާޅުވި އެވެ.

ކޯލިޝަންގެ އަވާމެންދު

ނަޝީދު ވިދާޅުވީ 2023 ވަނަ އަހަރަށް އަހަރަށް ދާއިރު މިހާރު އޮތް އިއްތިހާދު މިގޮތުގައި އޮންނާނެ ކަމަށް ދެކިއްޖެ ނަމަ, އެ ތިބެވެނީ އަވާމެންދުރެއްގައި ކަމަށެވެ.

"...މިއީ 2018 ވަނަ އަހަރެއް ނޫން, އެ ދުވަހު އަޅުގަނޑުމެން އިންތިހާބަށް ނުކުތްއިރު ވާދަވެރި ހުރިހާ ސިޔާސީ ލީޑަރުން ތިބީ ހައްޔަރުކޮށްފައި, ހަމައެކަނި ހުންނެވީ ރައީސް ޔާމީން ގިނިކަންޏާ, މިއަަދު ތިޔަބޭފުޅުންގެ މަސައްކަތުން ރާއްޖޭގެ ވެރިކަން އަނެއްކާވެސް އަމާން ކުރެވިއްޖެ, ސިޔާސީ މަސައްކަތް ހިންގުމުގެ ފުރުސަތު ހޯއްދަވައިފި," ނަޝީދު ވިދާޅުވި އެވެ.

ނަޝީދު ވިދާޅުވީ އެމްޑީޕީއާއެކު ސަރުކާރު ހިންގާ ކޯލިޝަނުގައި ތިބި ކޯލިޝަންގެ ހުރިހާ ލީޑަރުން ވެސް މިހާރު އެ ތިބީ މިނިވަންކޮށް ކަމަށާއި އެ ބޭފުޅުން އެ ގެންދަވަނީ ބުރަކޮށް 2023 ވަނަ އަހަރުގެ އިންތިހާބު ކާމިޔާބު ކުރުމަށްޓަކައި މަސައްކަތް ކުރަމުން ކަމަށެވެ.

އެކަން ނަޝީދު ފާހަަގަކުރެއްވިއިރު, ޖުމްހޫރީ ޕާޓީގެ ބައެއް މެންބަރުން ވަނީ އެ ޕާޓީގެ ލީޑަރު ގާސިމް އިބްރާހިމް އަންނަ ރިޔާސީ އިންތިހާބުގައި ވާދަކުރައްވާނެ ކަމަށް ބުނަމުންނެވެ. އެ ޕާޓީއަށް މެންބަރުން އިތުރު ކުރުމުގެ ހަރަކާތްތައް ވެސް ހިންގާއިރު, އަދާލަތު ޕާޓީން ވެސް ވަނީ ސިޔާސީ ހަރަކާތްތައް ފުޅާކޮށްފަ އެވެ. ރައީސް މައުމޫންގެ އެމްއާރްއެމް ވެސް އިންތިހާބަށް އަންނަނީ ތައްޔާރުވަމުންނެވެ.

އެއިން އެއްވެސް ޕާޓީއަކުން ރަސްމީކޮށް މިހާތަނަށް އަންނަ އިންތިހާބަށް ރައީސް ސޯލިހް އެންޑޯޒް ކުރައްވާފައެއް ނުވެ އެވެ.

"...އެއީ ވާދަވެރި ސިޔާސީ ހަރަކާތް, އަޅުގަނޑުމެން ވެސް އެދޭ ގޮތް އަދި އަޅުގަނޑުމެން ވެސް މަސައްކަތް ކުރާ ގޮތް," ނަޝީދު ވިދާޅުވި އެވެ.

ކޯލިޝަނާމެދު ޔަގީންކަން ނެތްއިރު ނަޝީދު މިރޭ ވިދާޅުވި ގޮތުގައި, އެމްޑީޕީ އެކުގައި އެކީގަ ތިބެ އިންތިހާބާ ކުރިމަތިނުލައިފިނަމަ, ޕާޓީއަށް ލިބެން އޮތް މިންވަރު ވަރަށް ބޮޑަށް ކުޑަވެގެން ދާނެ އެވެ.

"...އެހެންކަމުން އިއްޒަތްތެރި ރައީސް, ރައީސްގެ އަރިހުން އަޅުގަނޑު އެދެނީ މި ޕާޓީގެ ހުރިހާ މެންބަރުން އެކުގައި ބައިތިއްބައިގެން ކުރިއަށް ވަޑައިގެންނެވުން, އެ މަގުން ނޫން ގޮތަކަށް އަޅުގަނޑުމެންނަށް ހަގީގަތުގައި ކާމިޔާބު ހޯދޭކަށް ނެތް," ނަޝީދު ވިދާޅުވި އެވެ.

"މި ކޮންގްރެސް އިރާދަކުރެއްވިއްޔާ ވެގެން ދާނީ އަދި މާ މާ އުފާވެރި ކޮންގްރެސްއަކަށް, އަޅުގަނޑުމެންގެ މައްސަލަތައް ހައްލު ކުރެވި އަޅުގަނޑުމެން އެދޭ މިސްރާބު މި ކޮންގްރެސްއިން ހާސިލްވާނެ,"

ނަޝީދު ދުރަށް ނުދާނެ ކަމުގެ ޔަގީންކަން ރައީސަށް އޮތް

ނަޝީދުގެ އެ މިސްރާބު ހާސިލްނުވި ނަމަވެސް, ކޮންގްރެސް ނިންމާލެއްވީ ރައީސްގެ ފުރިހަމަ އަމާޒާއި މިސްރާބުންނެވެ. އެގޮތުން, ހިޔާލުތައް އެއްގޮތްކޮށް, ނަޝީދު އެކުގައި ހުންނެވާނެ ކަމުގެ ޔަގީންކަން ރައީސަށް އޮތެވެ;

ކޮންގްރެސް މާލަމުގެ ހަވާސާއިން "އަދަދު"އިން ރައީސް ސޯލިހާ ސުވާލު ކުރުމުން ވިދާޅުވީ ނަޝީދު އަދި ވިސްނަވާނެ ކަމަށެވެ.

"...އެކީގައި ކުރިއަށްދެވޭ ގޮތަކަށް އަޅުގަނޑުމެން ވިސްނަން ވާނީ, އަޅުގަނޑު ހިތުން ޕާޓީން ހޮވޭ ކޮންމެ ކެންޑިޑޭޓަކާ އެކީގައި މުޅި ޕާޓީ އޮންނާނެ،" ރައީސް ސޯލިހު, "އަދަދު"އަށް ވިދާޅުވި އެވެ.

ރައީސް ސޯލިހު ވިދާޅުވީ ނަޝީދު ހުށަހެޅުއްވި ގަރާރާ ގުޅޭ ގޮތުން މަޝްވަރާ ކުރުން މާދަމާ އޮންނާނެ ކަމަށާއި އެމަނިކުފާނު ދެކޭ ގޮތުގައި ކޮންގްރެސްމަނުން އެކަމާ ދޭތެރޭ ވަރަށް ފުންކޮށް ވިސްނާނެ ކަމަށެވެ.

"އަޅުގަނޑު ހިތުން، ނިންމާ ކޮންމެ ނިންމުމަކީ އެއާ އެކީގައި ކުރިއަށްދާން ޖެހޭނެ ނިންމުމެއް ކަމަށް އަޅުގަނޑު ދެކެނީ. އަޅުގަނޑު ދެކެނީ ކޮންގްރެސްމަނުން ނިންމާނީ ޕާޓީ އާއި ގައުމަށް އެންމެ ފައިދާހުރި ނިންމުން ކަމަށް،" ރައީސް ވިދާޅުވި އެވެ.

ކޮންގްރެސް ނިންމާލެއްވީ ކާމިޔާބުގެ ޅެންބައިތުން

ރައީސް ބޭނުންވި ކަންކަން ހާސިލްކޮށް, އެމްޑީޕީގެ ބޮޑު ކޮންގްރެސް އެމަނިކުފާނު ނިންމާލެއްވީ ކާމިޔާބުގެ ޅެންބައިތުންނެވެ.

ކޮންމެ ފަދަ ހޫނެއް ވިޔަސް، މެންދުރުގެ އަވިގަދަ ވަގުތުގައި،

ކޮންމެ މެންދުރަކަށް ފަހު، ފިނިކަން ހަވީރުގެ އަންނަނީ."

މިއީ, ވާދަވެރި އިންތިހާބަކަށްފަހު, ކުރީގެ ރައީސް އަބްދުالله ޔާމީން ބަލި ކުރެއްވުމަށްފަހު ވެރިކަމުގެ ހުވާ ކުރެއްވި ދުވަހު ވެސް ރައީސް ވިދާޅުވި ޅެންބައިތެވެ!