ރާއްޖޭގެ އެކި ހިސާބުތަކުގައި ކޮވިޑް-19ގެ ކޭސްތައް އިތުރުވެ ކޮވިޑް ޖެހިގެން ހޮސްޕިޓަލުގައި އެޑްމިޓް ކުރާ މީހުންގެ އަދަދު ވެސް އިތުރުވެފައިވާ މި ދުވަސްވަރުގައި ދަތުރުފަތުރުތައް އިތުރުވާނެ ކަމަށް ވެސް ބެލެވޭތީ އެ ކަމުގައި ސަމާލުވާން އެޗްޕީއޭއިން އެދިއްޖެ އެވެ.

މި ދުވަސްވަރަކީ އީދު ބަންދާ ދިމާކޮށް ވަރަށް ގިނަ މީހުން އެތެރޭގެ އަދި ރާއްޖޭން ބޭރުގެ ދަތުރުތަކާއި އެއްވުންތަކާއި ހަފުލާތައް ބޭއްވުމަށް ރާވަމުންދާ ދުވަސްވަރަކަށް ވާތީ، ކޮވިޑްއާއި އަރިދަފުސް ރޯގާއާއި އެ ނޫން ވެސް ފެތުރޭ ބަލިތައް ފެތުރުން ކޮންޓްރޯލް ކުރަން ޖެހޭ ދުވަސްވަރެއް ކަމަށް އެޗްޕީއޭއިން ބުންޏެވެ.

މިގޮތުން ގިނަ މީހުން އެއްވާ ތަންތަނާއި ބަންދު ތަންތަނުގައި މާސްކް އެޅުމަށް އެޗްޕީއޭއިން އިލްތިމާސްކުރެ އެވެ. އޭގެ ތެރޭގައި އޮފީސް، ސްކޫލް، ކޮލެޖް، ފިހާރަތައް، އެއާޕޯޓްތައް، ފެރީ ޓާމިނަލްތައް، ދަތުރުފަތުރުކުރާ އުޅަނދުތަކުގައި ވެސް މާސްކް އަޅަން އެޗްޕީއޭއިން ވަނީ އިލްތިމާސް ކޮށްފަ އެވެ.

ކޮވިޑްގެ އެއްވެސް އަލާމާތެއް ހުރިނަމަ ވީހާވެސް އަވަހަކަށް ކޮވިޑްއަށް ޓެސްޓް ކުރުމަށާއި އަމިއްލައަށް އެކަހެރިވުމަށް ވެސް އެޗްޕީއޭއިން އިލްތިމާސްކޮށްފައިވެ އެވެ. މީގެ އިތުރަށް ދަތުރުފަތުރު ކުރުމާއި އެއްވުންތައް ބޭއްވުމުގައި ވެސް ގިނަ ކަންކަމަށް ސަމާލުވާން އެޗްޕީއޭއިން އެދިފައިވެ އެވެ.

ދަތުރު ކުރުމުގައި ސަމާލުވާންވީ ކަންކަން

• ދަތުރުކުރާ ގައުމު ނުވަތަ ރަށުގެ ހާލަތު ދެނެގަނެ ހާލަތު ގޯސްނަމަ ދަތުރު ލަސްކޮށްލުން
• ދަތުރު ކުރުމުގެ ކުރިން ވެކްސިން ޑޯޒްތައް ފުރިހަމަކުރުން
• ދަތުރުކުރާ ގައުމެއްގެ ކޮވިޑް-19 ޓެސްޓް އަދި ވެކްސިން އުސޫލުތައް ބަލައި ތައްޔާރުވުން
• ދަތުރު ކުރުމުގެ ކުރިން ވެކްސިން ކާޑު އަލުން ހަދަން ޖެހޭނަމަ ކުރިއާލާ އެ ކަމަކަށް އެދުން
• ބަލީގެ އަލާމާތެއް ހުރިނަމަ ޓެސްޓްކޮށް، ނެގެޓިވް ނަތީޖާ ލިބުމުން ނޫނީ ދަތުރު ނުފެށުން
• ރާއްޖޭން ބޭރަށް ދަތުރު ކުރުމުގެ ކުރިން އިންޝުއަރެންސް ނެގުން އެދެވިގެންވޭ

އެއްވުންތައް ބޭއްވުމުގައި ސަމާލުވާންވީ ކަންކަން

• ކޮންމެހެން ބާއްވަން ޖެހޭ ހަފުލާތައް ފިޔަވައި އެހެން ކަންކަން ލަސްކޮށްލުން
• ކޮންމެހެން ބާއްވަން ޖެހޭ ހަފުލާއެއް ވެސް ވީހާ މަދު މީހުން ބާއްވާ ގޮތަށް ހަމަޖެއްސުން
• ހަފުލާތައް އޮންލައިންކޮށް ބޭއްވޭނެ އިންތިޒާމު ހަމަޖެއްސުން އެދެވިގެންވޭ
• ޚިތާނީތައް ވެސް އެޗްޕީއޭގެ ގައިޑްލައިންއާ އެއް ގޮތަށް ރައްކާތެރި ފިޔަވަޅުތަކާއެކު ބޭއްވުން