ޓޫރިޒަމްގެ ބޭނުންތަކަށް ދޫކޮށްފައިވާ ތަންތަނުގެ ބިމު ކުލި ކުޑަކުރަން ސަރުކާރުން ޓޫރިޒަމް ގާނޫނަށް ހުށަހެޅި އިސްލާހުތައް އަނބުރާ ގެންނަން މިއަދު ނިންމައިފި އެވެ.
ރައީސް އޮފީހުގެ ޕޮލިސީ ސެކްރެޓަރީ އަހުމަދު ހަމްދާން ވިދާޅުވީ، ރިސޯޓްތަކުގެ ބިމު ކުލި ނަގާ ރޭޓް ބަދަލުކުރުމަށް ނުފެންނަކަމަށް ނިންމީ ރަޝިޔާ ޔޫކްރޭން ހަނގުރާމައާ ގުޅިގެން ދުނިޔޭގެ އިގްތިސާދަށް އަންނަ ބޮޑެތި ލޮޅުން ތަކުގެ ސަބަބުން ދައުލަތަށް ލިބޭ އެއްވެސް އަމްދަނީއެއް ދޫކޮށްލާފަދަ ފިޔަވަޅެއް އެޅުމަކީ މިވަގުތަށް ކުރަން ރަނގަޅު ކަމެއް ކަމަށް ނުފެންނާތީ ކަމަަށެވެ.
އިސްލާހުތައް އަނބުރާ ގެންނަން ނިންމާފައި މިވަނީ، އެއާ ދެކޮޅަށް ގިނަ ބަޔަކު އަޑުއުފުލަމުން ވެސް އަންނަ ދަނޑިވަޅެއްގަ އެވެ.
އެގޮތުން މަރުކަޒީ ބޭންކް އެމްއެމްއޭ އާއި ޓެކްސް އިދާރާ މީރާގެ އިތުރުން މަޖިލިސް މެމްބަރުންނާއި ރަށްރަށުގެ ކައުންސިލަރުންނާއި އާންމުންގެ ގިނަ ބަޔަކު ވެސް ވަނީ ދެކޮޅަށް ވާހަކަދައްކާފަ އެވެ. ދެކޮޅަށް ވާހަކަ ދައްކާ މީހުން ބުނަނީ، ދުނިޔޭގެ އިގުތިސޯދީ ހާލަތު ނާޒުކުކޮށް އޮއްވައި މިއީ ކުރަން ހެޔޮވާ ވަރުގެ ކަމެއް ނޫންކަމަށެވެ.
މި އަޑުތައް ގަދަވީ، މިހާރު ހުށަހަޅާފައިވާ ގޮތަށް ބަދަލުގެނެސްފި ނަމަ ދައުލަތަށް 590 މިލިއަން ރުފިޔާ ގެއްލޭނެ ކަމަށް އިގުތިސޯދީ ކޮމިޓީގައި ހާމަކުރުމުންނެވެ.
