މޯލްޑިވްސް މީޑިއާ ކައުންްސިލު(އެމްއެމްސީ) އިން މިއަދު ބާއްވަން ތާވަލުކުރި ޖަލްސާ ދޫކޮށް ހުރިހާ މެމްބަރުން މިއަދު "ވޯކް އައުޓް" ކޮށްފި އެވެ.
މެންބަރުން ޖަލްސާ ދޫކުރީ ކިންގްސް ފޮރެކްސްގެ ނަމުގައި ހިންގި ކަމަށް ބުނާ ޕޮންޒީ ސްކީމްގައި ބައިވެރިވުމުގެ ތުހުމަތުކުރެވޭ އެމްއެމްސީގެ ރައީސް ޝަހުބާން ފަހުމީ ޖަލްސާގައި ބައިވެރިވެވަޑައިގަތުމުން އެކަމާ ހިތްހަމަނުޖެހުން ފާޅުކުރުމުގެ ގޮތުންނެވެ. ޝަހުބާންއަކީ އެ ކުންފުނީގެ އެއް ހިއްސާދާރެވެ.
މިއީ އެމްއެެމްސީން ދޭ މީޑިއާ އެވޯޑުގެ އުސޫލު ފާސްކުރަން ބޭއްވި ޖަލްސާއެކެވެ. އެކަމަކު 10 މެމްބަރުން ބައިވެރިވި ޖަލްސާއިން ސަހުބާން ފިޔަވައި ބާކީ ތިބި ނުވަ މެމްބަރުން ވަނީ ޖަލްސާ ދޫކޮށް ވަޑައިގެންފަ އެވެ.
ޖަލްސާ ދޫކުރަން ނިންމެވި ސަބަބާ ގުޅިގެން މީޑިއާ ކައުންސިލުގެ ބޭފުޅަކު ނަން ނުޖަހާ ގޮތަށް "އަދަދު" ނޫހަށް ވިދާޅުވީ ޖަލްސާއިން "ވޯކް އައުޓް" ކުރަން ނިންމީ މެމްބަރުންގެ އިތުބާރު ނެތް ރައީސަކު ހުންނެވި ޖަލްސާއެއްގައި ބައިވެރިވާން ބޭނުން ނުވާތީ ކަމަށެވެ.
"ހުރިހާ މެމްބަރުން ވެސް ޖަލްސާ ދޫކޮށް ވަޑައިގެންނެވީ އިތުބާރު ނެތް ވާހަކަ ދެންނެވުމަށް ފަހު" އޭނާ ވިދާޅުވި އެވެ.
އިތުބާރު ނެތް ވާހަކަ އެ ވިދާޅުވަނީ، ޝަހުބާން މަގާމުގައި ބަހައްޓަން ފެނޭތޯ މިދިޔަ އާދިއްތަ ދުވަހު ނެގި ވޯޓާ ގުޅުވަ އެވެ. ކުއްލި ޖަލްސާއެއް ބާއްވާ ނެގި ވޯޓުގައި އަށް މެމްބަރަކު ވޯޓުލީ އޭނާގެ މަގާމުން ދުރުކުރާށެވެ. މަގާމުގައި ބަހައްޓަން ވޯޓު ދެއްވީ ހަތަރު މެމްބަރުންނެވެ.
އެމްއެމްސީގެ ގަވާއިދުތައް ހުންނަ ގޮތުން، ރައީސް މަގާމުން ދުރުކުރަން އެ ކައުންސިލުގެ 15 މެމްބަރުންގެ ތެރެއިން 10 މެމްބަރުންގެ ވޯޓު ބޭނުންވެ އެވެ.
މި ނޫހާ ވާހަކަދެއްކި އެމްއެމްސީގެ މެމްބަރު ވިދާޅުވީ، ނުރަސްމީކޮށް ވެސް ޝަހުބާން ގާތު އިސްތިއުފާދެއްވުމަށް ފަހު އެހެން ބޭފުޅަކަށް ފުރުސަތު ދެއްވަން އެދިވަޑައިގެންފައިވާ ކަމަށެވެ. މި މައްސަލައަށް އަވަސް ހައްލެއް ލިބިދާނެތޯ ސުވާލުކުރުމުން އޭނާ ވިދާޅުވީ އެ އުއްމީދު އެބައޮތް ކަމަށެވެ.
"އަލިމަގެއް ފެންނާނެ ކަމުގެ އުއްމީދު އެބައޮތް" އޭނާ ވިދާޅުވި އެވެ.
ޖިނާއި މައްސަލައެއްގައި ބޮޑު ތުހުމަތެއް ކުރެވުނު ނަމަވެސް އިސްތިއުފާ ދޭނެ ކަމުގެ އިޝާރާތެއް މިހާތަނަށް ޝަހުބާން ނުދެއްވަ އެވެ.
މި މައްސަލައިގައި ސަހުބާންގެ އިތުރުން ތުހުމަތުކުރަނީ އޭނާގެ ބޭބެ ކުރީގެ މަޖިލިސް މެމްބަރު އަލްހާން ފަހުމީއަށެވެ. އެކަމަކު ދެ ބޭފުޅުން ވެސް ވަނީ ހުރިހާ ތުހުމަތަކަށް އިންކާރުކޮށް، އެއްވެސް ބަޔަކަށް އޮޅުވާލާފައި ނުވާނެ ކަމަށް ވިދާޅުވެފަ އެވެ.
