މައުލޫމާތު ހޯދައި ލިބިގަތުމުގެ ގާނޫނުގެ ދަށުން، އޮންލައިންކޮށް މައުލޫމާތު ހޯދަން އެދުމަށް "މަހޯލި"ގެ ނަމުގައި ޕޯޓަލެއް އިންފޮމޭޝަން ކޮމިޝަނަރުގެ އޮފީހުން މިއަދު ތައާރަފްކޮށްފި އެވެ.
މައުލޫމާތު ހޯދައި ލިބިގަތުމުގެ ގާނޫނު 20 ވަނަ އަހަރު ވުޖޫދުވެގެން އައުމަށް ފަހު ވެސް، މައުލޫމާތު ހޯދަން އެދެމުން އައީ އެ ކަމަށް ބޭނުންވާ ފޯމު ފުރައިގެން، އިންފޮމޭޝަން ކޮމިޝަނަރުގެ އޮފީހަށް ހުށަހަޅައިގެންނެވެ. މި ކަމުގެ ސަބަބުން ރަށްރަށުން މި ހިދުމަތް ހޯދުމަށް ބޭނުންވާ ފަރާތްތަކުން ގިނަ ދަތިތަކަކާ ކުރިމަތިލާން ޖެހޭ ކަމަށް އެ އޮފީހުން ބުނެ އެވެ.
"މި ޕޯޓަލްގެ މައިގަނޑު ބޭނުމަކީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ކޮންމެ މީހަކަށްމެ ލިބިގެން މިވާ މި ހައްގު، މައުލޫމާތު ހޯދުމަށް އެދި ހުށަހެޅުމުގެ ހައްގު ވީހާ ވެސް ފަސޭހަ ގޮތެއްގައި އާންމުންނަށް ލިބޭނެ ގޮތް ހަދައި ދިނުން، އަދި އޭގެ އިތުރުން މައުލޫމާތު ހޯދަން ދައުލަތުގެ އިދާރާތަކުގައި އެދުމުން އެ މައުލޫމާތު ވީހާ ވެސް ފަސޭހަ ގޮތެއްގައި އެދުނު ފަރާތްތަކަށް ފޯރުކޮށްދޭނެ ގޮތެއް ފަހިކޮށްދިނުން،" ޕޯޓަލް ތައާރަފް ކޮށްދެއްވަމުން އިންފޮމޭޝަން ކޮމިޝަނަރު އަހުމަދު އާހިދު ރަޝީދު ވިދާޅުވި އެވެ.
ރާއްޖެއަކީ އިންޓަނެޓުގެ ހިދުމަތް ފުޅާކޮށް ބޭނުން ކުރާ ގައުމަކަށް ވުމުން އޮންލައިން ޕޯޓަލް ވެގެން ދާނީ، މި ހައްގު ހޯދުމުގައި އެއްވެސް ތަކުލީފެއް އުފުލަން ނުޖެހޭ ފަދަ ކަމަކަށް ކަމަށް އާހިދު ވިދާޅުވި އެވެ.
މަހޯލި ޕޯޓަލް ތައާރަފްކޮށްފައިވަނީ ދައުލަތުގެ 50 އަށް ވުރެ ގިނަ އިދާރާތައް ހިމަނައިގެންނެވެ. މީގެ ތެރޭގައި މިނިސްޓްރީތަކާއި ކޯޓުތަކާއި މިނިވަން މުވައްސަސާތަކުގެ އިތުރުން ލޯކަލް ކައުންސިލްތައް ވެސް ހިމެނޭނެ ކަމަށް އިންފޮމޭޝަން ކޮމިޝަނަރުގެ އޮފީހުން ބުނެ އެވެ. އެ އޮފީހުން ބުނީ ދައުލަތުގެ 800 އެއްހާ އިދާރާ ހުންނަ ކަމަށާއި އަމާޒަކީ މި އަހަރު ތެރޭގައި ހުރިހާ އިދާރާއެއް ޕޯޓަލްގައި ހިމެނުން ކަމަށް އެ އޮފީހުން ބުނެ އެވެ.
މަހޯލި ޕޯޓަލް ތައާރަފްކުރުމަށް ބޭއްވި ޕްރެސް ބްރީފިންގެ ތެރެއިން-- ފޮޓޯ: އަބްދުﷲ އިޔާން / އަދަދު
މީގެ އިތުރުން ގާނޫނުގައި ކަނޑައަޅައިފައިވާ މުއްދަތުގައި މައުލޫމާތު ފޯރުކޮށް ނުދޭނަމަ، އެ ކަމުގެ ޝަކުވާ ޕޯޓަލް މެދުވެރިކޮށް ކޮމިޝަނަށް ހުށަހެޅޭނެ އެވެ.
"ދައުލަތުގެ އިދާރާއަށް މައުލޫމާތަށް އެދި ހުށަހެޅުމުން އެ އިދާރާއަކުން އެ މައުލޫމާތު ދިނުމަށް އިންކާރު ކޮށްފި ކަމުގައި ވަންޏާ، ނުވަތަ ދިން މައުލޫމާތާ މެދު ހިތްހަމަ ނުޖެހޭ ކަމަށް ވަންޏާ، ގާނޫނުގައި ކަނޑައަޅާފައި އޮންނަ ގޮތަށް މުރާޖައާ ކުރުމަށް މުރާޖައާ ކޮމިޓީއަށް ވެސް ޕޯޓަލްއިން ހުށަހެޅޭނެ، އަދި މުރާޖައާ ކޮމިޓީން ނިންމާ ނިންމުމަށް ހިތްހަމަ ނުޖެހޭ ކަމަށް ވަންޏާ އިންފޮމޭޝަން ކޮމިޝަނަރުގެ އޮފީހަށް އިލްތިމާސްކުރުމަށް ޓަކައި ވެސް ޕޯޓަލްއިން ހުށަހެޅޭނެ،" އާހިދު ވިދާޅުވި އެވެ.
ކޮންމެ މީހަކަށް ވެސް ޕޯޓަލްގައި ރެޖިސްޓާކޮށްގެން މައުލޫމާތު ހޯދަން އެދެވޭއިރު، ޕޯޓަލް މެދުވެރިކޮށް ގާނޫނުގެ ދަށުން މައުލޫމާތު ހޯދުމުގެ ހުރިހާ މަރުހަލާއަކަށް ވެސް ހުށަހެޅޭނެ އެވެ. އަދި އެ މީހަކު ކޮށްފައިވާ ހުރިހާ ރިކުއެސްޓުތަކެއް ފެންނަން ހުންނައިރު، ހުރިހާ އަޕްޑޭޓެއް ވެސް ފެންނަމުން ދާނެ އެވެ.
މަހޯލި ޕޯޓަލް ތައާރަފްކުރުމަށް ބޭއްވި ޕްރެސް ބްރީފިންގެ ތެރެއިން-- ފޮޓޯ: އަބްދުﷲ އިޔާން / އަދަދު
ޕޯޓަލް މެދުވެރިކޮށް މައުލޫމާތު ހޯދަން ހުށަހެޅުމުން، އީމެއިލް މެދުވެރިކޮށް އެ ކަން ދައުލަތުގެ އިދާރާތަކުގެ އިންފޮމޭޝަން އޮފިސަރުންނަށް އަންގާނެ އެވެ. އިދާރާތަކުގެ އިންފޮމޭޝަން އޮފިސަރުން ޖަވާބު ދޭނީ ވެސް ޕޯޓަލް މެދުވެރިކޮށެވެ. ޕޯޓަލްގެ މަސައްކަތް އިތުރަށް ހަރުދަނާކޮށް، ފަސޭހަ ކުރުމަށް ދައުލަތުގެ އިދާރާތަކުގެ އިންފޮމޭޝަން އޮފިސަރުން ތަމްރީނު ކުރަމުން އަންނަ ކަމަށް އައިކޮމް އޮފީހުގެ ސެކްރެޓަރީ ޖެނެރަލް އިދުރީސް އިސްމާއީލް ވިދާޅުވި އެވެ.
އޮންލައިން އެ ޕޯޓަލް ބޭނުން ކުރަން ފެށި ނަމަވެސް, ފޯމް ފުރައިގެން ވެސް މައުލޫމާތަށް އެދެވޭނެ އެވެ.
