ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ބޮމުގެ ހަމަލާއެއް ދިންތާ އަހަރެއް ވެގެން ދިޔައިރު ވެސް އިންސާފު ގާއިމް ކުރުން ލަސްވެގެން ދާތީ އެމަނިކުފާނުގެ އާއިލާއިން ކަންބޮޑުވުން ފާޅުކޮށް ބަޔާނެއް ނެރެފި އެވެ.

ރައީސް ނަޝީދުގެ އާއިލާގެ ފަރާތުން މިއަދު ނެރުނު ބަޔާނެއްގައި ވަނީ، އެ މައްސަލާގައި ހިމެނޭ މީހުންގެ ޝަރީއަތްތައް ދިގުލައިގެންދާއިރު، ހަމަލާ ހިންގުމަށް ފައިސާ ހަރަދު ކުރި ފަރާތްތައް ހޯދުމަށް ޓަކައި ވަރުގަދަ ތަހުގީގެއް އަދިވެސް ހިންގުމަށް އާއިލާއިން އެދޭ ކަމަށެވެ.

"ހަމަލާގެ ބައިވެރިން ހައްޔަރުކޮށް ދައުވާކޮށްފައިވާއިރު ހަމަލާގެ ކުރީ ސަފުގައި ފެނިލި މީހުންގެ ފުރަގަހުގައި ތިބި ފަސް ހަނގުރާމަވެރިންނާ މެދު އަހައްމިއްޔަތު ކަން ދީފައި ނުވާތީ ވެސް ކަންބޮޑުވަމެވެ. މައްސަލައާ ގުޅޭ ގުޅުންތައް ތަނަވަސް ގޮތެއްގައި ތަހްގީގް ކޮށްފައި ނެތުމުން," އާއިލާގެ ބަޔާނުގައިވެ އެވެ.

މެއި 6، 2021 ގެ ރޭ އިރާކޮޅު ނަޝީދު ގ. ކެނެރީން ނުކުމެވަޑައިގެން މަޖީދީ މަގުގައި މަޑުކޮށްގެން އޮތް އެމަނިކުފާނުގެ ކާރުކޮޅަށް އަރައިވަޑައިގަންނަވަން ބޮޑީގާޑުންނާއެކު ވަޑައިގަންނަވަނިކޮށް ދިން ހަމަލާގައި އެމަނިކުފާނުގެ އިތުރަށް ބައެއް ބޮޑީގާޑުންނާއި ބައެއް އާންމުންނަށް ވެސް އެކި ވަރުގެ އަނިޔާ ލިބުނެވެ.

މި ހަމަލާއަށް ފަހު، ނަޝީދުގެ ސެކުއިރިޓީ ވަރުގަދަ ކޮށްފައިވާއިރު، އޭގެ ސަބަބުން ސިޔާސީ ލީޑަރެއްގެ ހައިސިއްޔަތުން އެމަނިކުފާނު ހިންގަވަމުން ގެންދެވި ހަރަކާތްތައް ހަނިވެފައިވާ ކަމަށް އާއިލާއިން ނެރުނު ބަޔާނުގައިވެ އެވެ.

"ސިޔާސީ ގޮތުންނާއި، އަދި ގާތް ތިމާގެ މީހުންނާއި ރަހްމަތްތެރިންނާ އެކު އެމަނިކުފާނު ކުރައްވާން އެދިވަޑައިގަންނަވާ މުއާމަލާތްތަކަށް ހުރަސް އެޅިފައިވޭ،" އެ ބަޔާނުގައިވެ އެވެ.

ނަޝީދުގެ އާއިލާގެ މެމްބަރުންނާއެކު އެމަނިކުފާނު ނަންގަވާފައިވާ ފޮޓޯއެއް. ހަމަލާއަށް އަހަރެއް ވާއިރު ވެސް އިންސާފު ނުލިބޭތީ އާއިލާގެ ކަންބޮޑުވުން އެބައޮތް

ނަޝީދު ޒަހަމްވެފައިވަނިކޮށް އެމަނިކުފާނު ހޮސްޕިޓަލަށް ގެންދިޔަ ބޮޑީގާޑުންނާއި، އެމަނިކުފާނަށް ފުރަތަމަ ފަރުވާ ދިން އޭޑީކޭގެ ޑޮކްޓަރުންނަށް އާއިލާއިން ޝުކުރު އަދާކޮށްފައިވެ އެވެ. ހަފުތާއެއްހާ ދުވަހު ކުރި އެތައް އޮޕަރޭޝަންތަކަށް ފަހު ނަޝީދު ސަލާމަތްވީ ހަނި ގޮތަކަށެވެ.

މި ހަމަލާއާ ގުޅިގެން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އިން ބޮޑު އިންކުއަރީއެއް ހިންގުމަށް ފަހު 40 އަށް ވުރެ ގިނަ ހުށަހެޅުންތައް ވެސް ސަރުކާރަށް ހުށަހެޅި އެވެ. އެއިން ބައެއް ކަންކަމަށް ފިޔަވަޅު އަޅާފައިވާއިރު ބައެއް ކަންކަން އަދިވެސް ތަންފީޒެއް ނުވެ އެވެ.

އެއީ ރާއްޖޭގައި މިހާތަނަށް ގޮއްވާލި އެންމެ ބާރުގަދަ އައިއީޑީ ކަމަށް ރަސްމީ އިދާރާތަކުން ބުނާއިރު، މި ބޮން ހަދާފައި ވަނީ ބާޒާރުން އާންމުކޮށް ލިބެން ހުރި ބާވަތްތައް ބޭނުންކޮށްގެންނެވެ. އޭގެއިން ދޭ ގެއްލުން ބޮޑުކުރަން އަޅާފައި ހުރީ ރޭޒާ ފުއްތަކެކެވެ.

ނަޝީދަށް ހަމަލާ ދިނުމުގެ ފަހަތުގައި ތިބީ ދީނީ ގޮތުން ހަރުކަށި ފިކުރުގެ ބަޔަކު ކަމަށް ތަހުގީގީ އިދާރާތަކުން ބުނެ އެވެ. އޭގެ ތެރެއިން ހުކުމް އިއްވުނީ ހަމަލާ ދޭން އަތަމަ ޕެލޭސް ކައިރީ ރިމޯޓު ހިފައިގެން ހުރެ، އެ ރިމޯޓް މެދުވެރިކޮށް ބޮން ގޮއްވާލި އަދުހަމްގެ މައްޗަށް އެކަންޏެވެ. އަދުހަމް ކުށަށް އިއުތިރާފް ވެފައިވެ އެވެ. ދެން ވެސް އިތުރު ހަ މީހެއްގެ މައްޗަށް ދައުވާ އުފުލައިގެން އޭގެ ޝަރީއަތް ކޯޓުގައި ފެށި އެވެ.

މީގެ ކުރިން ދީނީ އިލްމުވެރިޔާ އަދި ރައްޔިތުންގެ މަޖިލީހުގެ ކުރީގެ މެންބަރު ޑރ. އަފްރާޝީމް އަލީއާއި، ނޫސްވެރިޔާ އަހްމަދު ރިލްވާންއާއި، ބްލޮގަރު ޔާމީން ރަޝީދުގެ މަރުގެ ފަހަތުގައި ވެސް ތިބީ އެ ވިސްނުމުގެ ޓެރަރިޒަމް ހިންގަން ތިބި ބަޔަކު ކަމަށް ތުހުމަތު ކުރެ އެވެ.