ކުރިއަށް އޮތް ރޯދަ މަހުގައި މާލެ ސިޓީ ކައުންސިލުން ބާއްވަން ނިންމާފައިވާ ޕާކް ވޮލީބޯޅަ މުބާރާތުގައި 26 ޓީމަކުން ބައިވެރިވެފައިވާ ކަމަށް މާލެ ސިޓީ ކައުންސިލުން ބުނެފި އެވެ.
މުބާރާތުގައި ބައިވެރިވުމުގެ މުއްދަތު ހަަމަވިއިރު، ޖުމްލަ 26 ޓީމު ބައިވެރިވިއިރު، އޭގެ ތެރެއިން 14 ޓީމަކީ ފިރިހެން ޓީމުތަކެވެ. އަދި އަންހެން 12 ޓީމެއް ވަނީ ބައިވެރިވެފަ އެވެ. މާލެ ސިޓީ ކައުންސިލުން ބުނީ މުބާރާތް ފަށަން ނިންމާފައި އޮތީ އަންނަ މަހުގެ ހަތް ވަނަ ދުވަހު ކަމުގައި ވިޔަސް އަދި އެ ތާރީހު އެއްކޮށް ފައިނަލް ނުވާ ކަމަށެވެ. މުބާރާތުގެ ޝެޑިއުލް ރާވާއިރު މާލެ ސިޓީ ކައުންސިލްގެ ވިސްނުމަކީ ރޯދަ މަހުގެ ފަހު 10 ގެ ކުރިން ނިންމާލުމެވެ.
"އަދަދު" އަށް އެނގިފައިވާ ގޮތުގައި ރާއްޖޭގެ ވޮލީބޯޅައިގެ އެކްޓިވް ގިނަ ކްލަބްތަކެއް ވަނީ މި މުބާރާތުގައި ބައިވެރިވެފަ އެވެ. އަދި މުބާރާތުގެ ފައިސާގެ އިނާމް ބޮޑުވުމާ އެކު ގިނަ ޓީމުތަކުން ސްޕޮންސަރުން ހަމަޖައްސައިގެން ވަރަށް ފޯރީގައި އަންނަނީ ތައްޔާރުވަމުންނެވެ.
މީގެ ކުރިން އެޗްޑީސީން ވަނީ ދެ ފަަހަރެއްގެ މަތިން ޕާކް ވޮލީ މުބާރާތް ބާއްވައިފަ އެވެ. މި ފަހަރު މާލެ ސިޓީ ކައުންސިލުން ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)އާ ގުޅިގެން މި ބާއްވާ ޕާކް ވޮލީ މުބާރާތަކީ ރާއްޖޭގައި މިހާތަނަށް ބޭއްވޭ އެންމެ އަގުބޮޑު ޕާކް ވޮލީ މުބާރާތެވެ.
އަންހެން އަދި ފިރިހެން ޑިވިޝަން ވަކިން ކުރިއަށްގެންދާ ގޮތަށް ހަމަޖެހިފައިވާއިރު، ކޮންމެ ޑިވިޝަނެއްގެ ގަދަ ފަސް ޓީމު ހޮވާ ގޮތަށް ވަނީ ނިންމައިފަ އެވެ. ކޮންމެ ޑިވިޝަނެއްގެ އެއްް ވަނަ ޓީމަށް 45،000 ރުފިޔާ ދޭ ގޮތަށް ނިންމާފައިވާއިރު، ދެ ވަނަ ޓީމަށް 25،000 ރުފިޔާ ދޭނެ އެވެ. ތިން ވަނަ އަށް 15،000 ރުފިޔާ ދޭއިރު، ހަތަރު ވަނަ ޓީމަށް 10،000 ރުފިޔާ ދޭނެ އެވެ. އަދި ފަސް ވަނަ ހޯދާ ޓީމަކަށް 5000 ރުފިޔާ ދޭނެ އެވެ. މީގެއިން ކޮންމެ ވަނަ އަކަށް ފައިސާގެ އިނާމާއި ސެޓްފިކެޓެއް ދޭނެ އެވެ. ޓްރޮފީ ދޭނީ ކޮންމެ ޑިވިޝަނެއްގެ ޗެމްޕިއަން ޓީމަށް އެކަންޏެވެ.
މުބާރާތުގެ ގަވާއިދުގައިވާ ގޮތުން މުބާރާތުގައި ބައިވެރިވެވޭނީ ކޮމިޝަނާ އޮފް ސްޕޯޓްސްގައި ރަޖިސްޓްރީވެފައިވާ ކްލަބް/ޖަމިއްޔާތަކަށެވެ.
