މީހުންނާއި ވެހިކަލުން ފުރި ތޮއްޖެހިފައިވާ މާލެއިން 1000 ޕާކިން ސްލޮޓް އަމިއްލަ ފަރާތްތަކަށް އުމުރު ދުވަހަށް ވިއްކުމަށް ނިންމައި އެ މަސައްކަތަށް ސިޓީ ކައުންސިލުން ތައްޔާރުވަމުން އަންނަކަން އެނގިއްޖެ އެވެ.

ޕާކިން ސްލޮޓުތަކެއް ދޫކުރުމަށް އާ އުސޫލެއް ތައްޔާރު ކުރަމުން އަންނަ ކަމަށް މާލެ ސިޓީ ކައުންސިލުން މިއަދު ބުންޏެވެ. ނަމަވެސް ރަސްމީކޮށް އެކަމާ ގުޅޭ ގޮތުން ވާހަކައެއް ނުދައްކަ އެވެ.

އެކަމަކު، 1000 ޕާކިން ސްލޮޓު އުމުރު ދުވަހަށް ވިއްކަން ތައްޔާރުވަމުން އަންނަ ކަމަށް އެ ކައުންސިލުގެ މެމްބަރަކު މި ނޫހަށް ޔަގީންކޮށްދިނެވެ. އަދި ޓްރާންސްޕޯޓް މިނިސްޓްރީ އާއި ފުލުހުންގެ ހިދުމަތުގެ އޮފިޝަލަކު ވެސް އެކަން ޔަގީންކޮށްދިނެވެ.

އެނގިފައިވާ ގޮތުގައި ޕާކިން ސްލޮޓުތައް ވިއްކުމަށް އިއުލާން ކުރަން ހަމަޖެހިފައި އޮތީ މި ހަފްތާގެ ތެރޭގަ އެވެ. ނަމަވެސް ސިޓީ ކައުންސިލްގެ ނިންމުން ތަންފީޒުވިޔަ ނުދިނުމަށް ސަރުކާރުގެ ބައެއް އިދާރާތަކުން މަސައްކަތް ކުރަމުން އަންނަ ކަމަށް ވެސް މި ނޫހާ ވާހަކަ ދެއްކި ފަރާތްތަކުން ބުންޏެވެ.

ޕާކު ކުރުމަށް ހާއްސަ ޒޯނުތަކެއް ކަނޑައަޅައި، އެތަންތަނުން ފީ ނެގުމުގެ އިހްތިޔާރު އެއްގަމު އުޅަނދު ޕާކު ކުރުމުގެ ގަވާއިދުގެ ދަށުން ސިޓީ ކައުންސިލަށް ލިބެ އެވެ. ނަމަވެސް ޕާކިން ސްލޮޓު ވިއްކޭނެ ކަމަށް ގަވާއިދުގައި ބުނެފައެއް ނެތެވެ.

މާލެއިން 1000 ޕާކިން ސްލޮޓު ވިއްކުމަށް މަސައްކަތް މި ކުރަނީ ޕާކިން ސްލޮޓުތަކެއް ގުރުއަތު ނަގައިގެން ދޫކުރުމަށް ނިންމި ނިންމުން ބަދަލު ކުރުމަށްފަހު އެވެ. ގާތްގަނޑަކަށް 211 ޕާކިން ޖާގަ ދޫކުރުމަށް ނިންމާފައި އޮއްވާ އެ މަސައްކަތް ހުއްޓާލީ އޭގައި މައްސަލަތަކެއް ހުރުމުން އެންޓި ކޮރަޕްޝަން ކޮމިޝަނުން އަންގައިގެނެވެ.

ޕާކިން ސްލޮޓުތައް ވިއްކުމަށް މަސައްކަތް ކުރާއިރު ޕާކު ކުރާނެ ޖާގަ ނެތުމަކީ ގާތްގަނޑަކަށް 150،000 މީހުން ދިރިއުޅޭ މާލެއަށް ދިމާވެފައިވާ އިޖްތިމާއީ އެންމެ ބޮޑު އެއް މައްސަލަ އެވެ. އދ. ގެ އޮފީހަކުން ރާއްޖޭގައި ހެދި ދިރާސާއަކުން ދައްކާ ގޮތުގައި ހައެއްކަ އަކަ ކިލޯމީޓަރުގެ ކުޑަ މާލޭގައި އެކަނި ވެސް 72،000 ވެހިކަލް ދުއްވަ އެވެ. ރަސްމީ ތަފާސްހިސާބުތަކުން ދައްކާ ގޮތުގައި 2018 ވަނަ އަހަރުގެ ނިޔަލަށް މާލެއަށް އެކަނި 82،000 ސައިކަލު ރަޖިސްޓްރީކޮށްފައިވެ އެވެ.