ކޮވިޑް-19 ޖެހިފައި ހުރި މީހަކާ ދިމާވެފައި ހުރި ނަމަވެސް ވެކްސިންގެ ޑޯޒުތައް ފުރިހަމަކޮށްފައިވާ މީހުން ކަރަންޓީނުވާން ނުޖެހޭ ގޮތަށް ހެލްތު ޕްރޮޓެކްޝަން އެޖެންސީން މިއަދު ހަމަޖައްސައިފި އެވެ.
އެޗްޕީއޭއިން ނެރުނު އިއުލާނެއްގައި ބުނީ ކޮވިޑް ޖެހިފައި ހުރި މީހަކާ ދިމާވެފައި ހުރި ނަމަވެސް، ދިމާވި މީހާގެ ފަރާތުން ބަލީގެ އަލާމާތެއް ނުފެންނަ ނަމަ އެކަހެރިވާންނުޖެހޭނެ ކަމަށެވެ. ނަމަވެސް މި ގޮތަށް އަމަލު ކުރެވޭނީ ވެކްސިންގެ ތިން ޑޯޒު ވެސް ފުރިހަމަކޮށްފައި ތިބި މީހުންނަށް ކަމަށް އިއުލާނުގައިވެ އެވެ.
ކޮވިޑު ޖެހިފައި ހުރި މީހަކާ ދިމާވެފައިވާ ފަރާތެއްގެ ހަށިގަނޑުން ބަލީގެ އަލާމާތެއް ހުރި ނަމަވެސް ޕީސީއާރް ނުވަތަ އެންޓިޖެން ޓެސްޓެއް ހަދައިގެން ބަލި ނުޖެހޭކަން ކަށަވަރުވެއްޖެ ނަމަ ކަރަންޓީނުވާން ނުޖެހޭނެ ކަމަށް ވެސް އެޗްޕީއޭއިން ބުންޏެވެ. އެކަމަކު ޓެސްޓުގެ ނަތީޖާ ލިބެންދެން ހުންނަންޖެހޭނީ އެހެން މީހުންނާ އެކަހެރިވެގެން ކަމަށް އެޗްޕީއޭއިން ބުނެ އެވެ.
ބަލި މީހުންނާ ދިމާވެފައި ތިބި މީހުން ކަރަންޓީނުވާން ނުޖެހުނު ނަމަވެސް، ބަލި މީހާއާ އެންމެ ފަހުން ދިމާވި ތާރީހުން ފެށިގެން ފަސް ދުވަސް ހަމަވުމުން ޕީސީއާރް ނުވަތަ އެންޓިޖެން ޓެސްޓެއް ހަދަންޖެހޭނެ ކަމަށް އެޗްޕީއޭއިން ބުންޏެވެ.
ކޮވިޑު ޖެހިފައި ތިބި މީހުންނާ ބައްދަލުވާ މީހުން ބައްޔަށް ޕޮޒިޓިވްނުވި ނަމަވެސް ބަލިޖެހައި ހުރި މީހަކާ އެކީގައި ދިރިއުޅޭ ނަމަ އެމީހަކު ވެސް ކަރަންޓީނުވާންޖެހޭނެ ކަމަށް އެޗްޕީއޭގެ އިއުލާގައި ބުނެފައިވެ އެވެ. އަދި ކަރަންޓީނުގެ މުއްދަތު ނިމުމުން ބައްޔަށް ޓެސްޓު ކުރަންޖެހޭނެ ކަމަށް ވެސް އެޗްޕީއޭއިން ބުނެ އެވެ.
ކޮވިޑް ޖެހޭ މީހުންނާ ބައްދަލުވާ މީހުން ކަރަންޓީނުވާންނުޖެހޭ ގޮތަށް ހަމަޖައްސާފައި މި ވަނީ ބަލި ޖެހޭ މީހުންގެ ކަރަންޓީނު މުއްދަތު 14 ދުވަހުން ހަތް ދުވަހަށް ކުޑަކޮށްފައި އޮއްވަ އެވެ.
އެޗްޕީއޭއިން ރޭ ހާމަކުރި ހިސާބުތަކަށް ބަލާއިރު އިއްޔެ 2754 މީހުންނަށް ވަނީ ކޮވިޑް ޖެހިފަ އެވެ. އެއާއެކު ކޮވިޑްޖެހިފައި ތިބި މީހުންގެ އަދަދު 17770 އަށް އުފުލުނީ އެވެ. އޭގެ ތެރެއިން ބަލިބޮޑުވެގެން 63 މީހަކަށް ފަރުވާދެމުން އަންނަނީ ހޮސްޕިޓަލުގަ އެވެ.
