މެންޗެސްޓާ (ޖެނުއަރީ 30) - މެންޗެސްޓާ ޔުނައިޓެޑްގެ ފޯވާޑް މޭސަން ގްރީންވުޑް، ގެވެށި އަނިޔާގެ މައްސަލައަކާ ގުޅިގެން ހައްޔަރުކޮށްފި އެވެ.
ސޯޝަލް މީޑިއާ ޕްލެޓްފޯމް އިންސްޓަގްރާމްގައި ގްރީންވުޑްގެ ލޯބިވެރިޔާ، މިއަދު ވަނީ ގްރީންވުޑް ގެވެށި އަނިޔާކުރިކަން ދައްކުވައިދޭ ފޮޓޯތަކަކާއި ވޮއިސް ނޯޓެއް އާންމުކޮށްފަ އެވެ. ފޮޓޯތަކުން ފެންނަ މަންޒަރުތަކަށް ބަލާއިރު، ގްރީންވުޑްގެ ލޯބިވެރިޔާ އަނގަމަތި ފަޅައިގެން ގޮސް ލޭ އޮހޮރެ އެވެ. އަދި ދައުރުވަމުން އަންނަ ވޮއިސް ނޯޓުން އިވޭ އަޑުތަކަށް ބަލާއިރު، ގްރީންވުޑް، އޭނާގެ ލޯބިވެރިޔާގެ ނުރުހުމުގައި ކަންތައްތަކެއް ކުރަން އުޅޭ އަޑުއިވެ އެވެ.
މި މައްސަލައިގައި މެންޗެސްޓާ ސަރަހައްދުގެ ފުލުހުން މިރޭ ވަނީ ގްރީންވުޑް ހައްޔަރުކޮށްފަ އެވެ.
މެންޗެސްޓާ ފުލުހުންގެ ތަރުޖަމާނު މެދުވެރިކޮށް ނެރުނު ބަޔާނެއްގައި ބުނެފައިވަނީ، ސޯޝަލް މީޑިއާގައި އާންމުވި ގެވެށި އަނިޔާގެ މައްސަލައެއްގައި 20 އަހަރުގެ ފިރިހެނަކު ހައްޔަރުކޮށްފައިވާ ކަމަށެވެ. އަދި އޭނާ ހައްޔަރުކޮށްފައިވަނީ ގެވެށި އަނިޔާ އާއި ރޭޕްގެ މައްސަލައަކާ ގުޅިގެން ކަމަށާއި ތަހުގީގު ނިމެންދެން މި ވަގުތަށް އޭނާ (ގްރީންވުޑް) ހައްޔަރުގައި ބަހައްޓަން ނިންމާފައިވާ ކަމަށެވެ.
އިންސްޓަގްރާމާއި ޓްވިޓާ އަދި ފޭސްބުކްގައި ގްރީންވުޑްގެ މި އަމަލުތަކާ ބެހޭގޮތުން ގިނަ ބަޔަކު ވާހަކަ ދައްކަން ފެށުމާ އެކު ޔުނައިޓެޑުން ވަނީ ބަޔާނެއް ނެރެފަ އެވެ. ޔުނައިޓެޑުން ވަނީ އެއްވެސް ބާވަތެއްގެ ހަމަނުޖެހުމަކީ ޔުނައިޓެޑުން ބަލައިގަންނާނެ ކަމެއް ނޫން ކަމަށެވެ.
ޔުނައިޓެޑުން ފަހުން ނެރުނު ބަޔާނެއްގައި ބުނެފައިވަނީ ވަކި ގޮތެއް އަންގަންދެން ގްރީންވުޑަށް ޔުނައިޓެޑްގެ ޕްރެކްޓިހާއި މެޗުތަކުގައި ބައިވެރިނުވެވޭނެ ކަމަށެވެ. ރިޕޯޓްތައް ބުނާގޮތުން ޔުނައިޓެޑްގެ ގިނަ ކުޅުންތެރިންތަކެއް ވަނީ ސޯޝަލް މީޑިއާގައި ގްރީންވުޑްގެ ރަސްމީ އެކައުންޓަކުން ވަކިވެފަ އެވެ. އޭގެ ތެރޭގައި ކްރިސްޓިއާނޯ ރޮނާލްޑޯ، ޕައުލް ޕޮގްބާ، ޑޭވިޑް ޑެހެއާ އަދި އަލެކްސް ޓެލޭސް ހިމެނޭ ކަމަށް ރިޕޯޓްތައް ބުނެ އެވެ.
މީގެ ކުރިން ވެސް އަންހެން ކުއްޖަކާ ގުޅޭ މައްސަލައެއްގައި ގްރީންވުޑަށް ވަނީ އިންގްލެންޑް ގައުމީ ޓީމުން ފިޔަވަޅު އަޅައިފަ އެވެ. އިންގްލެންޑް ގައުމީ ޓީމާ އެކު 2020 ވަނަ އަހަރު އައިސްލެންޑަށް ގޮސް، ޓީމު ހޮޓަލަށް އަންހެން ކުދިން ގެނައި މައްސަލައެއްގައި ގްރީންވުޑާއި މެންޗެސްޓާ ސިޓީގެ ފިލް ފޯޑެން އަށް ވަނީ ފިޔަވަޅު އަޅައިފަ އެވެ.
