އައްޑޫގައި ހިންގާ އޭޝިއަން އެކަޑެމީ އޮފް އެރޮނޯޓިކްސް (އޭއޭއޭ) ގައި ޕައިލެޓް ކޯސް ހަދަމުން އަންނަ ދަރިވަރުން ކަންބޮޑުވުންތައް ހިފައިގެން، މާލޭ އެވިޑް ކޮލެޖްގެ އިސް ވެރިންނާ ބައްދަލުކޮށްފި އެވެ.
ގާތްގަނޑަކަށް ވިއްސަކަށް ދަރިވަރުންގެ އެ ގްރޫޕުން މިއަދު އެވިޑް ކޮލެޖްގެ އިސްވެރިންނާ ބައްދަލުކުރީ އެ ކޮލެޖުން، އޭއޭއޭ މެނޭޖުކުރުމަށް ސޭލްސް ޕާޗޭސް އެގްރީމެންޓެއް ހަދައި، އެ އެއްބަސްވުމުގެ ދަށުން އައްޑޫ ފްލައިން ސްކޫލު ހިންގުމާ ހަވާލުވާން މަސައްކަތްކުރަމުން އަންނަނިކޮށެވެ.
ގަތުމުގެ އެގްރިމެންޓެއް ހެދި ނަމަވެސް އެވިޑް ސްކޫލް އޮފް އޭވިއޭޝަންގެ ފެކަލްޓީގެ ނަމުގައި އެވިޑް ކޮލެޖުން ހިންގަން ނިންމާފައިވާ އައްޑޫ ފްލައިން ސްކޫލުގެ އެއްވެސް ކަހަލަ ލައިސެންސްއެއް ހޯދުމަށް އެ ކޮލެޖުން މިހާތަނަށް ސަރުކާރުގެ ރަސްމީ އިދާރާއެއްގައި އެދިފައެއް ނުވެ އެވެ.
މިއަދު 2 ޖެހިއިރު އޮތް ބައްދަލުވުމުގައި އެވިޑް ކޮލެޖުގެ ޗެއާމެން އަބްދުﷲ މުސްތާގް ރަޝާދު ދަރިވަރުންނާ ބައްދަލުކޮށް އެ ދަރިވަރުންގެ ހުރި ގިނަ ކަންބޮޑުވުންތަކާ ގުޅޭގޮތުން ވާހަކަ ދެއްކެވިކަމަށް ބައްދަލުވުމުގައި ބައިވެރިވި ދަރިވަރަކު "އަދަދު" އަށް ބުންޏެވެ.
އެހެން ނަމަވެސް އެ ކަންބޮޑުވުންތަކަށް އެއްވެސް ކަހަލަ ހައްލެއް ލިބުމުގެ ކޮޅުމައްޗެއް އަދި ނެތް ކަމަށާއި ދަރިވަރުން އުފުލި ޝަކުވާތަކަށް އެވިޑް ކޮލެޖުގެ ފަރާތުން އެދެވޭ އެއްވެސް ޖަވާބެއް ނުލިބުނު ކަމަށް އެ ދަރިވަރު ބުންޏެވެ.
"ބައްދަލުވުމުގައި (ކުރެވުނު) 85 ޕަސެންޓް ސުވާލަށް ޖަވާބެއް ނުދެވުނު އިނގޭތޯ،" އޭނާ ބުންޏެވެ.
މިއަދު އޮތް ބައްދަލުވުމުގައި ދަރިވަރުން ވަނީ އެ ކުދިން ކިޔެވުމަށްޓަކައި އޭއޭއޭ އަށް ދައްކާފައިވާ ފައިސާގެ ރީފަންޑް ލިބޭނޭ ގޮތެއް ހަމަޖައްސައިދިނުމަށް ވެސް އެދިފަ އެވެ.
"އެ ފައިސާ އަޅުގަނޑުމެންނަށް ލިބޭނެތޯ އެހުމުން ބުނީ ކޯސް ޑްރޮޕް ކުރަންށޭ ޖެހޭނީ. އެކަމަކު އަޅުގަނޑުމެންނަށް ނުލިބޭ ހިދުމަތަކަށް ފައިސާ ނަގައިގެން ނުވާނެއެއް ނޫންތޯ؟،" ދަރިވަރު ބުންޏެވެ.
އައްޑޫ ފްލައިން ސްކޫލުގެ ދަރިވަރުން އެވިޑް ކޮލެޖާއެކު ބޭއްވި ބައްދަލުވުމުގެ ތެރެއިން. --ފޮޓޯ: އަދަދު
ރީފަންޑު މައްސަލައިގައި ދަރިވަރުން އެވިޑް ކޮލެޖަށް އީމެއިލް ކުރުމަށް ކޮލެޖުން އެދުނުކަމަށް އެ ދަރިވަރު ބުންޏެވެ.
މީގެ އިތުރުން ވެސް އެވިޑް ކޮލެޖުން އޭއޭއޭ އާ ހަވާލުވުމަށްފަހު ދަރިވަރުންނަށް މޮކް އިމްތިހާނެއް ހަދަން ދޭން އުޅުމުން އެކަމުގެ ކަންބޮޑުވުން ވެސް ދަރިވަރުން ހިއްސާކުރި އެވެ. އަދި އައްޑޫގައި ސްކޫލް ހިންގޭނެ ފުރުސަތެއް ނެތް ކަމަށާއި އެތަނުގައި ކުދިންގެ ކޯސް ނިންމަން ބޭނުންވާ މަތިންދާބޯޓެއް ނެތްކަމުގެ ޝަކުވާ ވެސް ދަރިވަރުން ވަނީ އުފުލައިފަ އެވެ.
"މުސްތާގް ވިދާޅުވީ އެހެން ދަތިކަމެއް އުޅެންޏާ އަންގާލަދޭށޭ ކޮލެޖަށް. އެކަމަކު އެއީ ކޮން ހައިސިއްޔަތެއްގެ ބައެއް ކަމެއްވެސް ނޭނގެ އަޅުގަނޑުމެންނަށް އަދި. މޮކް އެގްޒާމް ހެދުމަކީ ދަރިވަރުންނަށް ފަސޭހައަކަށް ކުރި ކަމެއްކަމަށްވެސް މުސްތާގު ވިދާޅުވި،" ދަރިވަރަކު ބުންޏެވެ.
އެވިޑް ކޮލެޖުން އައްޑޫ ނޫން އެހެން ތަނެއްގައި ފްލައިން ސްކޫލު ހިންގަން ވިސްނާ ވާހަކަ ބުނި ކަމަށް ވެސް ދަރިވަރަކު މައުލޫމާތު ދިނެވެ.
"އެވިޑް ކޮލެޖުން މިހާރު ތިބީ ސަރުކާރުން އެ މަސައްކަތް ކުރިޔަށް ގެންދިޔުމަށް އިޝާރާތެއް ކުރަންދެން ކަމަށް ވެސް ކޮލެޖުން ބުނީ."
މިއަދުގެ ބައްދަލުވުމާ ގުޅިގެން އެވިޑް ކޮލެޖުގެ ފަރާތުން ރަސްމީކޮށް ބަހެއް ލިބޭ ގޮތް ވަނީ ނުވެފަ އެވެ.
އޭއޭއޭއިން ކިޔަވަމުން އަންނަ 178 ދަރިވަރުންގެ ކިޔެވުން ފުރިހަމަ ނުވެ ގިނަ ދުވަސްވާ މައްސަލަ ހައްލުކުރަން ސަރުކާރުން ވަރަށް ބޮޑަށް މަސައްކަތްކުރި އެވެ. އެކަމަކު މި މައްސަލަ ހައްލު ނުވެ ގިނަ ދަރިވަރުންގެ ކިޔެވުންތައް ހުއްޓިފައި އޮންނަތާ ދޮޅު އަހަރު ވެއްޖެ އެވެ. ކޯސް ފުރިހަމަ ނުކުރެވި ހަތަރު އަހަރެއްހާ ދުވަސްވެފައި ތިބި ކުދިން ވެސް އެބަ ތިއްބެވެ. ދެހާސް ނުވަ ވަނަ އަހަރުން ފެށިގެން އޮޕަރޭޓް ކުރަމުން އަންނަ ސްކޫލުގައި ގެންގުޅުނު 14 ބޯޓު ވެސް އޮތީ ހަލާކުވެފަ އެވެ.
ދަރިވަރުންގެ ޝަކުވާ އަކީ ތަފާތުކުރުން ގެންގުޅުމެވެ. އަދި ދަރިވަރުންގެ އަތުން ފައިސާ ނެގުމަށް ފަހު ކޯސްތައް ދިގު ދަންމާކަމުގެ ޝަކުވާތައް ވެސް ކޮށްފައިވެ އެވެ.
