Advertisement

މިނިވަންކަމުގެ ދިފާއުގައި ދިވެހީން ނިކުތުމަށް ދައުވަތުދީ ޕީޕީއެމުން ކެމްޕޭނެއް ފަށައިފި

30 ޖުލައި 2021 - 23:33 0

ފާތިމަތު އަޖްފާން

ފާތިމަތު އަޖްފާން

މިނިވަންކަމުގެ ދިފާއުގައި ދިވެހިން" އިފުތިތާހު ކުރުމަށް ޕީޕީއެމުން މިރޭ ބޭއްވި ޖަލްސާގެ ތެރެއިން: ސިޔާސީ މަސައްކަތްތައް ކޮށްގެން ވެރިކަމަށް އަންނަން ބޭނުންވާ މީހުންނަށް ވެސް އެ ކަން ކުރެވޭނީ މިނިވަންކަންމަތީ ރާއްޖެ އޮވެގެން ކަމަށް އަބްދުއްރަހީމް ވިދާޅުވޭ-- ފޮޓޯ: ޕީޕީއެމް


މިނިވަންކަމުގެ ދިފާއުގައި ދިވެހީން ނިކުތުމަށް ދައުވަތުދީ ޕީޕީއެމުން ކެމްޕޭނެއް ފަށައިފި

30 ޖުލައި 2021 - 23:33 0

ގައުމު މިނިވަން ކުރުމަށް "މިނިވަންކަމުގެ ދިފާއުގައި ދިވެހީން"ގެ ނަމުގައި އިދިކޮޅު ޕްރޮގްރެސިވް ޕާޓީ އޮފް މޯލިޑިވްސް (ޕީޕީއެމް) އިން ގައުމީ ކެމްޕެއިނެއް މިރޭ ފަށައިފި އެވެ.

އެ ކެމްޕޭނަކީ ރައީސް އަބްދުﷲ ޔާމީން އަބްދުލްގައްޔޫމްގެ އިސްނެންގެވުމާއެކު މިނިވަންކަން ދިފާއު ކުރުމަށް ފެށި ކެމްޕެއިނެއް ކަމަށް އެޕާޓީން ބުނެ އެވެ. އެ ކެމްޕެއިނުގެ ބައިވެރިވުމަށް މި ސަރުކާރު ކޯލިޝަންގައި ހިމެނޭ ޕާޓީތަކަށް ޕީޕީއެމުން ދައުވަތު ދިނެވެ.

މިރޭ ކެމްޕެއިން ފެށުމަށް ބޭއްވި ޖަލްސާގައި މާލޭ ސިޓީގެ މޭޔަރު ޑރ. މުހައްމަދު މުއިއްޒު އާއި ކުރީގެ ނައިބު ރައީސް ޑރ. މުހައްމަދު ޖަމީލު ބައިވެރިވެވަޑައިގެންނެވި އެވެ.

ކެމްޕެއިން ފެށުމަށް ޕީޕީއެމުން ބޭއްވި ޖަލްސާގައި، އިދިކޮޅު ކޯލިޝަންގެ ވަގުތީ ލީޑަރު އަބްދުއްރަހީމް އަބްދުﷲ ވިދާޅުވީ، ދިވެހިންގެ މިނިވަންކަން ދިވެހިންގެ އަތުން ބީވެގެން ދާތަން މިހާރު ފެންނަ ކަމަށެވެ. އަދި ގައުމު ސަލާމަތް ކުރަން އެ ޕާޓީ އާއި އެހެން ޕާޓީތަކުގެ ހުރިހާ އެންމެން ވެސް ގުޅިގެން މަސައްކަތް ކުރަން ޖެހޭ ކަމަށް ވިދާޅުވި އެވެ.

އަބްދުއްރަހީމް ވަނީ މި ކެމްޕެއިންގައި ބައިވެރިވުމުގެ ދައުވަތު ސަރުކާރު ކޯލިޝަންގައި ހިމެނޭ ލީޑަރުން ކަމަށްވާ އެމްޑީޕީގެ ރައީސް މުހައްމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހީމާއި އެމްއާރްއެމްގެ ރައީސް މައުމޫން އަބްދުލްގައްޔޫމްގެ އިތުރުން އަދާލަތު ޕާޓީގެ ރައީސް އިމްރާން އަބްދުﷲ އަށްވެސް އަރުވާފަ އެވެ.

މީގެއިތުރުން ކުރީގެ ހޯމް މިނިސްޓަރު އުމަރު ނަސީރާއި އެމްއެންޕީގެ ނަމުގައި އާ ސިޔާސީ ޕާޓީއެއް އުފެއްދެވުމަށް މަސައްކަތްކުރައްވާ ދަނގެތީ ދާއިރާގެ މެމްބަރު މުޙައްމަދު ނާޒިމަށް ވެސް ވަނީ އެ ހަރަކާތުގައި ބައިވެރިވުމަށް ދައުވަތު އަރުވާފަ އެވެ.

އަބްދުއްރަހީމް ވިދާޅުވީ، ސިޔާސީ މަސައްކަތްތައް ކޮށްގެން ވެރިކަމަށް އަންނަން ބޭނުންވާ މީހުންނަށް ވެސް އެ ކަން ކުރެވޭނީ މިނިވަންކަންމަތީ ރާއްޖެ އޮވެގެން ކަމަށެވެ.

"އިސް ސަފުގައި ޕާޓީ ހައްދަވައިގެން މަސައްކަތް ކުރައްވާ ހުރިހާ ބޭފުޅުން މި ގައުމީ ހަރަކާތުގައި ބައިވެރިވާން ގޮވާލަން. ސިޔާސީ މަސައްކަތް ކޮށްގެން ވެރިކަމަށް އާދެވޭނީ ގައުމު އޮވެގެން،" ކަމަށް އަބްދުއްރަހީމް ވިދާޅުވި އެވެ.

ޕީޕީއެމުން އާ ކެމްޕޭނެއް ފަށަފައި ވާއިރު، ޕީޕީއެމްއަށް މެމްބަރުން އިތުރު ކުރުމުގެ "މަވެސް ޕީޕީއެމް" ކެމްޕޭން ވެސް އަލުން ވަނީ ފަށާފަ އެވެ.

މީގެ ކުރިންވެސް ޕީޕީއެމުން ވަނީ ޕާޓީ އަށް މެމްބަރުން އިތުރުކުރުމަށް ރާއްޖޭގެ އެކި ކަންކޮޅުތަކުގައި ތަފާތު އެކި ހަރަކާތްތައް ހިންގައިފަ އެވެ. އެގޮތުން ރާއްޖޭގެ ގިނަ ރަށްރަށުގައި ރަށު ގޮފިތައް ހެދުމާއި އަވަށު ގޮފިތައް ހަދާ ރަޖިސްޓްރީ ކުރުންފަދަ ހަރަކާތްތައް އެ ޕާޓީގެ ފަރާތުން ވަނީ ހިންގައިފައިވެ އެވެ.

އޮގަސްޓް 17، 2011 ގައި އުފެއްދި ޕީޕީއެމްގައި މިވަގުތު 38،020 މެމްބަރުން ރަޖިސްޓްރީ ވެފައި އެބަ ތިއްބެވެ. އެ ކޯލިޝަންގެ ޕީއެންސީ ޕާޓީގެ އަދަަދަކީ 3084 މެމްބަރުންނެވެ.