އައްޑޫގައި ހިނގަމުންދާ ފްލައިން ސްކޫލް، އޭއޭއޭގެ ދަރިވަރުންގެ ޝަކުވާ ބޮޑުވެ، އެތަނުގެ ޓްރެއިނިން ހެޑްގެ ހުއްދަ އަތުލަން ޓްރާންސްޕޯޓް މިނިސްޓްރީން ނިންމައިފި އެވެ.
ފްލައިން ސްކޫލް، އޭއޭއޭއާ ގުޅޭ ދަރިވަރުންގެ މައިގަނޑު ކަންބޮޑުވުމަކީ ކޯސް ނުނިމި ދިގުލައިގެން ގޮސް ދަރިވަރުންގެ އަތުން ބޮޑު ހަރަދެއް ހިނގުމެވެ. އޭގެ އިތުރުން އިމްތިހާނުތައް ފުރިހަމަކުރުމަށް ފަހު އެތައް ދުވަހެއް ވާއިރު ވެސް އުދުހުމުގެ ތަމްރީނުތަކަށް ފުރުސަތު ނުލިބޭކަމުގެ ޝަކުވާތައް ދަރިވަރުންނާއި ބެލެނިވެރިން ކުރަމުންދާތާ ހަތަރު އަހަރުވެއްޖެ އެވެ.
މައްސަލާގައި ހައްލެއް ނުލިބި ދިގުލައިގެން ދިޔުމުން އިއްޔެ ދަރިވަރުން ވަނީ އޭއޭއޭ ބޭރުކުރަން ގޮވާލައި، އެހެން ގޮތެއް ހޯދައިދިނުމަށް ސަރުކާރުގައި އެދިފަ އެވެ.
ދަރިވަރުން ކިޔައިދިން ގޮތުގައި ދުއްވާނެ އެއާކްރާފުޓެއް ނެތްއިރު އިންޖީނިއަރުންނާއި ޓެކްނީޝަނުން ވަނީ އިސްތިއުފާ ދީފަ އެވެ. ތަނުގެ އިންސްޓްރަކްޓަރަށް ވެސް މުސާރަ ދެމުން ނުދާއިރު، ސްކޫލްގެ އޮޕަރޭޝަން ފެށޭނެ ދުވަހެއް ވެސް ބުނަން ނޭނގޭ ކަމަށް ދަރިވަރުން ބުނެ އެވެ.
އެކަމާ ދަރިވަރުން އިންތިހާއަށް ކަންބޮޑުވުން ފާޅުކުރަން ފެށުމުން މިއަދު ޓްރާންސްޕޯޓް މިނިސްޓްރީން ނެރުނު ބަޔާނެއްގައި ބުނީ، ދަރިވަރުންގެ ކޯސްތައް ކުރިއަށް ގެންދިޔުމަށް އޭއޭއޭގެ މެނޭޖްމެންޓުން އަދާ ކުރަން ޖެހޭ ޒިންމާތައް އަދާކުރަމުން ނުދާ ކަމަށެވެ.
އެހެންވެ، އެ މައްސަލަ ސިވިލް އޭވިއޭޝަން އޮތޯރިޓީން ބެލުމަށްފަހު ފްލައިން ސްކޫލްގެ ޓްރެއިނިން ހެޑްގެ މަގާމުގައި ހުރި ސުރަންޖަން ޑި ސިލްވާ އެ މަގާމުގައި ހުރުމަށް ސިވިލް އޭވިއޭޝަން އޮތޯރިޓީން ދޫކޮށްފައިވާ ހުއްދަ ގާނޫނާއި ގަވައިދުތަކާ އެއްގޮތްވާ ގޮތުގެ މަތިން އަތުލުމަށް ނިންމާފައިވާ ކަމަށެވެ.
އޭގެއިތުރުން ފްލައިން ސްކޫލްގެ މައްސަލަތައް އެކަށީގެންވާ އަވަސް މިނެއްގައި ހައްލު ނުކުރެވޭނަމަ ސްކޫލުގެގެ އެކައުންޓަބަލް މެނޭޖަރުގެ މަގާމުގައި ހުރި އަލީ އަކުބަރު ޖީވަންޖީ އެ މަގާމުގައި ހުރުމަށް ދޫކޮށްފައިވާ ހުއްދަ ވެސް އަތުލާނެ ކަމުގެ އެންމެފަހުގެ އިންޒާރު އޮތޯރިޓީން ލިޔުމުން ދީފައިވާނެ ކަމަށް މިނިސްޓްރީން ބުންޏެވެ.
ސިވިލް އޭވިއޭޝަން އޮތޯރިޓީން މި ފިޔަވަޅުތައް އަޅާފައިމިވަނީ ފްލައިން ސްކޫލްގެ މައްސަލަ ދިގުލައިގެން ދިއުމުގައި ސިވިލް އޭވިއޭޝަން އޮތޯރިޓީގެ އިހުމާލެއް ވޭތޯ ބެލުމަށް މިނިވަން އޯޑިޓެއް ހަދައި، އިހުމާލުވެފައި ވާ ނަމަ، އިހުމާލުވެފައިވާ ފަރާތްތަކާ މެދު ފިޔަވަޅު އެޅުމަށް ރައީސް އިބްރާހިމް މުހައްމަދު ސޯލިހް އަންގަވާފައިވަނިކޮށެވެ.
އެގޮތުން ސިވިލް އޭވިއޭޝަން އޮތޯރިޓީގެ އޯޑިޓްގައި ފާހަގަކޮށްފައިވާ ކަންކަމާ ގުޅިގެން އެ ތަނުގެ ހެޑް އޮފް ޕައިލެޓް ޓްރެއިނިން އާއި އެކައުންޓެބަލް މެނޭޖާގެ މައްސަލަ އިތުރަށް ބަލާ ފިޔަވަޅު އެޅުމަށް ރައީސް އަަންގަވާފައިވެ އެވެ.
އޭގެ އިތުރުން ޕައިލެޓްކަން ކިޔެވުމަށް ދަރިވަރުން ބެންކް އޮފް މޯލްޑިވްސްއިން ނަގާފައިވާ ލޯންތަކަށް އިންޓްރެސްޓް އަރަމުންދާތީ އެ ލޯންތައް ހަޔާ އެޑިއުކޭޝަންގެ ދަށަށް ބަދަލު ކުރަން ވެސް ރައީސް ނިންމަވާފައިވެ އެވެ.
