ފާއިތުވި ދެ އަހަރެއްހާ ދުވަހު ރާއްޖޭގެ އެންމެ ކާމިޔާބު އެއް ކުޅިވަރު ކަމަށްވާ ޓޭބަލް ޓެނިސް ކުރިއަރުވަން އިންޑިއާގެ ޓީޓީ ފެޑެރޭޝަނާ އެކު ރާއްޖޭގެ ޓީޓީ އެސޯސިއޭޝަންގެ އިތުރުން ޔޫތު މިނިސްޓަރު އަހުމަދު މަހުލޫފް މަޝްވަރާކުރައްވައިފި އެވެ.
އިންޑިއާގެ ޓީޓީ ފެޑެރޭޝަންގެ ރައީސް ޑުޝްޔަންޓް ޗޯޓާލާއާ އެކު މިއަދު ޔޫތު މިނިސްޓްރީގައި ބޭއްވި ބައްދަލުވުމުގައި މިނިސްޓަރު މަހުލޫފާއި އެ މިނިސްޓްރީގެ އިސް ވެރިންގެ އިތުރުން ޓީޓީ އެސޯސިއޭޝަންގެ ރައީސް އަލީ ރަޝީދު (އައްުޔަ) އަދި އެ އެސޯސިއޭޝަންގެ އިސް މެމްބަރުން ބައިވެރިވެވަޑައިގެންނެވި އެވެ. .
މި ބައްދަލުކުރެއްވުމުގައި މުޅި ރާއްޖެއަށް އިންޑިއާގެ އެހީތެރިކަމާއެކު ޓީޓީ ފުޅާކުރުމަށް ކުރެވިދާނެ މަސައްކަތްތަކާއި ގުޅޭގޮތުން މަޝްވަރާކުރެވުނެވެ. އެއީ މިދިޔަ އަހަރު ޓީޓީ އިންތިހާބު ކާމިޔާބުކުރި ލީޑަޝިޕުން ވެސް ކުރަން އަމާޒުހިފާފައިވާ ކަމެކެވެ.
މީގެ އިތުރުން މި އަހަރު ބޭއްވުމަށް ހަމަޖެހިފައިވާ ކޮމަންވެލްތު ޔޫތު ޓުއާ އާއި ސައުތު އޭޝިއަން ޖޫނިއާ އެންޑް ކެޑޭޓް ޓީޓީ ޗެމްޕިއަންޝިޕާއި ބެހޭ ގޮތުން ވެސް މި ބައްދަލުވުމުގައި ވާހަކަ ދެކެވުނެވެ. މިއީ އިންޑިއާގެ ޓީޓީ ފެޑެރޭޝަނަކުން ގައުމަކާ އެކު މިފަދަ މަސައްކަތްތަކެއް ކުރާ ފުރަތަމަ ފަހަރު ކަމަށް އެ ފެޑެރޭޝަންގެ ރައީސް ވަނީ ވިދާޅުވެފައެވެ.
މި ބައްދަލުކުރެއްވުމުގައި ވީޑިއޯ ކޯލް މެދުވެރިކޮށް ކޮމަންވެލްތު ޓޭބަލް ޓެނިސް ފެޑެރޭޝަންގެ ރައީސް އަދި ދުނިޔޭގެ މަޝްހޫރު ކުޅިވަރު ސާމާނު އުފައްދާ ކުންފުނި ސްޓެގް ގެ ޗެއާމަން ވިވެކް ކޯލީ ވެސް ބައިވެރިވެވަޑައިގެންނެވި އެވެ.
ހުނަރު ޒުވާން ކުޅުންތެރިންނާ އެކު ޓީޓީ ވަނީ މިދިޔަ ހަތަރު ވަރަކަށް އަހަރު ތެރޭ ރާއްޖެ އަށް ތާރީހީ ގިނަ ކާމިޔާބީތަކެއް ހޯދައިދީފަ އެވެ. އެ ގޮތުން 2019 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި ގިނަ މެޑަލްތަކެއް ހޯދައި އެ އަހަރު ބޭއްވި ސައުތު އޭޝިއަން ގޭމްސްގައި ވެސް ކުރިއެރުން ހޯދި އެވެ. ރާއްޖޭގެ ޓީޓީގައި އެންމެ ވިދަމުން އަންނަ ދެ ކުޅުންތެރިންނަކީ ފާތިމަތު ދީމާ އަލީ އާއި އައިޝަތު ރަފާ ނާޒިމް އެވެ. މީގެ ތެރެއިން ދީމާ ދާދި ފަހުން ވަނީ ދުނިޔޭގެ ޔޫތު ރޭންކިންގެ އަންހެން 15 އަހަރުން ދަށުގެ ކުޅުންތެރިންގެ ކެޓަގަރީގެ އަށް ވަނަ އަށް އަރައިފަ އެވެ.
