ކުރިއަށް އޮތް ރިޔާސީ އިންތިހާބުގައި ކުރީގެ ރައީސް އަބްދުﷲ ޔާމީން މިނިވަންކަމާ އެކު ވާދަކުރައްވަން ފުރުސަތު ލިބިއްޖެ ނަމަ، ރައީސް މުހައްމަދު މުއިއްޒަށް ވޯޓުގެ ފަސް ޕަސެންޓު ވެސް ނުލިބޭނެ ކަމަށް އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލް ރޭ ވިދާޅުވެއްޖެ އެވެ.
މި ވެރިކަމާ މެދު އޭނާ ދެކެވަޑައިގަންނަވާ ގޮތް ހާމަކުރައްވަމުން ރާއްޖެ ޓީވީގެ "ފަލަސުރުހީ" ޕްރޮގްރާމުގައި ފައްޔާޒު ވިދާޅުވީ، ވެރިކަމުގައި ހުންނަވައިގެން ރިޔާސީ އިންތިހާބަށް ކުރިމަތިލައްވައިގެން އެންމެ މަދު ވޯޓު ލިބިވަޑައިގަންނަވާނެ ބޭފުޅަކަށް ރައީސް މުއިއްޒު ވާނެ ކަމަށެވެ.
ފައްޔާޒު ވިދާޅުވީ ދިވެހި ތާރީހުގައި ވެސް ރައްޔިތުންގެ މެދުގައި މިހާ މަގުބޫލުކަން ކުޑަ ވެރިއަކު އަދި ފެނިފައި ނުވާ ކަމަށެވެ. އަދި، އެ މަނިކުފާނަކީ ވެރިކަން ކުރެއްވުމުގެ ގާބިލުކަން ހުރި ބޭފުޅެއް ނޫން ކަމަށާއި، ގައުމުގެ ހާލަތު ފުނޑުފުނޑުކޮށްލައްވައިފި ކަމަށް ވެސް ތުހުމަތުކުރެއްވި އެވެ.
"މިހާ އަންޕޮޕިއުލާ ވެރިއަކު އަދި އެއް ދިވެހިރާއްޖޭގެ ތާރީހުގައި އެއްވެސް މީހަކު ނުދެކެން. މިޒާޖު ވެސް މީހުންނަށް ކަމުދާ ކަހަލަ މިޒާޖަކަށް ނުވޭ. ގާބިލެއް ނޫން. ގާބިލު ނުވިތާނަ ގައުމު ފުނޑުފުނޑުކޮށްލައިފި." ފައްޔާޒު ވިދާޅުވި އެވެ.
އިންތިހާބުގައި ރައީސް މުއިއްޒަށް ކާމިޔާބު ލިބޭނެ ހަމައެކަނި ގޮތަކީ އިދިކޮޅު ހުރިހާ ލީޑަރުން ޖަލަށް ލައިގެން ކަމަށް ފައްޔާޒު ފާހަގަކުރެއްވި އެވެ. އެ ގޮތަށް އަމަލުކޮށްފި ނަމަ، އިންތިހާބުގެ ވޯޓު ކަރުދާހުގައި އޮންނާނީ ހަމައެކަނި ރައީސް މުއިއްޒުގެ ނަން ކަމަށް އޭނާ ވިދާޅުވި އެވެ. އަދި ވާދަވެރި ސިފައެއް ދެއްކުމަށްޓަކައި ޕީއެންސީގެ ޕާލިމެންޓަރީ ގްރޫޕުގެ ލީޑަރު އިބްރާހިމް ފަލާހުގެ ނަން ވެސް ނެރެފާނެ ކަމަށް ވިދާޅުވި އެވެ.
"އަޅުގަނޑު ދަންނަވާނީ ފަސް ޕަސެންޓެއް ވެސް ނުލިބޭނެ އިނގޭތޯ. އަދި ހާއްސަކޮށް ރައީސް ޔާމީނު މިނިވަންކޮށް ހުންނަވާ ރައީސް ޔާމީން ކުރިމަތިލުމުގެ ޖާގަ ލިބިއްޖެއްޔާމުން ހަމަ ފަސް ޕަސެންޓް ވެސް ނުލިބޭނެ،" ފައްޔާޒު ވިދާޅުވި އެވެ.
މީގެ އިތުރުން، ސަރުކާރުން މިހާރު މަސައްކަތް ކުރަމުން ދަނީ އޮޅުވާލައިގެން ނުވަތަ ފައިސާ ދީގެން ވޯޓު ގަންނަން ކަމަށް ވެސް ފައްޔާޒު ތުހުމަތުކުރެއްވި އެވެ. އޭނާ ވިދާޅުވީ، ރައްޔިތުންނަށް މަޖުބޫރުކޮށް، ވަޒީފާގެ ބިރު ދައްކައިގެން ޕީއެންސީއަށް މީހުން ވައްދަމުން ދަނީ އެ ސަބަބާ ހުރެ ކަމަށެވެ.
އެހެންކަމުން ރައްޔިތުން ހިތުން ރުހުމުން ވޯޓު ދީގެން ދެވަނަ ދައުރަކަށް ހޮވޭނެ އެއްވެސް ފުރުސަތެއް މި ސަރުކާރަށް ނެތް ކަމަށް ވެސް ފައްޔާޒު ވިދާޅުވި އެވެ.







