ކޮވިޑު ބަލިމަޑުކަމަށް ފަހު ޖެހިޖެހިގެން ފަސް އަހަރު ވަންދެން ގެއްލުމުގައި ހިންގުމަށް ފަހު، ގައުމީ އެއާލައިން ހިންގާ އައިލެންޑް އޭވިއޭޝަން ސާވިސަސް ލިމިޓެޑް (އައިއޭއެސްއެލް) އަށް 2025 ވަނަ އަހަރު 181.9 މިލިއަން ރުފިޔާގެ ސާފު ފައިދާއެއް ވެއްޖެ އެވެ.
އޮޑިޓަރ ޖެނެރަލްގެ އޮފީހުން ޝާއިޢުކޮށްފައިވާ އޮޑިޓް ރިޕޯޓުތަކުން ދައްކާ ގޮތުގައި، އައިއޭއެސްއެލަށް އެންމެ ފަހުން ފައިދާ ވީ 2019 ވަނަ އަހަރު 64.1 މިލިއަން ރުފިޔާ އެވެ. ޖެހިގެން އައި 2020 ވަނަ އަހަރު 579.8 މިލިއަން ރުފިޔާ އާއި 2021 ވަނަ އަހަރު 647.6 މިލިއަން ރުފިޔާގެ ގެއްލުން ވި އިރު، 2023 ވަނަ އަހަރު 71.4 މިލިއަން ރުފިޔާ އާއި 2024 ވަނަ އަހަރު 2.8 މިލިއަން ރުފިޔާގެ ގެއްލުން ވިއެވެ.
މިހެންކަމުން މި އަހަރު ލިބުނު ފައިދާއަކީ ބޮޑު ކުރިއެރުމެކެވެ. އައިލެންޑް އޭވިއޭޝަނަށް ޓެކުހަށް ކެނޑުމުގެ ކުރިން ފައިދާގެ ގޮތުގައި 230 މިލިއަން ރުފިޔާ ލިބުނު އިރު، ހިއްސާއަކަށް ޖެހުނު ފައިދާ ވަނީ 31.50 ރުފިޔާ އަށް އަރައިފަ އެވެ.
ނަމަވެސް، އެހެނިހެން އާމްދަނީގެ ގޮތުގައި ހިމަނާފައިވާ ސަރުކާރުގެ ސަބްސިޑީ ނުލައި ހިސާބުކޮށްފި ނަމަ، ޓެކުހުގެ ކުރިން އެ ކުންފުންޏަށް ގާތްގަނޑަކަށް 170 މިލިއަން ރުފިޔާގެ ގެއްލުމެއް ވާނެކަން އޮޑިޓް ރިޕޯޓުގެ އަދަދުތަކުން ފެނެ އެވެ.
އައިލެންޑް އޭވިއޭޝަނަށް މިދިޔަ އަހަރު ފައިދާވީ މައިގަނޑު ސަބަބަކީ ޓިކެޓުތަކުގެ އަގު ހެޔޮކުރަން ސަރުކާރުން ދިން 399.7 މިލިއަން ރުފިޔާގެ ސަބްސިޑީ އެވެ. އެ ކުންފުނިން ބުނެފައިވާ ގޮތުުގައި މި ސަބްސިޑީއަކީ އާންމުންގެ ލާބަޔަށްޓަކައި އަގުތައް ހެޔޮކުރުމަށް ސަރުކާރުން އެންގި އެންގުމުގެ ބަދަލެއްގެ ގޮތުގައި ދީފައިވާ މާލީ ބަދަލެކެވެ.
މި އެހީގެ ދަށުން އެއްވެސް ފައިސާއެއް އަތުން އަތަށް ބަދަލުކޮށްފައެއް ނުވެ އެވެ. އޭގެ ބަދަލުގައި އެ ފައިސާ ހަމަޖައްސާފައި ވަނީ މީރާ އަށް ދައްކަން އޮތް ޖީއެސްޓީ އާއި ވިތުހޯލްޑިން ޓެކްސް އަދި އެއާޕޯޓް ސާވިސް ޗާޖުގެ ތެރެއިންނެވެ. މީގެ ސަބަބުން މީރާ އަށް ދައްކަން ޖެހިފައި އޮތް 799 މިލިއަން ރުފިޔާގެ ދަރަނި ވަނީ 399 މިލިއަން ރުފިޔާ އަށް ކުޑަކުރެވިފަ އެވެ.
ކުންފުނީގެ ވިޔަފާރީގެ ޖުމްލަ އާމްދަނީ 2024 ވަނަ އަހަރުގެ 2.18 ބިލިއަން ރުފިޔާ އިން 2025 ވަނަ އަހަރު 2.61 ބިލިއަން ރުފިޔާ އަށް ވަނީ އިތުރުވެފަ އެވެ. މީގެ ތެރޭގައި ސަރަހައްދީ ދަތުރުތަކުން ލިބުނު އާމްދަނީ 70 ޕަސެންޓު އިތުރުވެ 538.2 މިލިއަން ރުފިޔާ އަށް އެރި އިރު، ސީޕްލޭން ދަތުރުތަކުގެ އާމްދަނީ ވަނީ 40 ޕަސެންޓު މައްޗަށް ގޮސް 418.4 މިލިއަން ރުފިޔާ އަށް އަރައިފަ އެވެ.
އެހެން ނަމަވެސް އެތެރޭގެ އުދުހުންތަކުން ލިބުނު 1.32 ބިލިއަން ރުފިޔާގެ އާމްދަނީއަށް މާ ބޮޑު ބަދަލެއް އައިސްފައެއް ނުވެ އެވެ.
އާމްދަނީ އިތުރުވި ނަމަވެސް ކުންފުނި ހިންގުމުގެ ހަރަދުތައް ވެސް ވަނީ ވަރަށް ބޮޑަށް އުފުލިފަ އެވެ. މަތިންދާބޯޓު މަރާމާތު ކުރުމުގެ ހަރަދު 78 ޕަސެންޓު އިތުރުވެ 339 މިލިއަން ރުފިޔާ އަށް އެރި އިރު، ކުރު މުއްދަތަށް ބޯޓު ކުއްޔަށް ނެގުމަށް 92.6 މިލިއަން ރުފިޔާ ހޭދަވި އެވެ. މީގެ އިތުރުން ތެލުގެ ހަރަދަށް 521.9 މިލިއަން ރުފިޔާ އަދި މުވައްޒަފުންގެ މުސާރަ އާއި އިނާޔަތްތަކަށް 603.6 މިލިއަން ރުފިޔާ ވަނީ ހޭދަކޮށްފަ އެވެ.
މިދިޔަ އަހަރު ފައިދާއެއް ދެއްކި ނަމަވެސް އައިލެންޑް އޭވިއޭޝަން އަދިވެސް އޮތީ މާލީ ގޮތުން ނާޒުކު ފައްތަރެއްގަ އެވެ. އެ ކުންފުނީގެ ޖުމްލަ ގެއްލުން މިހާރު 1.61 ބިލިއަން ރުފިޔާ އަށް އަރާފައިވާ އިރު، މިލްކިއްޔާތަށް ވުރެ ވާޖިބުތައް 211.3 މިލިއަން ރުފިޔާ އިތުރެވެ.
އައިލެންޑް އޭވިއޭޝަންގެ ދަރަނިތައް ދައްކަން ޖެހޭ ވަގުތުގައި ދެއްކުމަށް، މަދުވެގެން 12 މަސް ދުވަހުގެ މުއްދަތަށް މާލީ އެހީތެރިކަން ދިނުމަށް ފިނޭންސް މިނިސްޓްރީން ސިޓީއަކުން ޔަގީންކަން ދީފައިވާ ކަމަށް އޮޑިޓް ރިޕޯޓުގައި ވެ އެވެ.
އެ ކުންފުނިން އެމްއޭސީއެލް އަށް ދައްކަން ޖެހޭ ދަރަނި ވަނީ 1.22 ބިލިއަން ރުފިޔާ އަށް އުފުލިފަ އެވެ. މީގެ އިތުރުން ރީޖަނަލް އެއާޕޯޓްސް އަށް ވެސް 119.4 މިލިއަން ރުފިޔާ ދައްކަން ޖެހިފައިވެ އެވެ.
އައިލެންޑް އޭވިއޭޝަނަކީ އެމްއޭސީއެލް އަށް އެންމެ ބޮޑަށް ދަރާފައިވާ އެއް ކުންފުންޏެވެ. އެމްއޭސީއެލްގެ 2025 ވަނަ އަހަރުގެ އޮޑިޓް ރިޕޯޓުން ދައްކާ ގޮތުގައި، ސަރުކާރާ ގުޅުންހުރި ފަރާތްތަކުން އެ ކުންފުންޏަށް ދައްކަން ޖެހޭ 1.4 ބިލިއަން ރުފިޔާގެ ތެރެއިން 1.2 ބިލިއަން ރުފިޔާ، ނުވަތަ 83 އިންސައްތައަކީ އައިލެންޑް އޭވިއޭޝަނުން ދައްކަން ޖެހޭ ފައިސާ އެވެ.
