ދޯހާ، ގަތަރު (ފެބްރުއަރީ 7) - އޭޝިއަން ކަޕްގެ ސެމީ ފައިނަލްގައި މިރޭ ގަތަރާއި އީރާން ބައްދަލުކުރާ މެޗަށް އަރަބި ރެފްރީއެއް ހަމަޖެއްސުމަކީ ލިބުނު ހައިރާންކަމެއް ކަމަށް އެ ޓީމުގެ ޑިފެންޑަރު ސައެދް އެޒަޓޮލާހީ ބުނެފިއެވެ.
މުބާރާތުގެ އެންމެ ފަހުގެ ޗެމްޕިއަން އަދި މި އަހަރުގެ މުބާރާތުގެ ހޯސްޓް ކަމަށްވާ ގަތަރާ ދެކޮޅަށް މިރޭ އީރާން ކުޅޭ މެޗަށް އޭޝިއަން ފުޓްބޯލް ކޮންފެޑަރޭޝަން (އޭއެފްސީ) އިން ހަމަޖައްސާފައިވަނީ ކުވޭތުގެ ރެފްރީއެއް ކަމަށްވާ އަހްމަދު އަލް އަލީއެވެ.
މެޗުގެ ކުރިން މީޑިއާއާ ވާހަކަދައްކަމުން އެޒަޓޮލާހީ ބުނީ މިރޭގެ މެޗަށް އަރަބި ރެފްރީއެއް ހަމަޖެއްސުމަކީ "އަޖައިބެއް" ކަމަށެވެ.
"އަހަރަމެން މި ހިތަށް އަރަނީ ކޮން ގޮތަކުން ބަލާފަބާއޭ އަރަބި ރެފްރީއެއް ސެމީ ފައިނަލް މެޗަށް މި ހަމަޖެއްސީ،" އެޒަޓޮލާހީ ބުންޏެވެ. "އެކަމަކު އަހަރަމެންނަކީ އީރާން. އަހަރަމެންނަކީ ބޮޑު ޓީމެއް. މޮޅެތި ކުޅުންތެރިން އެބަތިބި."
ސެމީގެ ރެފްރީއާއާ ގުޅޭގޮތުން އޭއެފްސީން ވަކި ޖަވާބެއްނުދެއެވެ.
އީރާން ސެމީ އަށް ދަތުރުކުރީ ކުއާޓާ ފައިނަލްގައި ވަރުގަދަ ޖަޕާން އަތުން ފަހަތުން އަރައި 2-1 އިން މޮޅުވެގެންނެވެ. އީރާންގެ އަމަޒކީ 1976 ވަނަ އަހަރުގެ ފަހުން ފުރަތަމަ ފަހަރަށް އޭޝިއަން ކަޕް ކާމިޔާބުކުރުމެވެ.
މެޗުގެ ރެފްރީއާ ގުޅޭގޮތުން ގަތަރުގެ ކޯޗު ޓިންޓިން މާޓިނޭޒްއާ ސުވާލުކުރުމުން އޭނާ ބުނީ މެޗުގެ ރެފްރީއަކީ އޭނާ ވިސްނަން ބޭނުންވާ ކަމެއް ނޫން ކަމަށެވެ.
"އަހަރެންގެ ހުރިހާ ސަމާލުކަމެއް ހުުރީ އަހަރެންގެ ޓީމަށް،" މާޓިނޭޒް ބުންޏެވެ.
