ގޯލްޑް ކޯސްޓް، އޮސްޓްރޭލިއާ (މާޗް 6) - އޮސްޓްރޭލިއާގައި މިހާރު ކުރިއަށްދާ ވިމެންސް އޭޝިއަން ކަޕްގައި، އިރާނުން ކުޅުނު ދެ ވަނަ މެޗުގައި ގައުމީ ސަލާމް ކިޔައި، އެ ޓީމުން ފުރަތަމަ މެޗުގައި ކުރިއަށްގެންދިޔަ ހަޅުތާލު ނިމުމަކަށް ގެނެސްފި އެވެ.
އިޒްރޭލާއި އެމެރިކާ އިން އިސްވެ، އިރާނަށް ދޭން ފެށި ހަމަލާތަކުގެ ސަބަބުން މެދުއިރުމަތީގައި މިހާރު ކުރިއަށްދާ ހަމަލާބަދަލުކުރުންތަކުގެ ތެރެއިން، އިރާން އަންހެން ޓީމުން އާއިލާ ދޫކޮށް އޮސްޓްރޭލިއާގައި ކުރިއަށްދާ ވިމެންސް އޭޝިއަން ކަޕްގައި ކުޅެން އަންނަން ޖެހުނެވެ. މި ހުރިހާ ކަމަކާ ހުރެ، ޝުއޫރެއް ފާޅުކުރުމުގެ ހަޅުތާލެއްގެ ވިސްނުމުގައި، ވިމެންސް އޭޝިއަން ކަޕްގައި އިރާނުން ދެކުނު ކޮރެއާއާ ދެކޮޅަށް ކުޅުނު މެޗުގައި ގައުމީ ސަލާމް ނުކިޔަން ނިންމި އެވެ.
އެކަމަކު، ރޭ އޮސްޓްރޭލިއާ އަތުން 4-0 އިން އިރާން ބަލިވި މެޗުގެ ކުރިން، އެ ޓީމުގެ ކުޅުންތެރިންނާއި އޮފިޝަލުން ވަނީ ގައުމީ ސަލާމްކިޔައިފަ އެވެ. އަދި، ގައުމީ ސަލާމް ކީއިރު، ހުރިހާ ކުޅުންތެރިންނާއި އޮފިޝަލުން ތިބީ ސެލިއުޓަށް އަތްނަގައިގެންނެވެ.
އިރާނުގެ ކުޅުންތެރިންނާއި އޮފިޝަލުންނާ ހަވާލާދީ އޮސްޓްރޭލިއާ މީޑިއާގައި ރިޕޯޓްކޮށްފައިވާގޮތުގައި، ގައުމީ ސަލާމް ކިޔަން ނިންމީ، ކުޅިވަރުގެ ރޫހާއެއް ގޮތަށް ކަންކަންކުރުމަށް ކަމަށެވެ.
އިޒްރޭލާއި އެމެެރިކާ އިން ދެމުން އަންނަ ހަމަލާތަކުގައި އިރާނުން 1000 އަށް ވުރެން ގިނަ މީހުން މަރުވެފައިވާއިރު، އޭގެ ތެރޭގައި، އިރާނުގެ ރޫހާނީ ލީޑަރު، އާޔަތުﷲ ހާމަނާއީ ހިމެނިވަޑައިގެންނަވަ އެވެ.
އިރާނުން ފުރަތަމަ މެޗުގައި 3-0 އިން ދެކުނު ކޮރެއާ އަތުން ބަލިވިއިރު، ދެ ވަނަ މެޗުން އޮސްޓްރޭލިއާ އަތުން ވެސް ވީ ނާކާމިޔާބެވެ. މުބާރާތުން ކެޓުމުގެ ފުރުސަތު ބޮޑުވެފައި އޮތް އިރާނަށް އަނެއްބުރަށް ދިއުމުގެ ކުޑަވެސް އުންމީދެއް އޮތީ އާދިއްތަ ދުވަހު، ފިލިޕީންސް އަތުން މޮޅުވެގެންނެވެ.
