މަޝްހޫރު ލަވަކިޔުންތެރިޔާ ހެރީ ސްޓައިލްސް، އޭނާއާއެކު "ވަން ޑައިރެކްޝަން" ބޭންޑުގައި މަސައްކަތްކުރި ލިއަމް ޕޭންއަށް ހާއްސަކޮށްގެން ލިޔެފައިވާ، އަދި މިހާތަނަށް އާންމުކޮށްފައި ނުވާ ލަވައެއް ފުރަތަމަ ފަހަރަށް ހުށަހަޅައިދީފި އެވެ.
ގްރެމީ އެވޯޑް ހާސިލްކޮށްފައިވާ ސްޓައިލްސް، "ވަޓް އިޒް އިނަފް" ގެ ނަމުން ނަންދީފައިވާ މި ލަވަ ކިޔާފައިވަނީ ނިއުޔޯކުގެ މެޑިސަން ސްކޮޔާ ގާޑަންގައި ބޭއްވި އޭނާގެ ކޮންސެޓުގަ އެވެ. މި ލަވަ ހުށަހަޅައިދީފައިވަނީ ލިއަމް ޕޭން މަރުވިތާ ދެ އަހަރު ފުރުނު ދުވަހާ ދިމާކޮށެވެ.
ސްޓައިލްސް މިހާރު ނިއުޔޯކުގައި ހުށަހަޅައިދެމުންދަނީ އޭނާގެ ރެކޯޑް މުގުރާލި "ޓުގެދA، ޓުގެދA" ޓުއާގެ ބައެއްގެ ގޮތުން އެ ސިޓީގައި ބާއްވާ ސިލްސިލާ ޝޯތަކެވެ.
ހުކުރު ދުވަހުގެ ރޭ ބޭއްވި މި ކޮންސެޓުގައި އެތަނަށް އެއްވެފައި ތިބި ގިނަ އަދަދެއްގެ ސަޕޯޓަރުންނާ މުހާތަބުކުރަމުން ސްޓައިލްސް ވަނީ ޕޭންއަކީ އޭނާގެ ގާތް އެކުވެރިއެއްގެ ގޮތުގައި ސިފަކޮށްފަ އެވެ. އަދި ޕޭންއާ ނުލައި އޭނާއަށް މިހާ ހިސާބަށް ނާދެވުނީސް ކަމަށް ބުނެ ސްޓައިލްސް ވަނީ ޕޭންގެ ހަނދާންތައް އާކޮށްފަ އެވެ.
ސްޓޭޖުގެ މައްޗަށް އަލިކޮށްފައިވާ ސްޕޮޓްލައިޓެއްގެ ދަށުގައި ހުރެ ސްޓައިލްސް ދެއްކި އަސަރު ގަދަ ވާހަކައިގައި، މީގެ ދެ އަހަރު ކުރިން އާޖެންޓީނާގެ ހޮޓަލެއްގެ ބެލްކަނިން ވެއްޓި މަރުވި ލިއަމް ޕޭންގެ ހަނދާންތައް އާކުރި އެވެ.
"ނިއުޔޯކުގައި މި ޝޯތައް ހުށަހަޅައިދޭން ފުރުސަތު ލިބުމަކީ އަހަރެން އަމިއްލަ ނަފްސަށް ލިބުނު ވަރަށް ބޮޑު ނަސީބެއް ކަމަށް ދެކެން. އަދި މި އިމާރާތަކީ (މެޑިސަން ސްކޮޔާ ގާޑަން) އަހަންނަށް ވަރަށް ހާއްސަ ތަނެއް،" ސްޓައިލްސް ބުންޏެވެ.
އޭނާ އިތުރަށް ބުނީ، "އަހަރެންގެ ދިރިއުޅުމުގައި ވަރަށް ގިނަ މީހުން އެބަތިބި. އެކުވެރިންނާއި އަހަންނާއެކު މަސައްކަތްކުރި މީހުންނާ ނުލައި އަހަންނަށް މިއަދު މި ހުރި ހިސާބަކަށް ނާދެވުނީސް."
"އަދި މީގެ ދެ އަހަރު ކުރިން، ހަމަ މިއަދު، އަހަރެންގެ އެފަދަ އެކުވެރިއަކު ވަނީ ވަކިވެފައި،" ސްޓައިލްސް ބުންޏެވެ.
"ވަޓް އިޒް އިނަފް" މި ލަވަ ފުރަތަމަ ފަހަރަށް އަޑުއަހަން ތިބި ސަޕޯޓަރުންގެ ފަރާތުން ބޮޑު ތަރުހީބެއް ލިބުނެވެ.
ހުކުރު ދުވަހުގެ ރޭގެ މި ހުށަހެޅުމާ ގުޅޭ ގޮތުން އިންސްޓަގްރާމްގައި ހިޔާލު ފާޅުކުރި ހެރީ ސްޓައިލްސްގެ ސަޕޯޓަރުން ވަނީ "ވަޓް އިޒް އިނަފް" އަކީ ވަރަށް "ރީތި" ލަވައެއްގެ ގޮތުގައި ސިފަކޮށްފަ އެވެ.
"ވަން ޑައިރެކްޝަން" ބޭންޑުގެ މެންބަރެއްގެ ގޮތުގައި ދުނިޔޭގެ ފެންވަރުގައި މަގުބޫލުކަން ހޯދުމަށް ފަހު، ސްޓައިލްސް އަމިއްލަ ގޮތުން ލަވަކިޔަން ފެށީ 2017 ވަނަ އަހަރު އެވެ.
އޭނާގެ ފުރަތަމަ އަލްބަމާއި ސިންގަލް ލަވަ އިނގިރޭސިވިލާތުގެ ޗާޓުތަކުގެ އެއްވަނަ ހޯދާފައިވާއިރު، 2022 ވަނަ އަހަރު ނެރުނު "ހެރީސް ހައުސް" އަލްބަމަށް ވަނީ ގްރެމީ އެވޯޑަކާއި ބްރިޓް އެވޯޑެއް ލިބިފަ އެވެ.
