އިންތިޚާބީ ލިސްޓުގައި މަކަރާއި ހީލަތް ހަދާފައިވާ ކަމަށް ބުނެ، އިންޑިއާގެ އިލެކްޝަންސް ކޮމިޝަނުގެ އިސްވެރިޔާ އިސްތިއުފާ ދިނުމަށް ގޮވާލައި އިދިކޮޅު ސަޕޯޓަރުންގެ އެތައް ހާސް ބަޔަކު ދިއްލީގެ މަގުތަކުގައި ސުޕްރީމް ކޯޓާ ހަމައަށް ހިނގާލުމެއް ބާއްވައިފި އެވެ.
"މާޗް ފޯ ޑިމޮކްރަސީ" ގެ ނަމުގައި ހޯމަ ދުވަހު ކުރިއަށްގެންދިޔަ މި ހިނގާލުމަކީ ސިލްސިލާކޮށް ބާއްވަމުންދާ މުޒާހަރާތަކުގެ ތެރެއިން އެންމެ ފަހުގެ ހަރަކާތެވެ. މި މުޒާހަރާއާ ގުޅިގެން ވެރިރަށް ދިއްލީގެ މަގުތަކުގައި ބެރިކޭޑް ޖަހައި ބަންދުކޮށްފައިވާއިރު، ސަލާމަތީ ބާރުތަކުގެ އެތައް ހާސް އޮފިސަރުންނެއް ވަނީ ހަރަކާތްތެރިވެފަ އެވެ. އަދި ނިމިދިޔަ ހަފުތާ ބަންދުގައި ކުރި މުޒާހަރާތަކުގެ ތެރެއިން ވެސް އެތައް ހާސް ބަޔަކު ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ.
ވޯޓުލާ މީހުންގެ ލިސްޓުން އެތައް މިލިއަން ބައެއްގެ ނަން އުނިކޮށްފައިވާ މައްސަލައިގައި، ކޮންގްރެސް ޕާޓީގެ ލީޑަރު ރާހުލް ގާންދީ ވަނީ އެ މައްސަލަ ބަލައިދިނުމަށް އެދި ސުޕްރީމް ކޯޓަށް ޕެޓިޝަނެއް ހުށަހަޅުއްވާފަ އެވެ.
އިދިކޮޅު ޕާޓީތަކުން ތުހުމަތުކުރާ ގޮތުގައި ވޯޓުލާ މީހުންގެ ލިސްޓަށް ގެނައި ބަދަލުތަކަކީ ބޮޑުވަޒީރު ނަރެންދުރަ މޯދީގެ ވެރިކަންކުރާ ބާރަތިޔާ ޖަނަތާ ޕާޓީ (ބީޖޭޕީ) އަށް ނާޖާއިޒު ފައިދާ ހޯދައިދިނުމަށް ކޮށްފައިވާ ކަމެކެވެ. ނަމަވެސް، އިލެކްޝަންސް ކޮމިޝަނާއި ބީޖޭޕީން ވަނީ މި ތުހުމަތުތައް ދޮގުކޮށްފަ އެވެ.
މުޒާހަރާ ކުރުމުގެ ހުއްދައަށް އެދި ހުށަހަޅަމުންދާތާ ހަފުތާތަކެއް ވެފައިވީ ނަމަވެސް، އަމަންއަމާންކަން ދެމެހެއްޓުމުގެ ބޭނުމުގައި ކަމަށް ބުނެ ފުލުހުން ދިޔައީ އެ ހުއްދަ ދިނުމަށް އިންކާރު ކުރަމުންނެވެ. އެގޮތުން، ނިމިދިޔަ ހަފުތާ ބަންދުގައި "ކޮކްރޯޗް ޖަނަތާ ޕާޓީ" (ސީޖޭޕީ) އިން ދިއްލީގައި މުޒާހަރާ ކުރަން ކުރި މަސައްކަތާ ގުޅިގެން ވެސް އެތައް ހާސް ބަޔަކު ވަނީ ހައްޔަރުކޮށްފަ އެވެ.
