ހދ. އަތޮޅުގެ ރަށްތަކުން ގުޅިގެން މަސައްކަތް ކުރުމަށްޓަކައި ހަދަން އުޅޭ ބޯޑު ހެދުމުގެ މަސައްކަތް ހުއްޓާލަން ލޯކަލް ގަވަމަންޓް އޮތޯރިޓީ (އެލްޖީއޭ) އިން އެންގިޔަސް އެ މަސައްކަތް ހުއްޓާނުލާ ކުރިއަށްދާ ކަމަށް ކުޅުދުއްފުށި ސިޓީގެ މޭޔަރު މުހައްމަދު އާތިފް ވިދާޅުވެއްޖެ އެވެ.
އަދަދު ނޫހުން ގެނެސްދޭ ރަށު ނޯޓު ޕްރޮގްރާމް ގައި އާތިފް ވިދާޅުވީ އަތޮޅު ބޯޑު އުފެއްދުމުގެ މަސައްކަތް ހުއްޓާލަން އެލްޖީއޭއިން އެންގި އެންގުމަކީ ގާނޫނާ ހިލާފު އެންގުމަކަށްވާތީ، އެ އެންގުމަށް ތަބާވާން ނުޖެހޭ ކަމަށެވެ.
"އެލްޖީއޭއިން އެގޮތަށް އަންގާފައި އޮތް އޮތުން އެއީ ގާނޫނާ ހިލާފު އެންގުމެއް ފުރަތަމަ ކަމަކަށް. އެހެންވީމަ ގާނޫނާ ހިލާފު އެންގުމަކަށް އަޅުގަނޑުމެން ތަބާވާކަށް ނުޖެހޭނެ. އަޅުގަނޑުމެންގެ ގާނޫނީ ބާރު އަޅުގަނޑުމެން ބޭނުންކުރާނަން. އަޅުގަނޑުމެން މި ބޯޑު އިރާދަކުރެއްވިއްޔާ އުފައްދާނަން،" އާތިފް ވިދާޅުވި އެވެ.
އާތިފް ވިދާޅުވީ އަތޮޅު ބޯޑު އެލްޖީއޭ މެދުވެރިކޮށް ސަރުކާރުން ހުއްޓުވަން އުޅެނީ އަތޮޅު ތެރޭގެ ކޯޑިނޭޝަން ނައްތާލައި، ހުރިހާ ކައުންސިލްތައް ގުޅިގެން އަތޮޅަށް ތަރައްގީ ހޯދަފާނެތީ ކަމަށެވެ. އޭނާ ވިދާޅުވީ އަތޮޅު ކައުންސިލްތައް ވެސް އުވާލީ އަތޮޅުތަކުގެ ކޯޑިނޭޝަން ނައްތާލުމުގެ ބޭނުމުގައި ކަމަށް މިހާރު ގަބޫލުކުރެވޭ ކަމަށެވެ.
"އަޅުގަނޑަށް ގަބޫލުކުރެވޭ ގޮތުގައި ޕޮލިސީ ލެވެލްގައި މައި ސަރުކާރުން އަންނަ ޕްރެޝަރުތަކެއް އެލްޖީއޭއަށް މިކަން ހުއްޓުވުމަށް. އެއީ ސަބަބަކަށްވަނީ އަތޮޅު ތެރޭގެ ކޯޑިނޭޝަން ނައްތާލުން. އަތޮޅު ކައުންސިލްތައް އެބޭފުޅުން އުވާލެއްވި ސަބަބަކީ އެއީ ކަމަށް މިހާރު ގަބޫލުކުރެވޭ. އަޅުގަނޑުމެން އަތޮޅުތައް ގުޅިގެން މަސައްކަތްކޮށް އަތޮޅުތެރޭގައި ކުރިއެރުން އަޅުގަނޑުމެން ހޯދަފާނެތީ،" މޭޔަރު ވިދާޅުވި އެވެ.
ކައުންސިލްތައް ގުޅިގެން ކުރާ މަސައްކަތްތަކަކީ އެލްޖީއޭއިން އަބަދުވެސް ބަލައިގަންނަމުންދިޔަ ކަމަކަށްވާއިރު، އެފަދަ މަސައްކަތެއް ހުއްޓުވުމުގެ ގާނޫނީ އެއްވެސް ހައިސިއްޔަތެއް އެލްޖީއޭއަށް ލިބިގެން ނުވާ ކަމަށް އާތިފް ވިދާޅުވި އެވެ.
ކުޅުދުއްފުށި ސިޓީ ކައުންސިލުން ވަނީ ހދ. އަތޮޅު ބޯޑު އެކުލަވާލުމަށް އެ ބޯޑުގެ ހިންގާ ގަވާއިދާއި ކައުންސިލްތަކުގެ މެދުގައި ސޮއިކުރާނެ މުއާހަދާ އާއި ކައުންސިލްތަކުން ފާސްކުރާނެ ގަރާރު ޑްރާފްޓުކޮށް ނިމި ހުރިހާ ކައުންސިލްތަކުގެ ކޮމެންޓަށް ފޮނުވާފައިވާ ކަމަށް އާތިފް ވިދާޅުވި އެވެ. އޭނާ ވިދާޅުވީ އެ މަސައްކަތް ނިމުމާއެކު ބޯޑު އުފެއްދުމުގެ މަސައްކަތް ކުރާނެ ކަމަށެވެ.
އާތިފް ވިދާޅުވީ ބޯޑެއް އެކުލަވާލުމުގެ ވިސްނުން އައީ އަތޮޅު ކައުންސިލްތައް އުވާލުމާއެކު ތަރައްގީ ހޯދުމަށް އަތޮޅުތަކުގެ ރަށްތަކުގެ މެދުގައި އޮތް ގުޅުމާއި އެކުގައި މަސައްކަތްކުރުން މެދުކެނޑި ބައިބައިވާން ފެށުމުން ކަމަށެވެ.
ހދ. އަތޮޅުގެ ހުރިހާ ރަށްތަކުގެ ރައީސުން އޮންލައިންކޮށް ބައްދަލުކޮށް އަތޮޅު ބޯޑު އެކުލަވާލުމުގެ ހިޔާލު ހުށަހެޅުމުން އެކަމަށް ހުރިހާ ބޭފުޅުންވެސް ތައީދުކުރިކަން ފާހަގަކުރައްވާ އާތިފް ވިދާޅުވީ އެ މަސައްކަތާއެކު ކުރިއަށްދާން މުޅި އަތޮޅުގެ ހުރިހާ ރަށެއްގެ ކައުންސިލްތަކުން ތިބީ ތައްޔާރަށް ކަމަށެވެ.
