ޔަމަނުގައި އީރާނުގެ ތާއީދާއެކު ހަރަކާތްތެރިވާ ހޫތީ ހަނގުރާމަވެރިންނާ ދެކޮޅަށް، ސައުދީ އަރަބިއްޔާ އިސްވެ އޮންނަ ކޯލިޝަނުން ރަތްކަނޑުގެ އައްސޭރިފަށުގެ ސަރަހައްދުތަކަށް ވަރުގަދަ ވައިގެ ހަމަލާތަކެއް ދޭން ފަށައިފި ކަމަށް ހޯމަ ދުވަހު އެ ކޯލިޝަނުން ބުނެފި އެވެ.
ސައުދީ ކޯލިޝަނުން މިކަން އިއުލާންކޮށްފައި މިވަނީ، ޔަމަނުގެ ހުޅަނގު ދެކުނުގެ މުހިންމު ރަށެއް ހޫތީންގެ ބާރުގެ ދަށަށް ގެންގޮސް، އެ ސަރަހައްދުގެ އިސްތިރާތީޖީ ގޮތުން މުހިންމު ޕްރޮވިންޝަލް ކެޕިޓަލަކާ ދިމާލަށް ހަނގުރާމަވެރިން ކުރިއަރަމުންދާ ކަމަށް އެ ޖަމާއަތުން ބުނިތާ ކުޑަވަގުތުކޮޅެއްގެ ތެރޭގަ އެވެ.
މިއީ ސައުދީގެ ތާއީދާއެކު ހަނގުރާމަކުރާ ޔަމަނުގެ ސަރުކާރުގެ ފައުޖުތަކަށް ލިބުނު ބޮޑު ނާކާމިޔާބީއެކެވެ.
ސައުދީ ކޯލިޝަނުގެ ތަރުޖަމާނު މޭޖާ ޖެނެރަލް ތުރުކީ އަލް މާލިކީ ވިދާޅުވީ، ބައިނަލްއަގުވާމީ ގޮތުން ބަލައިގެންފައިވާ ޔަމަނުގެ ސަރުކާރުގެ ފައުޖުތަކަށް އެހީތެރިވުމަށް 100 ފައިޓާ ޖެޓް ބޭނުންކުރަމުންދާ ކަމަށެވެ.
އަދި މިހާރު ކުރިއަށްދާ އަސްކަރީ ހަރަކާތުގެ ދަށުން، އިސްތިރާތީޖީ ގޮތުން މުހިންމު ބާބުލް މަންދަބު ކަނޑުއޮޅިއަށް "ވައިގެ ސަލާމަތްތެރިކަން" ކަށަވަރުކޮށްދީ، ހޫތީންގެ އެތައް ސަތޭކަ އަމާޒަކަށް ހަމަލާދީ ހަލާކުކޮށްލާފައިވާ ކަމަށް ވެސް އޭނާ ވިދާޅުވި އެވެ.
