ޔަމަނުގެ އީރާނަށް ތާއީދުކުރާ ހޫތީން ސައުދީ އަރަބިއްޔާގެ ވެރިރަށް ރިޔާދުގައި ހުންނަ އަރަމްކޯގެ މަރުކަޒަކަށް ބެލިސްޓިކް މިސައިލާއި ޑްރޯން ބޭނުންކޮށްގެން ހަމަލާދީފައިވާ ކަމަށް ހޮނިހިރު ދުވަހު ބުނެފި އެވެ.
ހޫތީން ބުނި ގޮތުގައި މި ހަމަލާއަކީ ޔަމަނުގެ ސަނާއަށާއި އެހެނިހެން ޕްރޮވިންސްތަކަށް ސައުދީން ދެމުންދާ ހަމަލާތަކުގެ ބަދަލުހިފުމުގެ ގޮތުން ދިން ހަމަލާއެކެވެ.
ރިޔާދުގައި ހުންނަ އަރަމްކޯގެ މަރުކަޒު ހުރި ސަރަހައްދުގައި އަލިފާން ރޯވެ، ބޯ ކަޅު ދުން އަރަމުންދާ މަންޒަރު ފެނިފައިވާ ކަމަށް މީހަކު ރޮއިޓާސް ނިއުސް އެޖެންސީއަށް މައުލޫމާތު ދީފައިވެ އެވެ.
އަރަމްކޯގެ މަރުކަޒަށް ދިން ކަމަށް ބުނާ މި ހަމަލާއާ ގުޅޭ ގޮތުން ސައުދީ އަރަބިއްޔާގެ ކަމާބެހޭ އިދާރާތަކުން އެއްވެސް އެއްޗެއް ބުނެފައެއް ނުވެ އެވެ. އަދި މިކަމާ ގުޅޭ ގޮތުން މައުލޫމާތު ހޯދުމަށް އެދުމުން އަރަމްކޯ އިން ވެސް ޖަވާބެއް ދީފައެއް ނުވެ އެވެ.
މި ހަމަލާގެ ރިޕޯޓުތައް ފެންމަތިވެފައި މިވަނީ، ސައުދީ އަރަބިއްޔާގެ ސިޓީތަކަށާއި ހަކަތަ އުފައްދާ މަރުކަޒުތަކަށް ހޫތީން ދޭ ހަމަލާތައް ވަރުގަދަކޮށް، ދެ ފަރާތުގެ މެދުގައި ހަމަނުޖެހުންތައް އިންތިހާއަށް އިތުރުވެފައިވާ ދަނޑިވަޅެއްގަ އެވެ.
މިދިޔަ ހަފުތާގައި ވެސް ޔަންބޫގައި ހުންނަ ސައުދީ އަރަމްކޯގެ މަރުކަޒުތަކަށް މިސައިލާއި ޑްރޯން ބޭނުންކޮށްގެން ހަމަލާދީފައިވާ ކަމަށް ހޫތީން ވަނީ ބުނެފަ އެވެ.
އޭރު ސައުދީ އަރަބިއްޔާއިން ބުނެފައިވަނީ ތާއިފް އަދި ޔަންބޫ ސަރަހައްދަށް އަމާޒުކޮށް ހޫތީން ފޮނުވާލި ހަ ބެލިސްޓިކް މިސައިލެއް ހުއްޓުވާފައިވާ ކަމަށެވެ. ނަމަވެސް، އެ ހަމަލާތަކުގައި އަރަމްކޯގެ މަރުކަޒުތަކަށް އެއްވެސް ގެއްލުމެއް ލިބުނު ކަމަކަށް ސައުދީން ރިޕޯޓުކޮށްފައެއް ނުވެ އެވެ.
