ސައުދީ އަރަބިއްޔާގެ ތާއީދާއެކު ހިންގާ ޔަމަނުގެ ސަރުކާރުގެ ކޮންޓްރޯލްގެ ދަށުން ބޭރުވެފައިވާ ސަރަހައްދުތައް އަނބުރާ ހޯދުމަށްޓަކައި، އީރާނުގެ މަދަދުލިބޭ ހޫތީ ހަނގުރާމަވެރިންނާ ދެކޮޅަށް އަސްކަރީ ބޮޑު އޮޕަރޭޝަނެއް އާދިއްތަ ދުވަހު ފަށައިފި އެވެ.
ސައުދީ އަރަބިއްޔާ އާއި ޔަމަނުގެ ސަރުކާރަށް ތާއީދުކުރާ ފަރާތްތައް ގުޅިގެން ހޫތީންނާ ދެކޮޅަށް ވަރުގަދަ ހަމަލާތަކެއް ދޭން ތައްޔާރުވަމުންދާ ކަމަށް، ސަރަހައްދީ އަދި ހުޅަނގުގެ އޮފިޝަލުން ވަނީ ބުނެފަ އެވެ. މި އޮޕަރޭޝަނުގައި ސައުދީން ވައިގެ މަގުން ހަމަލާތައް ދޭއިރު، ޔަމަނުގެ ފައުޖުތަކުން ހަރަކާތްތެރިވާނީ އެއްގަމު މަގުންނެވެ.
ޓީވީ މެދުވެރިކޮށް ޔަމަނުގެ ރައީސް ރަޝާދު އަލް-އަލީމީ ވިދާޅުވީ، ޖުމްހޫރިއްޔާގެ ބާރުގެ ދަށުގައި ނެތް ބާކީ ހުރި ސަރަހައްދުތައް މިނިވަންކޮށް، މުޅި ގައުމުގައި ދައުލަތުގެ ބާރާއި މުއައްސަސާތަކުގެ ހިންގުން ގާއިމުކުރުމަށްޓަކައި އަސްކަރީ އޮޕަރޭޝަންތައް މިއަދު ފަށާފައިވާ ކަމަށެވެ.
މި ހަމަލާތަކާ ގުޅިގެން ހޫތީން ބުނީ، ފާއިތުވި 12 ގަޑިއިރު ތެރޭގައި ސައުދީ އިސްވެ އޮންނަ ކޯލިޝަނުން ޔަމަނަށް ދިން ވައިގެ އަދި މިސައިލް 50 ހަމަލާގެ ބަދަލުހިފުމުގެ ގޮތުން، ސައުދީގެ ރިޔާދް އަދި ޚުރައިސް ސަރަހައްދުގައި ހުންނަ ސައުދީ އަރަމްކޯގެ މަރުކަޒުތަކަށް ބެލިސްޓިކް މިސައިލާއި ޑްރޯން ހަމަލާތަކެއް ދީފައިވާ ކަމަށެވެ. އަދި މި ހަމަލާތަކުގެ ސަބަބުން އެ ތަންތަނުގައި ބޮޑެތި އަލިފާންގަނޑުތައް އުފެދުނު ކަމަށް ވެސް ހޫތީން ވަނީ ބުނެފަ އެވެ.
މި ހަމަލާތަކާ ގުޅޭ ގޮތުން ސައުދީ އަރަބިއްޔާގެ ސަރުކާރުން މިހާތަނަށް ރަސްމީކޮށް އެއްވެސް އެއްޗެއް ބުނެފައެއް ނުވެ އެވެ.
