ޔުނައިޓެޑް އެރަބް އެމިރޭޓްސްގެ ޑުބާއީ އިން ފުރައިގެން އިޒްރޭލުގެ ތެލް އަވީވަށް ދަތުރު ކުރި ފްލައިޑުބާއީގެ މަތިންދާބޯޓު ވައްޓާލަން އުޅުނު މައްސަލައިގައި ދެ ދިވެހިންނާ ސުވާލުކޮށްފި އެވެ.
އަދަދު އަށް އެނގިފައިވާ ގޮތުގައި ޑުބާއީގެ ފުލުހުން ސުވާލު ކުރީ ފްލައިޑުބާއީގައި މަސައްކަތް ކުރާ ދެ ދިވެހިންނާ އެވެ. ނަމަވެސް މިހާތަނަށް އެ ދެ މީހުން ހައްޔަރުނުކުރާކަން މި ނޫހަށް އެނގިފައިވެ އެވެ.
މިދިޔަ ބުދަ ދުވަހު ހިނގި އެ ހާދިސާގެ ތަހުގީގުގައި ފްލައިދުބާއީގައި މަސައްކަތް ކުރާ ދެ ދިވެހިންނާ ސުވާލު ކުރަމުންދާކަން ސަރުކާރުގެ ތަރުޖަމާނު މުހައްމަދު ހުސެއިން ޝަރީފް (މުންދު) ވެސް މި ނޫހަށް ވަނީ ކަށަވަރުކޮށްދެއްވައިފަ އެވެ.
"މި ވަގުތު އެނގޭ މައުލޫމާތަކީ އެ ދެ މީހުންނާ ސުވާލު ކުރުމަށްޓަކައި ހާޒިރުކޮށްފައިވާކަން،" މުންދު ވިދާޅުވި އެވެ.
ފްލައިދުބާއީގެ ބޯޓު ވައްޓާލަން އުޅުނު މައްސަލައިގައި އެއްވެސް ދިވެއްސަކަށް ތުހުމަތު ކުރާކަން ޔޫއޭއީއިން އަދި ހާމަކޮށްފައެއް ނުވެ އެވެ. އަދި އެފަދަ މައްސަލައިގައި ސަރުކާރު ނުވަތަ ދިވެހި ފުލުހުންނާ ވެސް ޔޫއޭއީއިން ވާހަކަ ދައްކާފައެއް ނުވެ އެވެ.
އެނގިފައިވާ ގޮތުގައި އެ ދެ ދިވެހިންނާ ސުވާލު ކުރިއިރު، ފްލައިދުބާއީގެ ވަރަށް ގިނަ މުވައްޒަފުންނާ ޔޫއޭއީގެ ފުލުހުން ދަނީ ސުވާލު ކުރަމުންނެވެ. އަދި ބޯޓު ވައްޓާލަން އުޅުނު އޮމާނަށް ހަމާމް އަލް-ހައްމާމީއާ ބައްދަލުވި އެންމެންނާ ސުވާލު ކުރަމުންދާކަން ވެސް މި ނޫހަށް އެނގިފައިވެ އެވެ.
މި ނޫހާ ވާހަކަ ދެއްކި މަސްދަރަކުން ބުނީ، ކުންފުނީގެ ހަރަކާތެއްގެ ތެރެއިން އެ ދެ ދިވެހިން ވަނީ ހަމާމް އަލް-ހައްމާމީއާ ބައްދަލުވެފަ އެވެ. ނަމަވެސް ދެ ވަނަ މަސްދަރަކުން މި މައުލޫމާތު އަދި ކަށަވަރެއް ނުކުރެ އެވެ.
ހަމާމް އަލް-ހައްމާމީއަކީ އެ ފްލައިޓުގެ ކޯ-ޕައިލެޓެވެ. ބޯޓު ވައްޓާލުމުގެ ނިޔަތުގައި އޭނާ ވަނީ ބޯޓުގެ އެމަޖެންސީ ކޯރާޑިން ޕައިލެޓަށް ހަމަލާދީފަ އެވެ. ނަމަވެސް އިންޑިއާއަށް ނިސްބަތްވާ އެ ޕައިލެޓު ވަނީ ހަމާމްގެ ހަމަލާތަކުން ދިފާއުގެ، ކޮކްޕިޓުގެ ދޮރު ހުޅުވައިފަ އެވެ. އެ ހިސާބުން އެތަނަށް ވަދެ، ބޯޓު ސަލާމަތް ކުރީ އިޒްރޭލުގެ ރައްޔިތެއް ކަމަށްވެ އެވެ.
