އިންޑިއާގެ ވޯޓާ ލިސްޓަށް ގެނައި ބަދަލުތަކާ ދެކޮޅަށް "ޖެން-ޒީ" އިސްވެ އޮވެ އުފައްދާފައިވާ ކޮކްރޯޗް ޖަންތާ ޕާޓީ އާއި އިދިކޮޅު އެހެން ޖަމާއަތްތަކުން ކުރިއަށްގެންދާ މުޒާހަރާތަކަށް ހުރަސްއަޅައި، ހޮނިހިރު ދުވަހު ވެރިރަށް ނިއު ދިއްލީން ފުލުހުން ގިނަ ބަޔަކު ހައްޔަރުކޮށްފި އެވެ.
މިއީ މި މައްސަލައިގައި އެ ގައުމުގައި މުޒާހަރާ ކުރި ދެވަނަ ދުވަހެވެ.
މުޒާހަރާގެ ބައިވެރިން ތުހުމަތުކުރާ ގޮތުގައި ވޯޓާ ލިސްޓަށް ގެނައި ބަދަލުތަކަކީ ބޮޑުވަޒީރު ނަރެންދުރަ މޯދީގެ ވެރިކަން ކުރާ ޕާޓީއަށް ނާޖާއިޒު ފައިދާ ހޯދައިދިނުމަށް ގެނައި ބަދަލުތަކެކެވެ. އެހެންކަމުން، އެ މީހުން ދަނީ އިންޑިއާގެ އިލެކްޝަން ކޮމިޝަނުގެ އިސްވެރިޔާ މަގާމުން އިސްތިއުފާ ދެއްވުމަށް ގޮވާލަމުންނެވެ.
މިއީ މި އަހަރުގެ ތެރޭގައި ޒުވާނުން އިސްވެ އޮވެ އިންޑިއާގައި ކުރިއަށްގެންދާ ސިލްސިލާ މުޒާހަރާތަކުގެ ތެރެއިން އެންމެ ފަހުގެ ހަރަކާތެވެ. މި މުޒާހަރާތަކުގެ ސަބަބުން، މޯދީގެ 12 އަހަރުވީ ވެރިކަމުގައި މީގެ ކުރިން ކުރިމަތިނުވާ ފަދަ ބޮޑު ފިއްތުންތަކެއް ސަރުކާރަށް ވަނީ ކުރިމަތިވެފަ އެވެ.
ހޮނިހިރު ދުވަހު ގާތްގަނޑަކަށް 100 އެއްހާ މުޒާހަރާގެ ބައިވެރިން ވަނީ ސަލާމަތީ ކަންކަމަށް ޖަހާފައި ހުރި ބެރިކޭޑްތައް ފަހަނައަޅައި ގޮސް، އަޑުއުފުލާފަ އެވެ. މުޒާހަރާގެ ބައިވެރިންގެ ތެރެއިން ބައެއް މީހުން ފުލުހުން ހައްޔަރުކުރީ ބާރުގެ ބޭނުންކޮށްގެންނެވެ.
މަންޒަރު ދުށް މީހުން ބުނި ގޮތުގައި، މުޒާހަރާގެ ބައިވެރިންގެ ތެރޭގައި މިނިވަން މެންބަރު ކަޕިލް ސިބަލް އާއި، ވާތުފިޔަހުގެ "އޯލް އިންޑިއާ ސްޓޫޑެންޓްސް އެސޯސިއޭޝަން" ގެ ރައީސް ނޭހާ ބޯރާގެ އިތުރުން ސިޔާސީ ހަރަކާތްތެރިން ކަމަށްވާ ޕްރަޝާންތު ބުޝާން އާއި ޔޯގެންދުރަ ޔާދަވް ހިމެނެ އެވެ.
މި މުޒާހަރާގެ ތެރެއިން ހައްޔަރުކުރި މީހުންގެ އަދަދާއި އެ މީހުންގެ ވަނަވަރު ހާމަކުރުމަށް ފުލުހުން ވަނީ އިންކާރުކޮށްފަ އެވެ.
"ފުރަތަމަ އެ މީހުން ވޯޓާ ލިސްޓުން މީހުންގެ ނަންތައް އުނިކުރީ. މިހާރު އެކަމާ ދެކޮޅަށް އަޑުއުފުލުމުގެ ފުރުސަތެއް ވެސް ނުދޭ. މިއީ ބަލައިގަނެވޭނެ ކަމެއް ނޫން،" ނޭހާ ބޯރާ ރޮއިޓާސްއަށް ބުންޏެވެ.
އިލެކްޝަން ކޮމިޝަނުގެ އިސްވެރިޔާ ގިޔާނޭޝް ކުމާރު، މި މުޒާހަރާތަކާ ގުޅިގެންނާއި އޭނާގެ އިސްތިއުފާއަށް ގޮވާލަމުންދާ ގޮވާލުންތަކާ ގުޅޭގޮތުން މިހާތަނަށް އެއްވެސް އެއްޗެއް ވިދާޅެއް ނުވެ އެވެ.
ހުކުރު ދުވަހު ވެސް ފުލުހުން ވަނީ މުޒާހަރާގެ ބައިވެރިން އެއްވިޔަނުދީ ހުރަސްއަޅައި، ބައެއް މީހުން ބަސްތަކަށް އަރުވައިގެން ގެންގޮސްފަ އެވެ. ސަލާމަތީ ކަންކަން ވަރުގަދަކުރުމުގެ ގޮތުން އެ ސަރަހައްދާ ކައިރި ބައެއް މެޓްރޯ ސްޓޭޝަންތައް ވެސް ވަނީ ބަންދުކޮށްފަ އެވެ.
ހުކުރު ދުވަހު ހައްޔަރުކުރި ގިނަ ބަޔަކު ފަހުން ދޫކޮށްލި ނަމަވެސް، ދިއްލީގައި މީހުން އެއްވެ އުޅުން މަނާކޮށް ނެރެފައިވާ އަމުރާ ޚިލާފުވި ކަމުގެ ތުހުމަތުގައި ބައެއް މީހުންގެ މައްޗަށް ދައުވާ އުފުލާފައިވާ ކަމަށް ފުލުހުންގެ މަސްދަރަކުން މައުލޫމާތު ދެ އެވެ.
ފާޑުކިޔާ ފަރާތްތަކުން ބުނާ ގޮތުގައި، މިދިޔަ އަހަރު މުޅި ގައުމުގައި ފެށި ވޯޓާ ވެރިފިކޭޝަންގެ މަސައްކަތުގެ ސަބަބުން، ވޯޓުލުމުގެ ހައްގު ލިބިގެންވާ އެތައް މިލިއަން ރައްޔިތުންނެއްގެ ނަން ވަނީ ވޯޓާ ލިސްޓުން އުނިވެފަ އެވެ.
އިންޑިއާގެ އެންމެ އިތުބާރު ހުރި މުއައްސަސާތަކުގެ ތެރޭގައި ހިމެނޭ އިލެކްޝަން ކޮމިޝަނުން ބުނަނީ، މި މަސައްކަތަކީ ލިސްޓުގައި ތަކުރާރުވެފައިވާ ނަންތަކާއި، މަރުވެފައިވާ މީހުންނާއި، ވޯޓުލުމުގެ ޝަރުތު ހަމަނުވާ މީހުންގެ ނަންތައް އުނިކުރުމަށް ކުރާ މަސައްކަތެއް ކަމަށެވެ.
މި މައްސަލަ ހޫނުވެފައި ވަނިކޮށް، އަލަށް ވޯޓުލުމުގެ ހައްގު ލިބޭ މީހުންނާއި ވޯޓާ ލިސްޓުން ނަން އުނިވެފައިވާ މީހުން ރަޖިސްޓްރީ ކުރުމަށް އިލެކްޝަން ކޮމިޝަނުން ހުކުރު ދުވަހު ވަނީ އޮފިޝަލުންނަށް އަންގާފަ އެވެ.
