އިންޑިއާގެ ވޯޓުލާ މީހުންގެ ދަފުތަރަށް ގެނައި ބަދަލުތަކާ ގުޅިގެން، އެ ގައުމުގެ އިލެކްޝަން ކޮމިޝަނުގެ އިސްވެރިޔާ އިސްތިއުފާ ދެއްވުމަށް ގޮވާލައި ކުރަމުންދާ މުޒާހަރާތައް ވަރުގަދަވެއްޖެ އެވެ.
އާދީއްތަ ދުވަހު ވެސް ގިނަ ޒުވާނުންނާއި އިދިކޮޅު ސަޕޯޓަރުން ދިއްލީ އާއި މުމްބާއީގައި އެއްވި އެވެ. މި މުޒާހަރާތަކުގެ ތެރެއިން ބައެއް މީހުން ފުލުހުންގެ ބެލުމުގެ ދަށަށް ގެންގޮސްފައިވާއިރު، މިއީ މިގޮތަށް މުޒާހަރާ ކުރާތާ ޖެހިޖެހިގެން ތިންވަނަ ދުވަހެވެ.
މުމްބާއީގައި ކުރިއަށްދިޔަ މުޒާހަރާތައް ލީޑުކުރެއްވީ އިދިކޮޅު ލީޑަރުން ކަމަށްވާ ރާޖް ތާކްރޭ އާއި އުއްދަވް ތާކްރޭ އެވެ. އެ ބޭފުޅުން ވަނީ ވޯޓާ ރޯލަށް ގެނައި ބަދަލުތައް އުވާލުމަށާއި، އިލެކްޝަން ކޮމިޝަނުގެ ޗީފް ގްޔަނޭޝް ކުމާރު މަގާމުން އިސްތިއުފާ ދެއްވުމަށް ގޮވާލައްވާފަ އެވެ.
މުޒާހަރާގެ ބައިވެރިން ތުހުމަތުކުރާ ގޮތުގައި ވޯޓާ ރޯލަށް ގެނައި މި ބަދަލުތަކަކީ ބޮޑުވަޒީރު ނަރެންދުރަ މޯދީގެ ބާރަތިޔާ ޖަނަތާ ޕާޓީ (ބީޖޭޕީ) އަށް ނާޖާއިޒު ފައިދާ ހޯދައިދިނުމަށް ގެނައި ބަދަލުތަކެކެވެ. ނަމަވެސް އިލެކްޝަން ކޮމިޝަނާއި ބީޖޭޕީން ވަނީ އެ ތުހުމަތުތައް ދޮގުކޮށްފަ އެވެ.
ވެރިރަށް ނިއު ދިއްލީގައި އާދީއްތަ ދުވަހުގެ ހަވީރުގެ ވަގުތެއްގައި މުޒާހަރާގެ ބައިވެރިން އެއްވާން ފެށުމާއެކު، އޭގެ ތެރެއިން ބައެއް މީހުން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ރިޕޯޓުތައް ބުނެ އެވެ. މިކަމާ ގުޅިގެން ދިއްލީ ފުލުހުންގެ ވަކި އެއްޗެއް ނުބުނެ އެވެ.
ވޭތުވެދިޔަ ދެ ދުވަހު ވެސް ވެރިރަށުގެ ފުލުހުން ވަނީ މީހުން އެއްވިޔަނުދީ ހުއްޓުވައި، އެތައް ބަޔަކު ހައްޔަރުކޮށް ބަސްތަކުގައި އެ ސަރަހައްދުން ދުރަށް ގެންގޮސްފަ އެވެ.
ހައްޔަރުކުރި މީހުންގެ ތެރެއިން ބައެއް މީހުން ހުކުރު އަދި ހޮނިހިރު ދުވަހު ދޫކޮށްލި ނަމަވެސް، ވެރިރަށުގެ މެދުތެރޭގައި މީހުން އެއްވުން މަނާކޮށް ނެރެފައިވާ އަމުރުތަކާ ޚިލާފުވި ކަމުގެ ދައުވާ ފުލުހުން ވަނީ ބައެއް މީހުންގެ މައްޗަށް އުފުލާފަ އެވެ.
